Обвинителството одлучи да го

повлече обвинението против Радослав Смилчевски, вработен во скопски Катастар,

оти на судењето се докажало дека тој не бил замешан во случајот

Обвинителството одлучи да го

повлече обвинението против Радослав Смилчевски, вработен во скопски Катастар,

оти на судењето се докажало дека тој не бил замешан во случајот

Деветмина обвинети за случајот

„Бачило“ ќе добијат помали казни откако Обвинителството вчера одлучи да ги гони

за поблаг облик на перење пари, а за кој е предвидена парична казна или затвор

од најмногу три години. Според Кривичниот законик на Македонија, за најтешкиот

облик на кривичното дело перење пари е предвидена затворска казна и до десет

години. Обвинителството вчера во завршните зборови побара 21 обвинет за

незаконски досудените 720.000 евра за гранатирање бачило на овчарот Иснифарис

Џемаили да бидат прогласени за виновни и да бидат осудени.

Нотарот Никола Стојменовиќ е обвинет за злоупотреба на службената положба, за

измама и за перење пари, а Џемаили се товари за перење пари и за злоупотреба.

Обвинителот Гордана Ѓешковска вчера одлучи да го повлече обвинението против

Радослав Смилчевски, вработен во скопски Катастар и член на второстепената

комисија за денационализација. Според Обвинителството, во текот на судењето се

докажало дека тој не бил замешан во случајот. Кривичната постапка е стопирана и

за поранешната судијка Марија Дубровска, која почина во петокот.

За случајот сега се товарат 21 лице, од кои 13 обвинети се во притвор. Меѓу нив

е и бившиот заменик-министерот за економија Саша Андоновски, обвинет за

злоупотреба на службената должност, која ја сторил како претседател на

второстепената владина комисија за денационализација.

Адвокатот на нотарот Стојменовиќ вчера побара изрекувањето на завршните зборови

да се одложи за денеска, бидејќи обвинителот го прецизираше обвинението. На

вчерашното рочиште се очекуваше завршни зборови да дадат и другите адвокати.

Јавниот правобранител на Македонија, за аферата „Бачило“ побара 1.250.000 евра

отштета од обвинетите. Според обвинението, незаконски досудените 720.000 евра

за гранатирањето на бачилото и за уништувањето на добитокот на обвинетиот

Џемаили биле искористени за малверзации со денационализирано земјиште.

Во текот на судењето, повеќето обвинети тврдеа дека се невини и го посочија

нотарот Стојменовиќ како креатор на целата афера. И овчарот Џемаили тврдеше

дека е невина жртва на измамата на нотарот. Од друга страна, пак, Стојменовиќ

изјави дека не е виновен и дека не ја злоупотребил службената должност.

Тој изјави дека при склучувањето на договорите за заем и за хипотеки врз

денационализирано земјиште не биле користени парите што Џемаили ги добил како

отштета од државата и дека се’ било правено законски. Саша Андоновски во своја

одбрана кратко одговори дека е жртва на политички прогон.

Судењето почна пред само три недели и се очекува пресудата да биде изречена во

наредната недела.