Стојче Тапанџиоски, директорот на Агенцијата за вработување, вчера призна

дека како државен службеник во времето на СДСМ под принуда избришал голем број

лица од списокот на невработени лица.

СТОЈЧЕ ТАПАНЏИОСКИ, ДИРЕКТОР

НА АГЕНЦИЈАТА ЗА ВРАБОТУВАЊЕ, ПРИЗНА

Стојче Тапанџиоски, директорот на Агенцијата за вработување, вчера призна

дека како државен службеник во времето на СДСМ под принуда избришал голем број

лица од списокот на невработени лица.

– Оваа највалкана игра ја работев како службеник во Центарот за вработување на

градот Скопје. Имав задача да ги бришам од евиденција невработените лица.

Бришевме по сите можни и неможни основи. Не го почитувавме законот, а жалбите,

молбите и поплаките не вредеа ништо – рече Тапанџиоски.

На вчерашната прес-конференција во Агенцијата за вработување, вицепремиерот

Зоран Ставревски и Трајко Славески, министер за финансии, ги презентираа

фактите за стапката на невработеност во земјава. Според последните податоци на

Агенцијата за вработување, во Македонија во моментов има 370.977 лица, што е

три отсто помалку во однос на претходниот месец.

Ставревски вели дека бројките за невработени лица се бројки за судбини и за

луѓе и додаде дека е етички невкусно и непрофесионално да се манипулира со

евиденцијата. Тој го обвини СДСМ дека пред изборите незаконски бришел лица од

списокот на невработени само за да прикаже намалување на нивниот број.

Ставревски посочи дека постојат меѓународно признаени параметри за тоа како се

следи невработеноста. Според него, се друго е користење бројки за дневнополитички

потреби.

– И позицијата и опозицијата треба да ги признаат фактите дека невработеноста

во Македонија е голема, тоа е сериозен проблем и никакво козметичко испишување

на невработените пред избори не може да го реши – рече Ставрески.

Тој објасни дека меѓународно признаената статистика за невработеноста се

подготвува според анкета на работна сила.

– Анкетата на работна сила е единствен меродавен показател со кој меѓународните

финансиски институции ја следат статистиката, а кај нас за неа е задолжен

Државниот завод за статистика. Според податоците оттаму, во 2002 година

стапката на невработеност изнесувала 31,9 отсто, а во 2006 била 35,9 отсто.

Сметам дека трендот е доволно јасен и не бара понатамошен коментар – рече

Ставрески.

Тој информира дека Агенцијата за вработување има сопствена евиденција, која ја

користи за свои потреби.

– Таа покажува дека во мај 2006 година бројот на невработени бил 355.476, а

следниот месец оваа бројка била намалена за 30.000 лица, за во август истата

година бројката да достигне 320.947 лица. Во ниту една држава во светот, а

најмалку во Македонија поради стагнантната економија изминатите години,

бројката на невработени не се намалила за 30.000.

 Несфатливо е како се

презентира податок дека бројка на невработеност од август 2006 до денес може да

се зголеми за 50.000. Тоа се случува само во земји каде што има војни, конфликт

или елементарна непогода – рече Ставрески.

Според него, СДСМ сноси најголема одговорност за тоа што проблемот со

невработеноста досега не е решен.

– За 11 години, од вкупно 15, СДСМ е одговорен што овој проблем не е решен.

Јасно е дека таа политичка гарнитура немаше идеи и решенија како да се справи

со невработеноста.

 Сегашната власт не замајува никого, не дава лажни ветувања,

ниту вели дека тоа ќе ја намали невработеноста преку ноќ. Ќе работиме напорно

како досега, ќе разговараме отворено за проблемите и ќе настојуваме преку

зголемување на домашните и на странските инвестиции, како и преку поттикнување

на малите и на средните претпријатија да отвориме нови работни места – рече

Ставрески.

Министерот Славески рече дека СДСМ секогаш, година или две пред избори,

незаконски го брише списокот на невработени.

– Тоа е показател дека сигурно ги губат изборите. Пред изборите во 1998 година

СДСМ од евиденцијата избриша над 100.000 лица. Истото го сторија во периодот

2005-2006, кога незаконски беа избришани 120.000 лица регистрирани како

невработени – нагласи Славески.