Свет
„Братиславската врска” последен адут на Чочоровска
Балканската „кралица на кокаинот”, Станислава Чочоровска
– Полетан, од вчера се наоѓа во истражниот затвор во Скопје.
КОКАИНСКАТА КРАЛИЦА ИСПОРАЧАНА
ВО ШУТКА
Балканската „кралица на кокаинот”, Станислава Чочоровска
– Полетан, од вчера се наоѓа во истражниот затвор во Скопје. По четиримесечен
притвор во белградскиот истражен затвор, српските власти вчера ја испорачаа
Чочоровска на граничниот премин „Табановце”. Екстрадицијата беше проследена под
силно полициско обезбедување на МВР, во кое беа вклучени и специјалните
единици.
Одлуката за екстрадиција на Чочоровска беше донесена минатиот петок, кога
српскиот министер за правда го потпиша решението со кое потврди дека се
исполнети сите правни и законски услови за испорачување на нашите власти.
Инаку, за време на притворот Чочоровска, преку својот адвокат Светозар
Павловиќ, ги искористи сите правни механизми за да го блокира и одложи
нејзиното екстрадирање. Таа се обиде да добие српско државјанство, но беше одбиена,
а во минатите четири месеци вложи десетина жалби на безмалку сите судски одлуки
за нејзиниот случај.
Во наредните денови се очекува Чочоровска да биде изведена на распит пред
истражен судија во скопскиот Основен суд 1 каде што треба да ги каже деталите
околу транспортот на половина тон кокаин од Венецуела, кои беа запленети на 7
јануари на граничниот премин „Блаце”. Од Јавното обвинителство информираат дека
почетокот на судскиот процес се очекува да почне до крајот на месецот.
Во меѓувреме, во јавноста се појавија шпекулации за тоа дека Чочоровска може да
добие статус на заштитен сведок бидејќи наводно имала информации за атентатот
врз поранешниот претседател Киро Глигоров во октомври 1995 година. Според
нејзините последни изјави, таа им дала логистичка поддршка на учесниците во
атентатот и станот во кој престојувале атентаторите од каде што бил активиран
експлозивот со помош на далечински апарат бил на нејзино име. Токму поради тоа
„кралицата на кокаинот” се претпоставува дека имала контакти со т.н. „Братиславска
врска”.
Но, полициски извори кои учествувале во истрагата за атентатот на Глигоров
тврдат дека во ниту еден момент на истрагата не дошле до името на Чочоровска
како можен учесник или организатор на атентатот. Сепак тие додаваат дека тоа не
може да биде сигурна потврда дека таа наводно учествувала или не учествувала во
подготовката на атентатот.
Познато е дека станот од кој бил активиран експлозивот бил на трети кат во
зградата број 26, која се наоѓа веднаш до хотелот „Бристол” и наспроти местото
на кое што беше паркиран автомобилот „ами – 8” полн со експлозив. Тој стан бил
изнајмен од бугарски државјанин со муслиманско потекло, наводно бизнисмен, кој
неколку пати во месецот престојувал таму.
За наводите дека Чочоровска била лицето што ја дало логистичката поддршка не
може со сигурност да се потврди.
Останува да се види што ќе каже Чочоровска пред истражните органи и дали
нејзините наводи биле само последниот адут што го чувала за да го избегне
долгогодишниот затвор, кој со сигурност ја очекува.
Чочоровска не е куќен пријател со семејството Глигорови
Кабинетот на поранешниот претседател Киро Глигоров ги демантира наводите во
медиумите дека Станислава Чочоровска била куќен пријател со поранешниот
претседател и неговата сопруга.
– Тоа не е вистина. Тие не се познаваат и не се куќни пријатели – велат од
кабинетот на претседателот.
Во македонската јавност се појави информација дека токму Станислава била блиска
со Киро Глигоров, а нејзината мајка и Нада, сопругата на Глигоров, биле блиски
пријателки што често меѓусебно се посетувале.
Што има на видеокасетата на Станислава?
Станислава Чочоровска е сопруга на Мирко Полетан, поранешен телохранител и
близок соработник на српскиот криминален бос Жељко Ражњатовиќ – Аркан. Во
времето на Слободан Милошевиќ фирмата на Чочоровска го имаше ексклузивното
право да отвори фришопови на граничните премини. Со самото тоа станува
посредник меѓу македонското и српското подземје, кои во тоа време заедно
шверцуваа цигари. Чочоровска во неколку наврати во минатото изјави дека
поседува цеде со снимки на средби на високи македонски политичари и крупни
бизнисмени со синот на Слободан Милошевиќ, Марко, на кои биле договорни
криминални зделки.
Токму затоа таа се поврзува со „Братиславската врска”, која наводно
соработувала со српското подземје во организирањето и изведувањето на
атентатот.
Истрагата за атентатот се сведе на шпекулации и афери
Почетокот на полициската истрага беше обележан со многу пропусти, намерни или
ненамерни. Најголемата грешка на полицијата беше што во првите 24 часа не беа
блокирани излезите од Скопје, така што атентаторите имаа можност да побегнат.
Полициската истрага се насочи во два правци, кои потоа станаа само афери. Прва
беше т.н „Братиславска врска” во која учествувале нарко – дилерот од скопското
село Грчец Аслан Нуиши, Петрит Аме и уште неколку македонски државјани од
албанско потекло, но не и Станислава Чочоровска тврдат полициски извори кои што
ја истражувале оваа можност. Оваа група имала блиски врски со српското подземје
во Чешка, а одлуката за ликвидација на Глигоров паднала поради бизнис-интереси.
Оваа информација беше лансирана од тогашниот висок полициски функционер
Слободан Богоевски, инаку роднина на Чочоровска.
Втора беше трагата дека организатори на атентатот е бугарската корпорација
„Мултигруп”, која имаше сомнително потекло и капитал, кој потекнуваше од
руската и бугарската тајна служба. Оваа трага беше директно посочена од
тогашниот министер за внатрешни работи Љубомир Фрчкоски.
Меѓутоа, ниту една од двете истраги не даде никакви резултати.
Единствено познато од полициската истрага беше дека автомобилот „ами – 8” бил
на име на една жителка на градот, Сузана, која потоа беше приведена и
испрашувана, но никогаш не се потврди нејзината евентуална вмешаност. Тоа
важеше и за скопјанката Марика Стојменова, „русокосата жена” што била во
околината на местото каде што беше извршен атентатот и за која беше изработен
фоторобот. Таа исто така беше приведена и испрашувана, но без конкретен резултат.
Во екот на истрагата се случија и сомнителни самоубиства на две лица за кои се
сметаше дека имаат конкретни информации околу атентаторите. Тоа е самоубиството
на Драган Гавриловски, телохранителот на Глигоров. За неговата смрт беше
утврдено дека тој, наводно во состојба на психичко растројство, сам си го одзел
животот со фрлање под воз на железничката пруга кај Ѓорче Петров, во Скопје.
Но, обдукцијата на неговото тело најде траги на насилство. Истрага никогаш не
беше поведена. Уште помистериозна беше смртта на младата полицајка Тања
Павловска, вработена во шестата управа на МВР. Таа беше најдена мртва со
прострелна рана во градите, но службениот пиштол со кој наводно било пукано
беше најден стотина метри од нејзиното тело. И покрај тоа што нејзините родители
упорно тврдеа дека таа била убиена, МВР остана на ставот дека таа сама си го
одзела животот.
Смиленски може да се извлече
и да се протне низ законите
Бизнисменот-Македонец
со австриско државјанство Методиј Смиленски може лесно да го избегне
соочувањето со македонските судови, со тоа што ќе се протне низ законите,
тврдат доброупатени извори. Според нив, ако Смиленски биде екстрадиран во
Македонија, нему може да му се пресмета времето поминато во екстрадициски
притвор во Србија (околу пет месеци). Според македонскиот Закон за кривична
постапка, пак, обвинетиот може да остане во притвор најмногу една година од
поднесувањето на обвинението.
– Ако сакаат, а многу видни функционери од државава сакаат Смиленски да молчи
за криминалот во државава, многу лесно можат да го протнат низ законите. Треба
само да поминат уште шест месеци, по што тој ќе мора да биде пуштен во
согласност со законот. Ако дотогаш не биде донесена пресудата, тој најверојатно
ќе ја напушти државата и нему ќе треба да му се суди во отсуство. На тој начин,
ќе се избегне можноста Смиленски да проговори за неговата поврзаност со сите
моќници од актуелната и од претходната власт – прогнозираат нашите извори.
Засега обвинение е покренато против Смиленски и против екс-гувернерот на
Народната банка на Македонија Љубе Трпески. Тие се товарат за проневери од
милиони евра од „Експорт-импорт” банката. Трпески е во куќен притвор, а
Смиленски веќе 11 месеци ја издржува мерката притвор во Србија.
Низата сомнителни бизниси и стечаи во сопствените фирми за кои претходно земал
кредити, Смиленски ги правел и во времето на ВМРО-ДПМНЕ и во времето на СДСМ.
Српското Министерство за внатрешни работи одби да му даде српско државјанство
на контроверзниот бизнисмен. Се чека потписот на српскиот министер за правда
пред тој да биде екстрадиран во Македонија.
М.Ј.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Орбан врши притисок, ЈАНАФ возвраќа: Снабдување има, но само според санкциите на ЕУ и САД
Откако унгарскиот премиер Виктор Орбан го заостри притисокот врз Хрватска поради транспортот на руска нафта кон Унгарија, Европската комисија порача дека за спроведувањето на санкциите се одговорни земјите членки. Набргу потоа се огласи и Јадранскиот нафтовод (ЈАНАФ), кој ги отфрли ултиматумите и порача дека работи во согласност со правилата на Европската унија и Соединетите Американски Држави.
МОЛ вчера побара од ЈАНАФ гаранција дека ќе овозможи транспорт на руска сурова нафта што не е под санкции и која во Унгарија пристигнува по морски пат, со предупредување дека во спротивно ќе бара правна и финансиска одговорност. Европската комисија денеска соопшти дека спроведувањето на санкциите е во надлежност на земјите членки, пишува „Индекс.хр“.
ЈАНАФ: Одлуките не се носат под притисок
Реагирајќи на ултиматумот, од ЈАНАФ порачаа дека разговорите меѓу партнери и сојузници се водат „пристојно, аргументирано и врз основа на факти“.
„Во врска со ултиматумите упатени до ЈАНАФ, сметаме дека е важно да се соопшти дека разговорите меѓу партнери и сојузници се водат пристојно, аргументирано и врз основа на факти“, наведуваат тие.
Истакнуваат дека ЈАНАФ работи одговорно и целосно во согласност со важечките санкциски режими на Европската унија и Соединетите Американски Држави.
„Безбедноста на снабдувањето на Унгарија и Словачка не е загрозена. Рутата преку ЈАНАФ постои, веќе се користи и има доволни капацитети да ги покрие нивните потреби за нафта. Тоа го потврдува и самата Унгарија, која денес бара целосен транспорт преку ЈАНАФ, иако неодамна неосновано тврдеше дека таков капацитет не постои“, соопштуваат од компанијата.
Додаваат дека минатата и оваа недела за унгарскиот МОЛ веќе се транспортирани значителни количини нафта што не се опфатени со санкциски ограничувања, како и дека до почетокот на април се очекуваат уште седум танкери за истиот корисник на нафтоводниот систем на ЈАНАФ.
Снабдување можно, но со строга примена на санкциите
„Хрватската енергетска инфраструктура е подготвена, сигурна и достапна за снабдување што е усогласено со правилата на ЕУ и OFAC“, наведуваат од ЈАНАФ.
Како пример ја наведуваат снабдувањето на српската компанија НИС, каде партнерите, како што посочуваат, заеднички ги исполнуваат строгите санкциски критериуми за да обезбедат потребни продолжувања и континуитет на снабдувањето во рамки на важечките правила.
Во тој контекст очекуваат одлуките за набавка и транспорт кон Унгарија и Словачка да се носат врз основа на законитост и усогласеност со санкциите, а не под притисоци или ултиматуми.
„Доколку постојат барања што се однесуваат на нафта од руско потекло или на субјекти поврзани со Русија, тие можат да се разгледуваат исклучиво во строгата рамка на санкциските критериуми на ЕУ и OFAC, со целосна правна проверка, јасна одговорност и максимална транспарентност“, наведуваат.
Во заклучокот истакнуваат дека Хрватска не одбива снабдување ниту ја политизира енергијата. „Хрватска и ЈАНАФ овозможуваат снабдување во согласност со прописите, доследно применувајќи ги санкциите на ЕУ и САД“, наведуваат тие.
Комисијата: Земјите членки одлучуваат за спроведувањето на санкциите
Портпаролката на Европската комисија, Ана-Каиса Итконен, претходно изјави дека за спроведувањето и примената на санкциите се одговорни земјите членки. „Основното начело е дека за спроведувањето и примената на санкциите се одговорни земјите членки“, рече таа, одговарајќи на прашањето дали Хрватска може да испорачува руска нафта преку ЈАНАФ.
Европската унија во јуни 2022 година, во рамки на шестиот пакет санкции, го забрани увозот на руска нафта по морски пат. Унгарија, Словачка и Чешка добија привремено изземање како земји без излез на море, во случај испораката преку нафтовод да не е можна.
Нафтоводот „Дружба“ беше оштетен кон крајот на јануари во руски напад со дронови, по што дотокот на нафта беше прекинат, а спорот околу алтернативните рути дополнително се заостри.
Свет
Сè потензично меѓу Словачка и Украина: Зеленски и Фицо разговарале за руската нафта
Украинскиот претседател, Володимир Зеленски, и словачкиот премиер Роберт Фицо телефонски разговараа во услови на зголемени тензии поради прекинот на испораката на руска нафта преку нафтоводот „Дружба“, кој минува низ Украина.
Од кабинетот на Зеленски соопштија дека претседателот го поканил Фицо во Украина за да разговараат за сите отворени прашања.
Словачка и Унгарија го обвинуваат Киев за одолговлекување со повторното пуштање во работа на нафтоводот, чиј дел во Украина беше оштетен во руски напади во јануари. Тие тврдат дека е поправен, но Зеленски посочи дека работите сè уште не се завршени и ја повика Будимпешта да разговара со Москва, која, според него, повеќепати го бомбардирала нафтоводот.
Унгарскиот премиер Виктор Орбан соопшти дека со Фицо формирале заедничка истражна комисија и побара Украина да дозволи унгарски и словачки инспектори да влезат во земјата. Во меѓувреме, Орбан го блокира заемот од 90 милијарди евра од Европската унија за Украина и нови санкции против Москва, сè додека не продолжат испораките преку „Дружба“.
Свет
Врховниот суд на Израел ја стопира владината забрана за хуманитарните организации во Газа
Израелскиот Врховен суд привремено ја блокира одлуката на владата со која на 37. меѓународни хуманитарни организации, меѓу кои и „Лекари без граници“ и Норвешкиот совет за бегалци, им беше наложено да го прекинат работењето во Газа и на Западниот Брег, освен ако не ги прифатат новите услови, вклучително и доставување список на палестински персонал.
Седумнаесет здруженија пред шест дена побараа од судот итно укинување на одлуката, предупредувајќи на тешки хуманитарни последици.
Со привремената одлука на судот, организациите ќе можат да продолжат со поголемиот дел од активностите додека не се донесе конечна пресуда. Израелските власти тврдат дека мерката е неопходна за да се спречи злоупотреба на хуманитарната помош од палестински вооружени групи.
Движење ЗНАМ: Иницираме кратење на пратеничкиот состав од 120 на 90 во новото решение на Изборниот Законик
Потпретседателката на Движење ЗНАМ за Наша Македонија, Весна Бендевска, на првата конститутивна седница на работната група за реформи во изборното...
Уапсен тетовец: осомничен за лажни дојави за поставени бомби во образовни институции
Утрово во 09:10 часот во с.Палатица, тетовско, полициски службеници од одделот за сузбивање на организиран и сериозен криминал при Министерството...
Сиљановска-Давкова – Бегај: Нема поголема инвестиција во стабилноста на Западниот Балкан од членството во ЕУ
Во рамки на официјалната посета на албанскиот претседател, денеска беше одржана заедничка прес-конференција на претседателката Гордана Сиљановска-Давкова и претседателот Бајрам...
(Видео) 73,2% ученици пушачи не биле спречени да купат цигари поради возраста, ИЈЗ спроведе истражување на 7,8 и 9-одделенци
Од 2002 година, откога се прават истражувања за пушење меѓу учениците, во 2024 година е забележан највисок процент на ученици...
Откриен обид за криумчарење на 4.800 пакувања никотински ќесички вредни 1,2 милиони денари
Царинската управа откри и спречи обид за криумчарење на 4.800 пакувања со никотински ќесички со вредност од 1,2 милиони денари....
Уапсена лихварка од Струмица: дала 2.700 евра, а барала да се вратат 15 илјади евра, фатена кога ја примала каматата
Вчера во 12:00 часот во Струмица, полициски службеници од СВР Струмица ја лишија од слобода 53-годишната Ј.Т. од Струмица. Според...
10.000 денари субвенција за млади возачи за првпат во Ѓорче Петров
Општина Ѓорче Петров воведува субвенција од 10.000 денари за дел од трошоците за полагање возачки испит – Б категорија, наменета...
(Фото) Епстин сакал да купи вила во земја без договор за екстрадиција со САД еден ден пред апсењето
Само еден ден пред апсењето во 2019 година, Џефри Епстин се обидел да купи вила вредна повеќе милиони долари во...
Од 1 март 2026 година – побезбедни онлајн плаќања, известува Народната банка
Народната банка ја информира јавноста дека од 1 март 2026 година стапува во сила законската обврска за банките за вршење...
(Видео) Крмов: Премиере, ќе ја раскинете ли нелегалната концесија за Блатешница по 13 продолжени рокови
Пратеникот Борислав Крмов од Левица на седница на пратенички прашања ја повика Владата да ја раскине концесијата за изградба на...
Тешка пневмонија комплицирана од хроничните болести на Дачиќ: „Шеќерот му беше 20“
Српскиот вицепремиер и министер за внатрешни работи Ивица Дачиќ (60) е во тешка состојба на Клиниката за пулмологија при Клиничкиот...
Пакистанскиот премиер: Нема да има компромис во одбраната на нашата сакана татковина
Пакистанскиот премиер Шехбаз Шариф изјави дека вооружените сили на земјата „се целосно способни да ја скршат секоја агресивна намера“. „Нема...
(Видео) Експлозии во Кабул, Пакистан: Во отворена војна сме со Авганистан
Пакистан го бомбардираше авганистанскиот главен град Кабул и две други провинции преку ноќ, неколку часа откако Авганистанците го започнаа својот...
Гислен Максвел: Клинтон и Епстин се запознаа преку мене
Една фотографија го прикажува Бил Клинтон како плива ноќе со Гислен Максвел, британска личност од високото општество подоцна осудена за...
Зеленски: Не сум најдобриот татко поради војната, мојот избор е должност
Украинскиот претседател Володимир Зеленски проговори за личните предизвици со кои се соочува по годините војна, признавајќи дека неговите должности го...
Сиљановска-Давкова: „Извозот на мозоци“ остава длабоки лузни, најдобрите си заминуваат поради недостиг на правдата при вработувањето и напредувањето
Претседателката на државата, Гордана Сиљановска -Давкова денеска присуствуваше на презентацијата на проектот „Партнерства за вештини за одржливи и праведни модели...
Таравари поднесе тужба за клевета против Изет Меџити
Претседателот на поделената Алијанса за Албанците, Арбен Таравари, преку својот адвокат, Aбидин Абдули, вчера поднесе тужба за клевета во Основниот...
Мицкоски: Јас бев најнапаѓан човек од Артан Груби, на Прочка се креваа дронови над куќата на мојата сестра
На денешната седница за пратенички прашања претседателот на Владата, Христијан Мицкоски беше прашан за актуелната тема во јавноста со апсењето...
Цвеќе во помен на Борис Трајковски – 22 години од авионската несреќа
Делегација предводена од претседателката Гордана Сиљановска-Давкова, членови на политички партии, семејството денес оддадоа почит во помен на трагично загубените животи...
Мицкоски до Филипче: Со тоа што ги напаѓате пензионерите, само потврдувате дека сте мекото ткиво на политичката сцена
Мене ми е жал што не ја научивте лекцијата, и удирате повторно по група на луѓе кои што за време...
