Малезискиот премиер Махатир Мохамад (94) навести денеска дека можно е да побара да остане на власт и по 2020 година.

Одговарајќи на форум во Доха за тоа дали ќе замине во пензија во 2020 година, тој рече дека сака да ги реши проблемите направени од претходната влада, пренесува „Ројтерс“.

Во вторникот тој вети дека ќе му ја предаде власта на Анвар Ибрахим, и покрај новите обвинувања за сексуално вознемирување против него, и дека може да биде подготвен да го стори тоа по самитот на земјите од Азиско-пацифичката економска соработка (АПЕК) во ноември 2020 година во Малезија.

Денес, сепак, Мохамед рече дека не може да гарантира кој ќе го наследи на премиерската функција.

Албанското обвинителство издаде 17 налози за апсење под обвинение за убиство и злоупотреба на службената положба поради смртта на 51 лице во земјотресот со јачина од 6,4 степени минатиот месец кога се срушија десетици згради, соопшти полицијата, додавајќи дека денеска девет лица се уапсени.

Полицијата и обвинителите наведуваат дека првичните истраги покажале оти една од причините за жртвите во срушените згради е тоа што градителите, инженерите и инвеститорите не се придржувале кон безбедносните правила, норми и стандарди за градење, пренесува „Ројтерс“.

Од деветте уапсени лица, двајца се сопственици на два хотели кои се срушија во Драч кога загинаа четири лица, а третиот е менаџер на хотели кој бил наменет за одмор на полицијата и во којшто загина високо рангиран полициски службеник.

Од полицијата велат дека и двата хотели крај брегот на Јадранското Море биле изградени нелегално.

Се наведува и дека дел од 17-те лица што ги бара обвинителството избегале по земјотресот на 26 ноември.

Европската комисија објави дека членките на ЕУ се согласиле да одржат донаторски собир во Албанија во јануари, со цел да се соберат парични средства за реконструкција на земјата по земјотресот во кој загина 51 лице.

Претседателот на ЕК, Урсула фон дер Лајзен рече дека членките на ЕУ ветиле дека ќе помогнат во долгорочната реконструкција, пренесува АП.

Во земјотрес со јачина од 6,4 степени што се случи минатиот месец, повеќе од 13.000 луѓе останаа без покрив над главата, а над 14.000 згради беа оштетени.

Албанија побара меѓународна финансиска помош за реконструкција, која треба да биде завршена до крајот на 2020 година. Владата на Тирана одвои 117 милиони американски долари за таа цел.