Самостојниот синдикат на науката, образованието и културата (СОНК) е вчудоневиден од леснотијата со која Владата даде тешки квалификации за највисоката делегација на Интернационалата за образование, изјави завчера претседателот на СОНК, Дојчин Цветановски.

СОНК СО КОНТРАОБВИНУВАЊЕ ЗА МАНИПУЛАЦИИТЕ

Самостојниот синдикат на науката, образованието и културата (СОНК) е вчудоневиден од леснотијата со која Владата даде тешки квалификации за највисоката делегација на Интернационалата за образование, изјави завчера претседателот на СОНК, Дојчин Цветановски.

– Да се обвини генералниот секретар дека изјавата за поддршка на нашиот синдикат ја дал изманипулиран од мене е скандалозно и ќе има дополнителни последици – изјави Цветановски на завчерашната прес-конференција.

Според него, Интернационалата за образование е моќна меѓународна организација, што и нејзиниот генерален секретар го прави влијателен човек. Тој, како што рече Цветановски, не може да биде манипулиран и да дава изјави врз основа на манипулација.

– Никој нека не се лаже дека Интернационалата може да биде ССМ и никој не може да очекува дека во нејзиното седиште може да најде некој Ванчо Муратовски и Веселинка Трајковска, кои можат да одработуваат по нарачка – рече Цветановски.

Според него, тврдењето на Владата дека преговорите се прекинати поради дополнителни консултации е невистина.

– Постојат несоборливи докази за вистинската причина за прекинот, а тоа е изјавата на министерот за култура Благоја Стефановски – рече Цветановски.

Тој појасни дека, по прекинот, двапати било упатено барање за продолжување на преговорите, но досега не им било одговорено.

– По завршувањето на Конгресот на СОНК, што ќе се одржи наскоро, ќе и оставиме на Владата десетина дена да ги продолжи преговорите. Во спротивно, ќе бидат преземени сите можни легални и институционални мерки – рече Цветановски, не сакајќи да прецизира за какви мерки станува збор, за да не биде сфатено како притисок.

Цветановски смета дека не држат тврдењата дека постојат два синдиката во овие дејности, бидејќи и самиот министер за труд и социјална политика пред членовите на делегацијата на Интернационалата за образование признал дека нема друг регистриран синдикат.

– Неговото присуство на таканаречениот конгрес на СОНК при ССМ само говори за вмешаноста на власта во овие случувања – додаде Цветановски.