Рускиот нафтен гигант сака да ја „монополизира испораката на енергенси во Европа”, смета шпанската тајна служба, на која се повикува весникот Публико

Рускиот нафтен гигант сака да ја „монополизира испораката на енергенси во Европа”, смета шпанската тајна служба, на која денеска се повикува весникот Публико.

Повикувајќи се на таен извештај на разузнавачката служба ЦНИ, дневникот тврди дека Гаспром со другите извозници како што се Иран, Алжир, Нигерија, Екваторијална Гвинеја, „преговора” за „преземање на контролата над енергетските извори надвор” од Русија.

Гаспром тежнее да „стане единствениот добавувач на гас во Европа”, тврди Публико.

За таа цел Гаспром склучил серија „важни договори за енергетска соработка” со неколку латиноамерикански земји: Венецуела, Боливија и Бразил.

ЦНИ тврди дека Гаспром сака да ја преземе контролата над проектот за гасоводот кој би ја поврзал Нигерија со Европа, преку Нигер и Алжир.

Шпанија речиси воопшто не зависи од рускиот гас, бидејќи го добива од Северна Африка.

Меѓутоа, Гаспром се обидува да влезе на шпанскиот пазар и во ноември покажа интерес за купување акции од националната група Репсол, што предизвика силен отпор.

Во март Гаспром потпиша договор со шпанската група Гас Натурал, што ќе му овозможи купување на електрани во Шпанија.

Гаспром е првиот светски производител на гас и игра клучна улога во снабдувањето на Европа. Компанијата учествуваше во дипломатските тензии меѓу Русија и Украина, чиј спор за цената на рускиот гас остави многу европски земји без плин во текот на зимата/крај/хина/ил