Пациентите во земјава од грип ќе се заштитуваат со непроверени вакцини.

ИГРАНКА СО ВАКЦИНИТЕ ЗА ГРИП

Министертвото за здравство одлучи да ги купи од “Зегин” преостанатите количини од 10.000 вакцини, за кои нема сигурна потврда дали имаат ефект врз пациентите, бидејќи испитувањата на земените мостри во домашната лабораторија неможат да докажа дали гл

Пациентите во земјава од грип ќе се заштитуваат со непроверени вакцини. Станува збор за околу 10.000 вакцини на “Зегин”, кои Министертвото за здравство одлучи да ги откупи од оваа приватна фирма, а за кои нема сигурна потврда дека се активни и ќе дејствуваат врз здравјето на пациентите. Вакцината “ваксигрип”, Бирото за лекови при Министерството за здравство пред една недела издаде забрана за нивна продажба по приватните аптеки, поради сомневања за нивно несоодтвено чување, а со тоа и губење на ефектот. За да се уверат во исправноста, здравствените инспектори земаа две мостри од вакцините и ги дадоа на испитување во лабораторијата на Републичкиот завод за здравствена заштита. Според директорот на Бирото за лекови Ромил Санџаковски резултатите покажале дека вакцините се безбедни и неим е прекинат ладниот ланец на испорака.

” Анализите покажаа дека вакцините се квалитетни и безбедни и дека не е прекинат ладниот ланец на нивна испорака, причина поради која и инсистиравме тие да не се продаваат по аптеките. Точно е дека земените примероци не се од рака на пациент, туку од фрижидер, но само тие беа на располагање”, вели Санџаковски.

Но, додека од Бирото уверуваат откупените вакцини се исправни, стручњаци од државната лабораторија тврдат дека Македонија не располага со соодтвена техника за докажување на активноста на супстанцата.

” Во лабораторијата може да се испита стерилноста и некои други параметри, но не и активноста на супстанцата на вакцината. Тоа значи дека не постои доказ оти примената вакцина има дејство, односно создава имунитет кај пациентот што ја примил”, објаснуваат од лабораторијата.

Сета работа, додаваат истите извори е се повеќе сомнителна од причина што никој не знае од каде се земени испитуваните мостри вакцини и дали се тие оние кои биле изложеи на рафтови.

” Бидејќи овие вакцини ги има и по аптеките во внтарешноста на Македонија, кој знае со сигурност да каже како тие стигнале дотука. Никој не го спори квалитетот на “ваксигрип”, но процедурите мора да се почитуваат”, коментираат фармацевтите.

Познавачите на приликите целата работа ја коментираат како игранка на “Зегин” и надлежните во Министерството за здравство, од причина што начинот на чување, транспортот и се останато врзано за вакцината треба да е наведено во дозволата за нејзин увоз во земјава.

” Цело Министерство и Биро за лекови знаат дека во документацијата за увоз на вакцини мора да биде наведена точната бројка на внесената количина и без документ за која здравствена установа таа е намената, вакцината не смее да влезе во Македонија. Така, да работата случајно или намерно е превидена, а некој на тоа дебело ќарил. Со години се знае дека при добивањето дозвола за увоз мора да има и изјава на директорот на установата каде таа ќе се аплицира на пациенти. Така да точно се знае колку вкупновакцини “Зегин” внел и има право да донесе во земјава”, посочуваат од Бирото за лекови.

Министерот за здравство завчера, пред официјалното објавување на резутатите од мострите вакцини на “Зегин” најави дека ќе ги откупи преостанатите количини.

Сопственикот на “Зегин” Благоја Механџиски тврдеше дека вакцината може 10 дена да се чуваат надвор од фрижидер без никакви последици за нејзиниот квалитет, со што ја оправда слободната продажба на “ваксигрип”. Но, тој испушти да наведе дека чувањето и да е надвор од ладилник мора да биде на температура меѓу 2 и 8 степени Целзиусови.