“Полио плус” бара ревизија на работата на Заедницата на инвалидски организации

“Полио плус” бара ревизија на работата на Заедницата на инвалидски организации

препукувања Заедницата на инвалидски организации и “Полио плус” се препукуваат меѓу себе околу тоа кој работи за доброто на хендикепираните

Жаклина ЃорЃевиЌ

Невладината организација “Полио плус” ќе побара ревизија на финансиското работење на Домот на хуманитарни организации “Даре Џамбаз” за да се утврди каде исчезнале 18 милиони денари од нивниот буџет. Оваа организација ќе побара целосен увид за тоа каде се троши сумата од 1,2 милион евра, колку што добиваат годишно од државата. Ова е најновиот скандал во меѓусебните препукувања на “Полио плус” и Заедницата на инвалидските организации на Македонија, чии несогласувања ескалираа по промовирањето на Законот за заштита на правата и достоинството на лицата со хендикеп. За законот, кој го промовираше “Полио плус”, веднаш реагираше Заедницата со оцена дека на државава не Ј треба нов закон, туку имплементирање на старите, постојни законски решенија. Тие ги обвинија вработените во “Полио плус” дека дејствуваат самостојно и дека сами сакаат да го истуркаат законот, за кој не била побарана согласност од нив.

За несогласувањата на овие невладини организации се заинтересирал и Европскиот форум за лицата со хендикеп, кој упатил порака до организациите да се обединат ако сакаат да имаат поинаков третман во земјите од ЕУ и пристап до нивните фондови.

“Лесно е да добиваат милион евра и да изгледаат дека се хуманитарни организации кога не организираат проекти какви што организираме ние”, вели Душко Христов, извршен директор од “Полио плус”. Христов вели дека Заедницата на инвалидските организации е статична организација која не е подготвена за промени, бидејќи не сакала да разговара со нив за предложениот закон. “Организиравме неколку трибини за законот, а тие беа незаинтересирани за донесување на законот. Им предложивме да се формира и Национален сојуз на лицата со хендикеп, но не беа заинтересирани ниту за тоа”, појасни Христов, додавајќи дека поради својата незаинтересираност за проекти, инвалидските организации не искористиле 150.000 евра што им ги понудил Данскиот совет за бегалци. Тој е зачуден зошто Министерството за труд и социјална политика го дало своето мислење за законот на Заедницата на инвалидски организации, а не на предлагачот “Полио плус”.

Во заедницата го тврдат спротивното. Тие велат дека “Полио плус” досега не ги поканиле да се изјаснат за предложениот законски текст, за кој постоела идеја уште пред четири години. “Зошто го предлагаат законот токму сега кога веќе ја немаат поддршката од истите донатори од порано, меѓу кои и госпоѓата Дикинсон?”, прашуваат од Заедницата.

Инвалидските организации сметаат дека на хендикепираните не им треба посебен системски закон, бидејќи тој нема да ги реши нивните проблеми зашто само ќе повлече низа законски измени, што би значело дополнително комплицирање на состојбите. Наместо таков закон, тие сметаат дека е подобро да се донесе закон за инвалидски организации со кој ќе се регулираат нивните надлежности. “Заедницата на инвалидските организации, во која членуваат околу 90.000 члена, не ја поддржува иницијативата која, всушност, е проект на некои новоформирани здруженија, а во своето дејствување и понатаму ќе се концентрира на предлози за практично решавање на проблемите на инвалидите”, се вели во соопштението на Заедницата.