850 милиони денари се направени со злоупотреба на службената положба и овластување, со примање поткуп и со коруптивно однесување на раководни лица во јавниот и приватниот сектор, а над 126 милиони денари буџетски пари се присвоени со даночно затајува

ЕКОНОМСКИ КРИМИНАЛ ВО 10-ТЕ МЕСЕЦИ ОД 2005

850 милиони денари се направени со злоупотреба на службената положба и овластување, со примање поткуп и со коруптивно однесување на раководни лица во јавниот и приватниот сектор, а над 126 милиони денари буџетски пари се присвоени со даночно затајува

Со злоупотреба на службената положба, коруптивно однесување на раководни лица, со даночно затајување и со перење пари државниот буџет во последниве 10 месеци е оштетен за речиси една милијарда денари, односно за над 16 милиони евра. Со таков криминал буџетот месечно во просек бил оштетуван за 1,6 милиони евра.

Од оваа една милијарда загуба во буџетот, дури 850 милиони денари се направени со злоупотреба на службената положба и овластување, со примање поткуп и со коруптивно однесување на раководни лица во јавниот и приватниот сектор во државата. Над 126 милиони денари оштетување на буџетот се направени со даночно затајување и перење пари.

Според анализите на македонското Министерство за внатрешни работи, во првите 10 месеци од 2005 година, во областа на корупцијата, биле откриени 16 кривични дела примање и давање поткуп, за што се товарат 19 лица. Во делот на економскиот криминал за 10-те минати месеци се реализирани вкупно 223 кривични дела злоупотреба на службената положба и овластување и при тоа се пријавени 278 сторители.

Од тие 223 дела, во 53 случаи актери се раководни лица, директори, поранешни и сегашни, бизнисмени, шефови…

Во делот на даночното затајување и перењето пари МВР во последниве 10 месеци регистрирало поголем број кривични дела за кои се товарат, пред се, основачи и управители на фирми. Во истиот период се поднесени вкупно 32 кривични пријави за затајување данок и перење пари, а за нивно извршување се осомничени и се пријавени 36 лица кои се теретат дека го оштетиле буџетот за над 126 милиони денари.

Последниве 10 месеци покарактеристични беа настаните врзани за даночната пирамида, кога во повеќе наврати МВР поднесуваше кривични пријави против управители, основачи и директори на фирми, најмногу со малверзации при плаќање и поврат на ДДВ, потоа пријави против раководители, членови на комисии и одбори. Во повеќе наврати полицијата поднесуваше пријави и за градоначалници, стечајни управници, инспектори, најчесто за злоупотреба на овластувањата или примање поткуп.

И покрај бројните откриени даночни затајувања, поткупи и злоупотреби, на списокот на осомничени јавноста не виде ниту едно звучно име, иако се шпекулираше со имињата на моќни фирми и бизнисмени, за нивна наводна вмешаност во економскиот криминал, особено во затајувањето данок. (Е.З.)