На поранешниот американски претседател Џо Бајден му е дијагностицирана агресивна форма на рак на простатата, која се проширила и на неговите коски, соопшти вчера неговиот кабинет.

„Минатата недела поранешниот претседател Џо Бајден беше прегледан поради јазол на простатата кога забележа зголемени уринарни симптоми. Во петокот му беше дијагностициран рак на простатата со (највисок степен, група 5) со коскени метастази“, се вели во соопштението додавајќи: „Иако станува збор за поагресивна форма на болеста, ракот е чувствителен на хормонска терапија, што овозможува ефикасен третман“, пренесуваат медиумите во регионот.

Бајден (82) и неговото семејство „моментно ги разгледуваат опциите за лекување со своите лекари“, се вели во соопштението. Оваа вест доаѓа неколку дена откога портпаролот на Бајден изјави дека поранешниот претседател е на преглед поради мал јазол откриен на простатата.

Џо Бајден денес проговори првпат по појавувањето на веста дека боледува од рак.

Тој објави фотографија на X со сопругата Џил и нивната мачка. „Ракот нè допира сите. Како и многумина од вас, Џил и јас научивме дека сме најсилни кога сме скршени. Вашите љубов и поддршка нè подигнаа. Ви благодариме“, напиша Бајден.

Поранешниот црногорски претседател Мило Ѓукановиќ оцени во Сараево дека ситуацијата на Западен Балкан денес е полоша отколку што беше пред десет години и ја опиша европската перспектива на регионот како заматена, особено предупредувајќи на опасноста од влијанието на големосрпскиот национализам.

Ѓукановиќ беше гостин предавач на Факултетот за политички науки во Сараево (FPN), каде што им изјави на новинарите дека одговорноста за слабеењето на европските процеси и влијанието во регионот е на Европската Унија, како и на земјите од Западен Балкан.

Во врска со ЕУ, тој рече дека му се чини оти во неа нема доволно решителност за продолжување на процесот на обединување на европскиот континент, а потенцијалните членки го носат својот дел од одговорноста бидејќи бавно ги спроведуваат реформите што се бараат од нив. Сè беше комплицирано од влошувањето на геополитичките односи, вели Ѓукановиќ.

„Долго време имавме привилегија да имаме стабилни геополитички односи уште од крајот на Студената војна, а сега сме сведоци на раѓањето нов геополитички поредок со многу контроверзии. Се плашам дека ова ќе има многу негативни рефлексии врз регионот на Западен Балкан“, рече поранешниот црногорски лидер, кој, по долгогодишно управување со земјата, мораше да се повлече од власта во 2023 година кога беше поразен на претседателските избори од Јаков Милатовиќ.

Ѓукановиќ во Сараево изјави дека застојот во процесот на европската интеграција предизвикал и влошување на односите меѓу земјите од регионот и посочува дека национализмот што го промовира Белград игра важна улога во тоа.

„Кога немаме добра динамика на европскиот пат, тогаш се појавуваат национализми што ги уништуваат добрососедските односи. Црна Гора е повеќе од кога било погодена од влијанијата на големосрпскиот национализам и поради ова, добрососедските односи, вклучително и односите со БиХ и Хрватска, се влошија. Се надевам дека ова нема да има никакви сериозни и долгорочни последици“, рече Ѓукановиќ.

Амбасадорот на Украина во Белград, Володимир Толкач, изјави денес дека Украина е подготвена да преговара за прекин на огнот со Русија доколку рускиот претседател Владимир Путин навистина сака да разговара, но дека главното барање на Киев е 30-дневен прекин на огнот.

Толкач истакна дека иако Путин предложил средба со украинскиот претседател Володимир Зеленски во Истанбул, тоа се покажало „само како изјава, без никакви конкретни чекори“.

„Нашиот претседател реагира бргу, одговори позитивно и рече дека е подготвен да се сретне во Истанбул. Од првиот момент на оваа војна бевме подготвени за разговори, можеби не директно со Путин, бидејќи тој секогаш лажеше, сакаше да провоцира или уценуваше во овие преговори. Ако Путин навистина сакаше да зборува за прекин на огнот, ние сме подготвени, но имаме едно основно барање – триесетдневен прекин на огнот“, изјави Толкач за телевизијата „К1“.

Толкач смета дека никој од руска страна не е подготвен за сериозни мировни преговори со оглед на тоа што Москва испрати помошник на претседателот, роден во Украина, „без вистинска моќ за донесување одлуки“ на преговорите во Истанбул, а украинската страна во Истанбул ја предводеше министерот за одбрана и искусен заменик-премиер.

На прашањето дали Соединетите Американски Држави денес се сојузник и пријател на Украина, Толкач изјави дека првите чекори на новата американска администрација биле разочарувачки бидејќи нивните изјави понекогаш звучеле „како да се на страната на Русија“, но додаде дека Киев денес разбира оти не треба да ги гледа само изјавите, туку и пошироката слика.

„Имаше контрадикторни изјави, првин американскиот претседател рече нешто што е во прилог на руската пропаганда, а потоа следниот ден нешто сосема спротивно. Се обидовме да го пронајдеме патот и да разбереме што сакаше да каже“, додаде тој.

Одговарајќи на прашањето зошто е одложен почетокот на преговорите во Истанбул, Толкач рече дека Зеленски првин отишол на средбата со турскиот претседател Реџеп Таип Ердоган затоа што е потребно првин да се покаже почит кон земјата домаќин и дека украинската делегација сакала да ги почека резултатите од тој разговор пред да почне преговори со руската страна.

Толкач наведува дека однесувањето на руската делегација за време на преговорите било неприфатливо бидејќи тие „се однесувале како да се домаќини обидувајќи се да ѝ кажат на украинската делегација каде да седне и како да се организира“.

Тој додаде дека поради таквиот став, украинската делегација одлучила да ги одложи преговорите бидејќи било потребно првин да се завршат разговорите со турските претставници, а дури потоа да се почне дијалогот со Русите.

„Руската Федерација се обидува да ги одложи сите преговори и размената на затвореници. Пред тоа да се случи мора да обезбедиме прекин на огнот, но уште поважно е да почнеме реални разговори“, нагласи амбасадорот.