Франција и Германија не можат да ја креираат миграциската политика, без да ги земат предвид барањата на земјите погодени од миграцијата, како што се Италија и Малта, изјави италијанскиот министер за внатрешни работи, Матео Салвини.

Салвини го напиша ова во писмо до францускиот министер за внатрешни работи, Кристоф Кастанер.

„Доста е веќе со одлуки кои се носат само во Париз и Берлин. Италија повеќе не сака да ги прифаќа сите мигранти кои пристигнуваат во Европа”, напиша Салвини на „Фејсбук“, како дополнување на писмото испратено до Кастанер.

Во своето писмо тој тврди дека на состанокот на министрите за внатрешни работи на ЕУ во Хелсинки во четвртокот, голем број министри ги изразлиле своите позиции кои биле поблизу до онаа на Италија за миграционата политика, вклучувајќи ја и потребата за заштита на надворешните граници на Унијата и Шенген зоната.

На состанокот во Хелсинки, Италија и Малта предложија текст кој обезбедува привремен прием и идентификација на мигранти во соседните мигранти.

„Овој документ треба да послужи како камен-темелник на сите идни дискусии“, рече Салвини пред состанокот на министрите за внатрешни работи на ЕУ, што ќе се одржи утре во Париз.

Полицијата употреби солзавец и гумени куршуми за да ги растера демонстрантите во Хонг Конг кои и денеска се собраа на антивладини протести.

Демонстрантите претходно го уништија кинескиот национален симбол на зградата на Канцеларијата за врски, која ја претставува кинеската власт во градот.

Протести во Хонг Конг се случуваат веќе неколку недели, а честопати завршуваат со судири помеѓу полицијата и демонстрантите.

Протестите почнаа по носењето на законот за екстрадиција, што дозволува на жителите на Хонг Конг да им се суди во Кина, но оттогаш прераснаа во пошироко движење. Демонстрантите повикуваат на демократски реформи, универзално право на глас и запирање на ограничувањето на слободите во полуавтономната територија.

Грчкиот премиер, Киријакос Мицотакис денеска во грчкиот Парламент ја претстави владината програма, во рамки на  тридневната расправа за добивање доверба на владата.

Во едночасовниот говор, Мицотакис говореше за владината политика во повеќе области, а кусо се задржа и на преспанскиот договор и грчко-турските односи, пренесуваат медиумите во регионот.

„Приоритет за Балканот е да се ублажат негативните ефекти од преспанскиот договр, а главната точка тука е развојната програма за северна Грција, заштитата на нашите производи и големата меѓународна кампања за нашата Македонија“, изјави Мицотакис.

Тој додаде дека ставот и добрата соработка на соседите ќе го одредат нивниот пат кон Европската Унија.

Грчкиот премиер во претставувањето на програмата, големо внимание посвети на економските политики. Најави намалување на даноците, како и забрзување на приватизацијата. Во однос на промените во здравството, Мицотакис нагласи дека ќе има вработување на 2.000 здравствени работници и истакна дека веднаш ќе почне да се спроведува законот за забрана на пушење на јавни места. Во образованието, приоритет на грчката Влада е вработување на 4.500 наставници по дефектологија, како и укинување на универзитетскиот имунитет според кој полицијата немаше право да интервенира во внатрешноста на факултетите.

Грчкиот премиер вети борба против бирократијата, како и измени во изборниот законик, меѓу кои и можноста за гласање на Грците кои живеат во странство.