Британскиот воен брод „HMS Dragon“ се префрла од источниот Медитеран кон Блискиот Исток, во услови на зголемена загриженост за безбедноста на бродскиот сообраќај низ Ормутскиот теснец.

Од британското Министерство за одбрана соопштија дека ова распоредување ќе овозможи бродот веднаш да се вклучи во евентуална заедничка меѓународна мисија за заштита на слободата на пловидбата низ една од најважните светски поморски рути.

Во соопштението се нагласува дека секоја идна операција би имала исклучиво одбранбен карактер и цел да ја зголеми сигурноста на трговските бродови кои минуваат низ регионот.

Во март, истиот разурнувач беше ангажиран во источниот Медитеран за заштита на британските воздухопловни бази на Кипар, по напад со дрон врз базата RAF Akrotiri.

Петер Маѓар денеска положи заклетва и официјално стана премиер на Унгарија, по изборна победа над долгогодишниот премиер Виктор Орбан.

Маѓар беше избран во парламентот со 140 гласови „за“, 54 „против“ и еден воздржан, во законодавен дом каде неговата партија Тиса има 141 од 199 места.

Орбан не присуствуваше на изборот, откако претходно се повлече од пратеничката функција.

Брзи промени и големи очекувања

По изборната победа, улиците на Будимпешта беа исполнети со прослави, музика и танцување, додека новата власт најавува серија длабоки реформи.

Маѓар доаѓа на функцијата со ветувања за „промена на системот“, борба против корупцијата и зајакнување на демократските институции, по 16 години владеење на Орбан.

Економија под притисок и блокирани европски пари

Унгарија се соочува со економски застој, влошени јавни услуги и потреба од големи реформи.

Еден од клучните приоритети на новиот премиер е отклучување на европските средства, кои се замрзнати поради сомнежи за владеење на правото. Станува збор за околу 10 милијарди евра од фондовите за закрепнување по пандемијата.

Маѓар веќе одржал неформални средби со претставници на Европска Унија во Брисел, надевајќи се на брзо деблокирање на средствата, но од Брисел засега чекаат конкретни реформи.

Планови за длабоки институционални промени

Новиот премиер најави дека ќе се приклучи на европското јавно обвинителство, ќе се бори против корупцијата и ќе ја зајакне независноста на судството и медиумите.

Со силно парламентарно мнозинство, Маѓар има простор за промени, па дури и за уставни измени.

Тој најави и можни потези за промена на највисоките институции во државата, вклучувајќи и функцијата претседател и клучни правосудни позиции, кои ги смета за дел од системот на поранешната власт.

Со ова, Унгарија влегува во период на политичка транзиција, со големи очекувања, но и неизвесност околу брзината и обемот на реформите.

Новата претседателка на Унгарски парламент, Агнеш Форстхофер, денеска најави дека знамето на Европска Унија повторно ќе биде поставено на зградата на парламентот во Будимпешта, по пауза од 12 години.

„Наредувам од денес, по дванаесет години, знамето на Европската Унија повторно да се вее над зградата на унгарскиот парламент“, изјави Форстхофер по изборот на конститутивната седница на парламентот, каде доби поддршка од 193 од вкупно 199 пратеници.

Таа оцени дека ова е „прв симболичен чекор“ кон враќањето на Унгарија кон Европа.

Одлуката доаѓа во период на политички промени во Унгарија, откако проевропскиот конзервативец Петер Маѓар победи на парламентарните избори против долгогодишниот премиер Виктор Орбан.

По изборната победа, улиците на главниот град беа исполнети со прослави, музика и танцување, а очекувањата од новата власт се големи. Маѓар во кампањата вети „промена на режимот“, борба против корупцијата и враќање на демократските стандарди, за кои неговите поддржувачи сметаат дека биле нарушени за време на 16-годишното владеење на Орбан.

Покрај политичките промени, новата власт ќе треба да се справи и со економски проблеми, меѓу кои стагнација на економијата и влошување на јавните услуги.