Свет
Ердоган зборува за докази за поддршката на IS од коалицијата водена од САД

Турскиот претседател Реџеп Тајип Ердоган изјави во вторникот дека поседува докази за поддршката на терористичките групи во соседна Сирија, меѓу нив и на ултрарадикалната сунитска организација Исламска држава (IS) од страна на меѓународната коалиција предводена од САД.
Како што оценува турскиот челник, силите на коалицијата не ги исполнуваат своите обврски во однос на борбата против џихадистичката Исламска држава, којашто ја презема одговорноста за повеќе терористички напади на територијата на Турција, во текот на ова и минатата година, со повеќе десетици жртви, пренесува Reuters.
„Тие не обвинуваа нас за поддршка на Исламската држава. Сега тие ги поддржуваат терористичките групи, меѓу нив и Исламската дражва, YPG (Единици за заштита на народот, милиција на сириските Курди која Анкара ја смета за блиска на забранетата Работничка партија на Курдистан – PKK – з.р.) Ова е многу јасно. Поседуваме докази кои го потврдуваат тоа, вклучително и фотографии и видеа“, изјавил Ердоган во текот на прес-конференцијата во Анкара.
Турција ја смета најголемата курдска партија во Сирија PDS за терористичка организација, која е поврзана со PKK. Групациите Единици за заштита на народот и Женските единици за одбрана, кои се хиерархиски потчинети на Демократскиот сојуз дејствуваат како засебни сили во сирискиот конфликт против исламистичките групации, особено против Исламската држава.
Пред извесно време и сирискиот претседател Башар ал-Асад ги обвини коалицијата и САД за поддршка на џихадистите. Според него, милитантите кои повторно го заземаа градот Палмира успеала повторно да дојдат до него по една година откако беа потисната „или со директна поддршка на Американците, или со нивно премолчено одобрување“./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Украина: Русите употребиле хемиско оружје 888 пати само во мај

Организацијата за забрана на хемиско оружје (OPCW) потврди дека Русија систематски користи хемиско оружје против вооружените сили на Украина. Според податоците од Генералштабот на Украина, објавени од Ukrinform, 888 случаи на руска употреба на хемиски агенси на бојното поле се регистрирани само во мај 2025 година.
Ова го објави на Фејсбук Центарот за стратешки комуникации и безбедност на информациите, коментирајќи го најновиот извештај на OPCW.
„Извештајот потврдува дека Русија систематски користи солзавец, кој е класифициран како контрола на немири, во борбени операции, што е изрично забрането како метод на војување според меѓународното право“, се вели во соопштението.
Овие забранети супстанции се пронајдени во гранати што ги користеле руските сили против украинските бранители.
Ова е веќе трет извештај на ОЗХО што потврдува дека Русија намерно и постојано ја крши Конвенцијата за хемиско оружје.
„Според податоците на Генералштабот, само во мај 2025 година, агресорот употребил опасни хемиски соединенија 888 пати во борбени зони. Со извршување на вакви систематски и целни воени злосторства, Русија се стреми да ги поткопа темелите на меѓународното право“, нагласи Центарот.
Свет
Иран призна дека е направена голема штета на нуклеарните постројки

Министерот за надворешни работи на Иран призна дека нуклеарните постројки на Иран претрпеле „значајна и сериозна“ штета во неодамнешните напади на САД и Израел.
Абас Арагчи изјави за државната телевизија дека Организацијата за атомска енергија на Иран моментално го проценува обемот на уништувањето.
Но, само неколку часа претходно, врховниот лидер ајатолахот Али Хамнеи изјави дека нападите не ја попречиле нуклеарната програма на Иран. Со тоа, тој одговори на изјавата на американскиот претседател Доналд Трамп дека три нуклеарни постројки биле „целосно уништени“ од бомбардирањето. Хамнеи тврди дека нападите не „постигнале ништо значајно“.
Врховниот лидер, кој се крие од почетокот на војната со Израел на 13 јуни, го обвини Трамп дека ги „претерува“ ефектите од бомбардирањето и прогласува победа над САД и Израел. Но, изјавите на Арагчи прикажуваат поинаква слика.
Министерот, исто така, рече дека Иран во моментов нема планови да продолжи со преговорите со САД. Шестата рунда разговори беше договорена, но беше откажана откако Израел ги започна нападите.
„Сакам да разјаснам дека не е постигнат никаков договор, не е договорено никакво решение и не е водена никаква дискусија за започнување нови преговори“, рече тој.
Додаде дека владата разгледува што е во „најдобар интерес на иранскиот народ“ и објави дека нејзиниот дипломатски пристап ќе „преобликува“. Тој не прецизираше што точно мисли.
Свет
Шпанскиот премиер: ЕУ има двојни стандарди кон Израел

Шпанскиот премиер Педро Санчез ја обвини Европската Унија за двојни стандарди поради тоа што не презема конкретни мерки кон Израел, и покрај наодите од извештајот на ЕУ што укажуваат на можни кршења на човековите права во Газа, пишува dw.com.
Санчез рече дека ситуацијата во Појасот Газа е „катастрофална“ и дека Унијата мора да го суспендира Договорот за асоцијација со Израел.
„Имавме 18 пакети санкции против Русија, а Европа не може да суспендира еден договор со Израел“, рече Санчез.
Според локалните власти, израелската воена операција во Газа резултираше со повеќе од 55.000 палестински смртни случаи во последните 18 месеци. Израел ги негира обвиненијата за геноцид, велејќи дека се бори против Хамас, исламистичката милитантна група одговорна за нападот во 2023 година.
Шефицата за европска надворешна политика, Каја Калас, нагласи дека целта на извештајот не е да се казни Израел, туку да се поттикне подобрување на ситуацијата во Газа. Лидерите на ЕУ „го забележаа“ извештајот и најавија дека темата ќе биде повторно разгледана во јули.