Европа
Италија повторно се тресе

Првиот посилен земјотрес во Италија во новата година со магнитуда од 4,1 според Рихтеровата сеизмичка скала е регистриран ноќта кон понеделникот во италијанскиот регион Перуџа, објави Националниот институт за геофизика и вулканологија (Ingvi).
Епицентарот на потресот се наоѓал северно од градот Сполето, на длабочина од 8 километри под површината на земјата. Нема информации за настрадани и оштетувања.
Оваа област во централна Италија од втората половина на изминатата 2016 година беше погоден од три силни земјотреса. Првиот со магнитуда од 6,0 беше регистриран на 24-ти август, кога загинаа 298 луѓе. Ноќта на 26-ти октомври истата област беше потресена од серија подземни удари, од кои најмоќниот беше со магнитуда 5,9. Утрото на 30-ти октомври сеизмолозите регистрираа удар со магнитуда 6,5 кој предизвика уривања во околу сто гратчиња и села во четири италијански региони: Марка, Умбрија, Лацио и Абруцо. Последниот беше најсилниот на Апенините по оној од ноември 1980 година во Кампања.
Сеизмичката активност на Апенинскиот полуостров не прекинува, досега почнувајќи од 24-ти август во Италија се регистрирани неколку илјади потреси, од кои 56 биле со магнитуда поголема од 4,0.
Италија е сеизмички една од најактивните области во светот, особено по должината на планинскиот венец, бидејќи со еден дел се наоѓа на евроазиската а со другиот на африканската тектонска плоча. На италијанските Апенини, кои се протегаат од Лигурија на северозападот па сé до Сицилија на југ, доминираат раседи во Земјината кора, а секој во просек е долг од 10 до 20 килоемтри. Научниците објаснуваат дека сегашната сеизмичка активност со еден вид „растегнување“ на Апенинскиот полуостров од исток кон запад, и укажуваат на тоа дека потресите со различна сила, најверојатно, ќе продолжат.
Според сеизмолозите, лани Италија доживеала нешто што потсетува на низата земјотреси во Клабрија на југот од Италија во 1783 година, кога се забележани пет големи земјотреси со магнитуди од 6,5 или поголеми во два месеца.
Во околината на Асиси, во централна Италија, во 1997 година се случиле три земјотреса. Првиот бил со магнитуда од 6,4 по Рихтер, и во него имало 11 загинати. Следните денови се случил уште еден, а третиот дваесетина дена подоцна. Во меѓувреме во истиот крај се регистрирани многубројни помали потреси.
Според процените, последователните треперења на почвата по земјотресот ќе ги има „барем уште неколку седмици“, но не е возможно да се знае дали во текот на тој период ќе има уште силни потреси./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Песков: Порано или подоцна, Европа ќе мора да одговора

Порано или подоцна, Европа ќе мора повторно да размисли и да одговори на својот народ зошто пумпа оружје во Украина.
Ова го изјави портпаролот на рускиот претседател Дмитриј Песков.
„Порано или подоцна, европските држави и оние кои веќе целосно влегоа во овој конфликт ќе мора да размислат и да одговорат пред својот народ зошто го прават тоа, бидејќи нема да можат да ги избегнат негативните последици“, рече Песков во интервју за новинарот Павло Зарубин, кој видеото го објави на својот канал „Телеграм“.
Тој посочи дека веќе доживуваат негативни економски последици.
„Знаеме дека Германија официјално влезе во рецесија минатата недела и дека инфлацијата постојано надминува 7 проценти“, истакна портпаролот.
Нагласи дека Кремљ верува дека европските земји нема да можат долго да ги објаснуваат своите економски проблеми со постапките на Русија.
„Можно е да се хранат со русофобија, европските власти ги хранат своите граѓани со русофобија, но ќе можат да го сторат тоа до одредено ниво. Тогаш тоа ќе престане да функционира кога нема да останат многу пари во нивните џебови“, рече портпаролот.
Европа
Мајка си ги убила децата, па си пресудила: Соседите во Германија, претпоставуваат дека била очајна

Во неделата на соседите им ја вратила дувалката за лисја. Неколку часа подоцна Габи У.(56) си ги убила двете деца. Суровото злосторство се случило во мирниот град Швибердинген, во областа Лудвигсбург во Германија.
По хорор чинот, аптекарката се упатила кон соседниот град Корнтал-Минхинген и си го одзела животот, пишуваат медиумите во регионот.
Полицијата и јавниот обвинител изјавија: „Според моменталната состојба на истрагата, може да се претпостави дека двете деца биле убиени од нивната мајка во заедничкиот стан во периодот од неделата навечер до понеделникот наутро“.
Прашањето што го поставуваат нивните соседи и познаници е зошто 13-годишниот Полин и 17-годишниот Ролф морале да умрат во поранешната штала за коњи источно од Швибердинген.
Еден сосед за „Билд“, вели: „Сопругот на Габи почина од рак пред три години. Оттогаш таа мора сама да се грижи за децата и имотот од 15 хектари. Можеби тоа беше премногу за неа“.
“Сите сме во шок. Кутри деца! Полина сакаше да јава и беше бистра, како и нејзиниот брат Ролф. Не можеме да си објасниме”, рекол соседот.
Според полицијата, се уште е нејасна позадината на злосторството.
Европа
Фон дер Лајен: Ударните бранови од војната на Путин стигнаа и до Западен Балкан

Претседателката на Европската комисија, Урсула фон дер Лајен, говорејќи на форумот „ГЛОБСЕК“ во Братислава, ја коментираше ситуацијата на Балканот.
Во својот говор посветен на Западен Балкан, таа изјави дека „неодамнешните тензии“ се загрижувачки.
„Неодамнешните тензии секако се загрижувачки. Ги повикувам сите страни да се оградат од конфронтацијата и да преземат мерки за враќање на смиреноста“, изјави Фон дер Лајен.
Претседателката на Европската комисија не прецизираше на кои тензии се однесуваат ваквите зборови.
Во нејзиниот говор, кој најмногу беше посветен на конфликтот во Украина, таа рече дека „шокантните бранови што ги испрати Путиновата војна допреа и до нашите шест партнери од Западен Балкан“.
„ Но, тоа само не зближи“, додаде таа и посочи дека ЕУ ги прошири и на Западен Балкан истите мерки за солидарност што ги презеде во рамките на Унијата.
„Ги поддржавме ранливите домаќинства со високи трошоци за енергија. Градиме нова инфраструктура за да ја намалиме зависноста на Западен Балкан од руските фосилни горива. И оваа практична соработка оди паралелно со напредокот на патот кон ЕУ“, истакна Фон дер Лајен.