Дипломатите од Европа, Кина и Русија ќе разговараат за нов договор со кој на Иран ќе му биде понудена финансиска помош во замена за запирање на развојот на балистички проектили и мешање во политиката во регионот. Ваквата постапка е покрената со надеж дека ќе се спаси нуклеарниот договор од 2015 година, пренесуваат германските медиуми.

Според информациите, претставниците ќе се состанат во Виена следната недела, под водство на високиот дипломат на Европската унија, Хелга Шмид, со цел да разговараат за следните чекори по одлуката на американскиот претседател, Доналд Трамп, за повлекување од нуклеарниот договор со Иран, донесена на 8 мај.

На средбата ќе присуствуваат дипломати од Германија, Франција, Велика Британија, Русија и Кина, но САД нема да имаат свој претставник. Засега не е јасно дали на средбата ќе има ирански претставници.

Според договорот од 2015 година, Иран ја запре својата нуклеарна програма во замена за укинување на повеќе санкции од Западот. Една од главните забелешки на администрацијата на Трамп е дека со договорот не се опфатени иранската ракетна програма и поддршката која земјата ја дава на вооружените групи на Блискиот Исток, кои западните земји ги сметаат за терористи.

Новиот каталонски претседател, Квим Тора, формираше нова каталонска влада што вклучува двајца поранешни министри кои се наоѓаат во затвор и двајца кои се во егзил поради обидот за прогласување на независност на Каталонија.

Поборникот за независнот, Тора, денеска ја објави одлуката за назначување на членови на новата влада, но Мадрид би можел да го блокира процесот. Инаку, претседателот на Каталонија е исто така претседател и на регионалната влада.

Шпанската влада и натаму ја има власта врз оваа покраина, воведена на 27 октомври минатата година поради едностраното прогласување на независност која не заживеа. Властите во Мадрид го доведуваат во прашање именувањето на министри кои во моментов се наоѓаат во затвор или во егзил.

Од 13 советници во регионалната влада, двајца, Жорди Турул и Џозеп Рул, се наоѓаат во затвор недалеку од Мадрид. Покрај тоа, Тони Комин и Луис Пуиг живеат во егзил во Белгија каде што избегаа заедно со поранешниот претседател, Карлес Пучдемон, по падот на регионалната влада.

Турул и Рул на Твитер објавија дека ја прифаќаат должноста. Квим Тора, кој во понеделникот во парламентот на Каталонија беше избран за претседател, беше фаворизиран и од Пучдемон. Инаку, тој и понатаму се смета за легитимен претседател на Каталонија.

Пучдемон во Германија ја чека одлуката на судот за шпанското барање за негова екстрадиција. Шпанија сака да му суди за бунт, заедно со други сепаратисти кои учествуваа во обидот за отцепување.

Рускиот премиер Дмитри Медведев му ги претстави на рускиот претседател Владимир Путин кандидатите за министерски места, а според предлогот, министри за надворешни работи и за одбрана остануваат Сергеј Лавров и Сергеј Шојгу.

Медведев предложил и на местата министер за енергетика, економија и спорт да останат Александар Новак, Максим Орешкин и Павел Колобков, пренесе „Тас“. Александар Коновалов повторно е предложен за министер за правда.

Рускиот премиер предложил и новиот министер за развој на далечниот исток да биде Александар Козлов, актуелен гувернер на провинцијата Амур.

Своите предлози Медведев му ги претстави денеска на рускиот претседател Путин.