Европа
Британското Министерство за одбрана цел на обвинувања за сексуални вознемирувања

60-ина вработени го обвинија британското Министерство за одбрана дека дозволило да процвета токсична атмосфера и машките колеги да ги малтретираат колешките, објави денеска британскиот весник „Гардијан“.
Жените вработени во ова министерство во писмо до своите претпоставени наведуваат дека „секојдневната работа во седиштето на Министерството им го отежнува однесувањето, кое се смета за токсично и несоодветно во јавниот живот, но се толерира во рамките на Министерството за одбрана“.
„Изложени сме на погрдни зборови, жртви сме на несакано внимание и сексуално вознемирување, вклучувајќи наметливи погледи, сексуални коментари и постојани забелешки за нашата облека, изгледот или парфемот“, се наведува во писмото.
Министерството за одбрана соопшти дека прави сѐ за да се реши ова „длабоко загрижувачко прашање“.
Синдикатот ФДА, кој ги застапува директорите на државните служби, повика на итна истрага за овие наводи.
„Приказните за искуствата на овие жени се длабоко вознемирувачки. Секој има право да биде третиран со достоинство и почит на своето работно место“, велат од Синдикатот.
Министерството за одбрана не е првата британска јавна организација што се соочува со вакви обвинувања во последните години, пишува медиумот.
Лондонската полиција, пожарникарите и Парламентот се обвинети дека дозволиле да „процветаат сексистичка култура и акти на морално или сексуално вознемирување“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Идниот германски канцелар за падот на берзите: Драматично е, а може да биде и полошо

Фридрих Мерц, шефот на германската ЦДУ, кој се очекува да ја преземе функцијата германски канцелар, предупреди дека ситуацијата на светските пазари на акции и обврзници може дополнително да се влоши.
„Пазарите се во драматична состојба што се заканува со понатамошна дестабилизација“, рече Мерц во изјава за Ројтерс.
Тој нагласи дека сега „е поважно од кога било, Германија што побрзо да ја врати меѓународната конкурентност“, а ова прашање треба да биде во центарот на коалициските преговори на неговата конзервативна опција со социјалдемократите.
Мерц се залага за пониски даноци, намалување на бирократијата и пониски цени на енергијата.
Утрово, продолжи насилниот пад на светските берзи. Кон средината на минатата недела американскиот претседател Доналд Трамп ги потресе објавувајќи повисоки царини на увозот од очекуваното.
Додека Кина возврати со контрамерки, инвеститорите стравуваат од ескалација на царинската војна, нарушувања во меѓународната трговија, зголемување на инфлацијата и забавување на растот на најголемите економии, па дури и рецесија.
Поради тоа, цените на акциите утринава остро паднаа на азиските берзи, но и на европските.
Европа
Тинејџер избоден до смрт во Лондон, уапсени двајца 16-годишници

Двајца тинејџери се уапсени откако 17-годишник беше избоден до смрт во саботата во западен Лондон.
Полицијата била повикана околу 13.10 часот по пријава за напад со нож на улицата Ерконвалд во Шепердс Буш. На местото на настанот биле пронајдени две млади момчиња со убодни рани.
Еден од нив, 17-годишниот Кеирон Чарлс, починал на лице место, потврди лондонската полиција.
Уште едно 16-годишно момче е пренесено во болница со повреди кои не се опасни по живот. По лекувањето, тој бил отпуштен и уапсен поради сомнение за убиство. Тој моментално е во притвор.
Третиот осомничен, исто така 16-годишен, го напуштил местото на настанот, но бил уапсен вчера рано наутро и исто така е во притвор, соопшти лондонската полиција. Истрагата за убиството е во тек.
Европа
Шефот на НАТО за мировниот договор: Топката е јасно на теренот на Русија

Русија веројатно нема да може да им диктира услови на САД за прекин на огнот во војната во Украина, но руското раководство навистина треба да стори повеќе за „да стави крај на оваа војна“, рече генералниот секретар на НАТО Марк Руте во интервју за „Си-би-ес Њуз“.
Според него, по неодамнешните преговори во Вашингтон, на кои учествуваше пратеникот на Кремљ, Дмитриев, „топката очигледно е на теренот на Русија“.
„Тие не се движат доволно брзо. Мојот впечаток, вклучително и впечатокот што го добивам од моите американски соговорници, е дека Русија навистина треба да направи повеќе за да стави крај на оваа војна“, рече Руте.
Во исто време, тој истакна дека поради американскиот претседател Доналд Трамп „се преселивме од мртва точка“ во однос на војната во Украина.
„И јас сум му благодарен за тоа. Морам да кажам дека сојузниците овде, во последните неколку дена на средби со министрите за надворешни работи, целосно ги поддржуваат напорите на САД да ја доведат оваа војна до праведен и траен крај“, нагласи генералниот секретар на НАТО.
Сепак, Руте не е сигурен дека рускиот претседател Владимир Путин сериозно размислува да стави крај на неговата голема воена агресија против Украина. „Мислам дека ова сега е тест“, заклучи Руте.