Европа
Во Берлин уапсени тројца осомничени за тероризам

Три лица осомничени за поврзаност со ултрарадикалната сунитска организација Исламска држава се уапсени во германската престолнина Берлин во вторникот вечерта, пренесуваат медиумите, наведувајќи ја официјалната потврда на портпаролот на полицијата.
Изведени се претреси на домови и објекти и приведувања на лица, рекол полицискиот портпарол за агенцијата DPA, без наведување поединости.
Интернет страницата на дневниот таблоид Bild добила потврда од портпаролот на обвинителството на Берлин. Најмалку двајца од приведените се жители на Берлин и имале тесни врски со Исламската држава во Сирија и во Ирак, дознава весникот.
Според информациите со коишто располага Bild, берлинското обвинителство води истрага за подготовка на „тешко нарушување“ на безбедноста. Постојат сомневање и дека се подготвувале да заминат на боиштата на Блискиот исток.
Полицијата, меѓутоа, не ја потврдила поврзаноста на притворените со Исламската држава. Докази за конкретни планови за подготовка на терористички напади на територијата на Германија не биле најдени, се додава во извештајот на Bild.
Покрај во нивните живеалишта, претрес бил извршен во џамијата во берлинскиот кварт Моабит, којашто ја посетувал терористот Анис Амри. Имено, непосредно пред терористичкиот напад од 19-ти декември, кој му се припишува на овој Тунижанец, надзорните камери го снимиле во близина на џамијата.
Вечерта на 19-ти декември 2016 година, 24-годишниот Анис Амри со украден шлепер чиј полски возач го убил, влета во толпата на божикниот базар во центарот на западен Берлин и притоа загинаа 12 луѓе а 48 беа повредени.
Германските власти нападот го карактеризираа како терористички чин. Амри, откако успеа да побегне од местото на нападот, по четири дена преку Холандија, Франција стасал во Италија, каде беше застрелан од полицијата во Милано при рутинска контрола на железничката станица кога ранил полицаец.
На почетокот од јануари претставник на сојузното обвинителство на Германија изјави дека досега собраните докази укажуваат на тоа дека Амри бил единствениот извршител на терористичкиот напад за кој одговорноста ја презема Исламската држава./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Зеленски: Русија со дронови ја дестабилизира Европа

Украинскиот претседател Володимир Зеленски ја обвини Русија дека се обидува да ја дестабилизира Европа со користење беспилотни летала за саботажи и немири.
Зеленски, во видео обраќање доцна во вторникот, рече дека Москва ја користи својата таканаречена „флота во сенка“ не само за финансирање на војната со транспорт на нафта со танкери, туку и за саботажи и разни напори за поткопување на стабилноста низ целиот континент.
„Неодамнешните лансирања на беспилотни летала од танкери се еден таков пример“, рече тој, повикувајќи се на разузнавачки информации од украинските надворешни служби.
The Head of Foreign Intelligence reported in detail on how the Russians are utilizing tankers of their “shadow fleet” – not only to finance the war, but also for sabotage and various destabilization attempts in Europe. Recent launches of drones from tankers are one such example.… pic.twitter.com/B09UQo9EZK
— Volodymyr Zelenskyy / Володимир Зеленський (@ZelenskyyUa) October 7, 2025
Официјалните информации за потеклото на беспилотните летала неодамна забележани во земји, вклучувајќи ги Данска и Германија, сè уште не се потврдени.
Русија негираше каква било вмешаност.
Дмитриј Медведев, заменик-шеф на Советот за национална безбедност на Русија, посочи дека самите украински сили би можеле провокативно да користат вакви беспилотни летала за да ја вовлечат Европа во војна против Русија.
Украина, исто така, произведува беспилотни летала со долг дострел.
фото: принтскрин
Европа
Путин: Украинците се повлекуваат на целата фронтова линија

Рускиот претседател Владимир Путин изјави дека руските сили во 2025 година зазеле речиси 5.000 квадратни километри територија во Украина и дека Москва има целосна стратешка иницијатива на бојното поле.
На состанокот со високи воени команданти, Путин рече дека украинските сили се повлекуваат од фронтот во сите сектори.
Тој нагласи дека Киев се обидува да пука длабоко на руска територија, но дека тоа нема да помогне да се промени ситуацијата во војната што трае повеќе од три и пол години.
„Во моментов, руските вооружени сили целосно ја држат стратешката иницијатива“, рече Путин на состанок во северозападна Русија, според Кремљ.
„Оваа година ослободивме речиси 5.000 километри територија, 4.900 километри и 212 населени места.“
Украинските сили, рече тој, „се повлекуваат по линијата на борбен контакт, и покрај обидите за жесток отпор.“
фото: принтскрин
Европа
Мелони: Пријавена сум во Меѓународниот кривичен суд за соучество во геноцид

Италијанската премиерка Џорџа Мелони вчера изјави дека таа и двајца министри се пријавени во Меѓународниот кривичен суд за наводно соучество во геноцид поврзан со израелската офанзива во Газа.
Во интервју за италијанската телевизиска станица РАИ, Мелони рече дека министерот за одбрана Гвидо Кросето и министерот за надворешни работи Антонио Тајани се пријавени во Меѓународниот кривичен суд и рече дека „мисли“ дека тоа се однесува и на Роберто Чинголани, шефот на одбранбената групација Леонардо.
„Верувам дека нема друг случај во светот или во историјата со вакви обвинувања“, рече Мелони.
Таа не прецизираше кој го поднел случајот против неа и министрите.
Меѓународниот кривичен суд истражува, гони и суди лица обвинети за геноцид, воени злосторства и злосторства против човештвото.
Италија беше место на серија демонстрации во изминатата недела, при што стотици илјади луѓе излегоа на улиците во знак на протест против масовните убиства во Газа, а многу демонстранти беа насочени кон Мелони.
Нејзината десничарска влада, во голема мера цврст поддржувач на Израел, неодамна се дистанцира од она што го нарекува „несразмерна“ офанзива во Газа, но не прекина никакви трговски или дипломатски врски, ниту ја призна државата Палестина.
Мелони рече дека е „зачудена“ од обвинувањето за соучество во геноцид бидејќи „секој што ја познава ситуацијата знае дека Италија, на пример, не одобрила нови испораки на оружје во Израел по 7 октомври“.
фото: принтскрин