Европа
Големиот мајстор на Суверениот малтешки ред поднесе оставка по барање на Папата

Еден месец по судирот меѓу Суверениот малтешки ред и Светата столица, Неговото Високопреосвештенство Големиот мајстор фра Метју Фестинг, се согласи да поднесе оставка по барањето на поглаварот на Римокатоличката црква, папата Франциск, соопшти оваа организација во средата.
„Во вторникот попладнето Големиот мајстор беше примен од папата кој побара од него да поднесе оставка. Големиот мајстор се согласи“, истакнуваат малтешкиот ред,
Метју Фестинг кој во принцип е именуван доживотно, уште мора да го собере својот Суверен совет за оставката да биде потврдена.
Фестинг, роден во 1949 година, е Британец, син на Френсис Фестинг кој е фелдмаршал и началник на кралскиот Генералштаб на Велика Британија од 1958 до 1961 година. Големиот мајстор е потомок на припадници на Малтешкиот ред на блажениот Адриан Фортескју, маченик од 1539 година.
Неговото Високопреосвештенство Височество или 79-от Кнез и Голем мајстор на Суверениот воен ред на гостопримливите Свети Јован Ерусалимски, Родос и Малта, како што гласи целата титула на Метју Фестинг, на оваа позиција дојде во 2008 година,
Судирот меѓу Ватикан и Малтешкиот ред, според коментаторите кои ги следат случувањата во Светата столица, претставува судир меѓу црковните либерали и конзервативците.
Тој и буквално се разгоре минатиот месец кога папата Франциск именуваше петчлен совет за да ги испита околностите на сменувањето на третиот ред на Малтешкиот ред, Германецот Албрехт Фрајхер фон Бузелагер, односно главен канцелар на редот од 2014 до 2016 година.
Малтешкиот ред одби да соработува, порачувајќи му на папата дека неговото сменување е интернат работа на организацијата.
Фон Бузелагер наводно е сменет откако дозволи Малтешкиот ред да учествува во програми за делење на бесплатни кондоми со цел да се спречи ширењето на СИДА-та.
Конзервативците велат користењето на кондомите ја крши црковната поук, но аргентинскиот папа Франциск, како и неговиот германски претходник Бенедикт Шеснаесетти, велеа дека неговото користење може да се оправда во контекстот на борбата против ширењето на СИДА-та./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Фото+видео) Опасна бура во Словенија: паѓаше град со големина на јајце, издадено портокалово предупредување

Словенија е погодена од силни бури придружени со силни налети на ветер, поројни дождови и град.
Сообраќајот во земјата е забавен, а Агенцијата за заштита на животната средина издаде портокалово предупредување за целата територија.
Од агенцијата посочуваат дека поради дождот може да дојде до задржување на вода и зголемување на реките.
На објавите на социјалните мрежи се гледа дека паѓал град со големина на јајце.
Според објавите и коментарите, најлошото било околу Шемпетер во долината Савиња.
Како што јавува ТВ Словенија, во текот на вечерта бурата постепено ќе ослабне , најдоцна на истокот од земјата.
Бура пристигнува и во Хрватска
Силна бурна ќелија, која пристигна преку брегот од Италија, се движи кон внатрешноста на Хрватска, придружена со врнежи од дожд, силни налети на ветер и локален град.
Водна пијавица е снимена над морето во близина на Умаг. Се очекува активноста на бурата дополнително да се интензивира во наредните часови.
Управата за заштита на животната средина издаде портокалова тревога за регионите Риека, Карловац и Загреб поради локално можни грмотевици со привремено силни до бурони ветрови, а можна е и појава на град.
Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.