Европа
Качински: Полска е единствената држава во ЕУ која и се спротивставува на Германија

Лидерот на владејачката полска партија „Право и правда“, Јарослав Качински, ја обвинил германската канцеларка Ангела Меркел дека ја сноси вината за Brexit и додал дека Полска е единствената држава во ЕУ која има храброст да и се спротивстави на Германија, пренесуваат светските агенции.
„Германците увидоа дека мораат да се движат напред, да ги интернационализираат долговите, да земат врз себе дополнителен товар. Без тоа може да падне целата ЕУ, а особено Еврозната, што не би било добро за Германија бидејќи има корист од еврото. Подобро да се плати отколку да се ризикува и се да се сруши. Особено поради тоа што веќе се случија доста работи. А Brexit, тоа е заслуга на Ангела Меркел“, рекол Качински.
Шефот на „Право и правда“, од кого зависат важните чекори на владата и шефот на државата иако тој лично е само пратеник, изјавил дека ЕУ на чело на Европскиот совет, и покрај отпорот на осамената Полска го избра Доналд Туск за уште две ипол години, само поради тоа што Германија преку него сака да наметна промена на ЕУ во „Европа во две брзини“.
„Бидејќи падна одлука да биде срушен нашиот отпор, тоа треба да се сфати како промена на концептот на германската политика, јасно изразена во декларацијата од Версај. Меркел, рачунајќи на Туск мора да биде сигурна дека тој ќе поддржи „Европа во две брзини““, рекол Качински.
По големиот дипломатски пораз на Полска на самитот минатата недела во Брисел, бидејќи Варшава беше осамена против преостанатите 27 членки а за Туск гласаа и нејзините најблиску сојузници Чешка, Словачка и Унгарија, кои и се лути на Полска бидејќи поради домашната политика го минира заедничкиот кандидат на Вишеградската група, анкетите покажале голем пад на поддршката на владејачките конзервативци од 36 на 29 проценти.
„Не се сомневаме дека ќе има пад на поддршката во анкетите. Тоа е цената кои свесно ја пресметавме во трошоците. Цената која можеби треба да се плати за Полска да не биде топка која ќе шутираат другите“, рекол Качински, нагласувајќи дека неуспешниот обид да се спречи реизборот на Туск е „капитал за иднината на Полска“.
„Држава која умее да им се спротивстави на сите, меѓу кои и Германија по доста важни прашања, тоа е држава од висок ранг, и тоа доста висок ранг. Можеби никој друг во Европа не би смеел да се осуди да направи нешто слично“, порачал Качински./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.