Европа
Полицијата спречила повторување на нападите врз жените во Келн

Германската полиција во неделата извести дека со прегледот на 650 мажи, повеќето од земјите од северна Африка на новогодишната ноќ спречила да се повторат сексуалните напади и ограбувања на коишто минатата година во Келн беа изложени стотици жени.
Полицијата прегледувала а потоа и привела многу мажи на главната железничка станица кои се движеле кон центарот на Келн.
Пред една година на новогодишната ноќ во Келн главно млади мажи злоставуваа, ограбуваа или силуваа 90 жени, според потврдените податоци на полицијата, а слични случаи масовно имаше и во Хамбург и во Штутгард, но и во други германски и европски градови.
Шефот на келнската полиција Јирген Матиас не кажа колку мажи се пушени во центарот на градот, демантирајќи дека прегледите биле како расно профилирање, Додаде дека многу од приведените лица биле многу агресивни.
„Ова го направивме за да ги спречиме инцидентите како оној од минатата година. Голем дел од групата мажи кои ги прегледавме ја сочинуваа луѓе од кои би можело да се очекуваат кривични дела. Затоа прибегнавме кон ваквиот пристап“, изјави Матиас на прес-конференцијата.
Во новогодишната ноќ во Келн се уапсени 92 лица, меѓу нив 16 германски државјани и 10 Сиријци. Полицијата, исто така, оставила дополнителни надзорни камери на железничката станица.
Многу од осомничените за нападите од пред една година беа жители на земјите од северна Африка и од арапските земји./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП, повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши во сабота, на 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува на погребот да присуствуваат бројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата започна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.