Европа
Берлин не го сменил ставот кон Грција, и предупреди дека отписот на долгот може да ја урне еврозоната
Позицијата на Берлин во однос на должничката криза на Грција не се изменил последните два дена, изјави германската канцеларка Ангела Меркел во четвртокот на прес-конференцијата во Сараево, а истовремено вицеканцеларот и министер за економија и енергетика Зигмар Габриел порача дека доколку долгот на Грција, како што сугерираше Вашингтон, биде безусловно отпишан, еврозоната ќе биде урната.
„Јас ќе повторам, дека за класично кастрење на долгот не може да се зборува, а оваа позиција не е променета од завчера до денеска“, изјави во босанскохерцеговската престолнина канцеларката Ангела Меркел, според прилогот што го емитуваше германската телевизија NTV.
Според Меркел, во 2012 година земјите од еврозоната веќе се занимавале со прашањето на намалувањето на товарот на долговите на Грција до одржливи нивоа. „Ги поместивме роковите за исплата на кредитите на Европскиот механизам за финансиска стабилност (EFSF) до 2020 година. Тоа не беше првпат да се занимаваме со намалување на притисокот од долговите“, додаде канцеларката.
Во февруари 2012 година, под надзор на ЕУ и ММФ, грчките власти спроведоа операција за намалување на долгот преку замена на старите државни обврзници со нови. Така, од активите чии иматели беа приватни доверители беа отпишани 53 отсто. Државните кредитори, пак, не учествуваа во тоа отпишување на долгот кое се процени на 107 милијарди евра, но ги намалија каматните стапки и ги продолжија рокот за доспевање на обврските.
Говорејќи во четвртокот на Техничкиот универзитет во Дрезден, пак, вицеканцеларот Зигмар Габриел рече дека смета оти безусловното отпишување на долговите на Грција нема да ѝ биде од помош, но може неповолно да се одрази врз целата еврозона.
„Верувам дека доколку еврозоната започне безусловно да ги отпишува долговите, нема да ѝ помогнеме на Грција, којашто веќе следниот ден ќе направи нови долгови. Покрај тоа, што ќе им кажеме на Шпанците, Португалците, Естонците Финците…? Еврозоната ќе биде разурната“, рече Габриел пренесе телевизијата n24.
Според Габриел, „треба да се најде компромис, но компромис, веројатно, може да биде постигнат на планот на реформите, коишто според мене мора да во голема мера да се однесуваат на системот на јавната администрација“. Прашањето, пак, за кастрење на социјалната помош, особено предложеното од страна на ММФ зголемување на даноците за лекови, челникот на германските социјалдемократи (SPD) ги нарече „целосно антисоцијални мерки“.
Истовремено „пензискиот систем и јавните служби (во Грција) се крајно неефикасни“, смета Габриел.
„Десет отсто од бруто домашниот производ (БДП) на Грција одат за пензии, а во Германија тоа е само 3 отсто, и тоа веќе не е малку, тоа е едноставно невозможно. Доколку нешто не се промени, ќе биде уште полошо. Се надевам дека седмицава ќе бидеме во можност да најдеме заеднички начин“, додаде германскиот вицеканцелар.
Претходно извршната директорка на Меѓународниот монетарен фонд (ММФ), Кристин Лагард и американскиот министер за финансии Џејкоб Ли, изјавија дека сметаат дека е неопходно ново отпишување на дел од надворешниот долг на Грција, покрај споменатото од 2012 година. Агенцијата Bloomberg потсетува дека приватните доверители тогаш се согласија да отпишат 53,5 отсто од износот на главнината на долгот, а дотогаш на Грција веќе ѝ простија 23 отсто.
Грција по референдумот од 5-ти јули со кој надмоќно беше отфрлен предлогот на меѓународните доверители за нова програма за помош на земјата која предвидуваше и дополнителни мерки за штедење, продолжува со тешките преговори со кредиторите. Земјите од еврозоната побараа од Атина до петок наутро да го претстави новиот план за реформи во замена за продолжувањето на финансирањето на нејзините долгови, а краен рој за постигнување договор е недела.
Меѓутоа, поради недостигот од финансиски средства од Европската централна банка веќе седмица и половина грчките банки се затворени поради немање ликвидност, се врши контрола на движењето на капиталот и е ограничено извлекувањето на готовина на 60 евра дневно од банкоматите. Земјата којашто откако на 30-ти јуни не ги исплати 1,6 милијарди евра од ратите кон ММФ влезе во технички банкрот, може и дефинитивно да банкротира доколку на 20-ти јули не ѝ плати 3,6 милијарди евра рата од заемот од ЕЦБ./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Намалениот број на станови доведе до раст на кириите во Германија
Растат кириите во Германија поради немањето станови во услови на високи градежни трошоци и кредити. Сето тоа го запре градежниот сектор и побарувачката, но и ги намали цените на квадратот, се вели во извештајот на здружението на банките.
Становите во Германија поевтиниле за 4,3 отсто во првиот квартал во однос на истиот период лани, објави здружението на германските банки„Pfandbrief“.
Цените за изнајмување на нови станови се зголемени за 5,6 отсто. Трендот на поскапување на кириите нема да запре, оценуваат од здружението.
„Пазарот за изнајмување станови е под огромен притисок. Побарувачката значително ја надминува понудата“, рече извршниот директор на здружението, Јенс Толкмит.
Трошоците за изградба значително се зголемија во последните години поради повисоките каматни стапки на кредитите и значително повисоките трошоци за работна сила и цените на градежните материјали. Во вакви услови се намали бројот на одобренија за градба, а побарувачката ослабе, што резултираше со пониски цени на становите, смета министерот за финансии.
Според податоците на здружението на банките, цените на недвижностите најмногу паднале во Минхен, за 5,3 отсто.
Во исто време, падот на градежната активност го продлабочува „недостигот“ на станови, зголемувајќи го натамошниот раст на закупнината, кој би можел да продолжи уште некое време.
Здружението оценува дека цените на станбените недвижности треба да се стабилизираат во догледна иднина, за разлика од комерцијалните недвижности, како што се деловните згради и трговските центри.
Цените во тој сегмент паднаа за речиси 10 проценти на годишно ниво и се уште не се гледа „дното“, вели првиот човек на здружението.
Проценките се базираат на податоци за работењето на повеќе од 700 банки кои се активни во финансирањето на недвижен имот, а не на понуди за купување и изнајмување кои служат како основа за Заводот за статистика, забележуваат тие во здружението.
Европа
(Видео) Драма на небото над Трст: забележана несекојдневна појава
Во внатрешноста на заливот Трст, во близина на границата со Словенија, во вторникот попладне се формирал вител.
Италијанските медиуми јавија дека невремето не предизвикало материјална штета, ниту било закана за населението. Интервенцијата на пожарникарите и на пристанишните служби не била потребна.
Waterspout reported in the North Adriatic between the town of Muggia and Koper a few hours ago.
Original video shooting from meteoradar
➡️ https://t.co/SXbq5rbWaj pic.twitter.com/XxRu57Gohs— Alpine-Adriatic Meteorological Society (@aametsoc) May 7, 2024
Италијанската метеоролошка агенција објасни дека ваквите појави не се воопшто ретки и дека се резултат на екстремна нестабилност на атмосферата.
Областа на низок воздушен притисок, која владее со поголемиот дел од Италија, донесе влажни струи во Трстскиот Залив.
„Во овие временски услови, неколку пати годишно може да се појават воздушни вртлози, кои во повеќето случаи се распаѓаат на море“, објаснуваат италијанските метеоролози.
Европа
Венеција заработи огромна сума на пари со наплата на влезници во градот за само 11 дена
Новововедениот билет за туристите на еднодневно патување во Венеција на градот му донесе приход од 975 илјади евра во првите 11 дена од пробниот период.
Билетот, кој првпат беше воведен на 25 април, се наплаќа по стандардна цена од пет евра.
Градот објави дека продал вкупно повеќе од 195.000 билети, што е малку над очекувањата, пренесува Независне новине.
Влезот ќе се наплаќа во повеќето саботи и недели до средината на јули, кога градот ќе ја разгледа цената.
Како општо правило, целодневните посетители помеѓу 8:30 и 16:00 часот се обврзани да платат влезница и да добијат QR код, кој служи како доказ за плаќање. Ако не го сторат, може да платат казна од 300 евра.
Домашните жители, гостите кои преноќуваат, студентите и децата под 14 години се ослободени од плаќање.
Со околу 15 милиони посетители годишно, Венеција е една од најпосетуваните туристички дестинации во светот.
Масовниот туризам му носи многу приходи на градот, но и гужвите создаваат големи проблеми. Не е познато дали Венеција ќе ја задржи таксата по пробниот период.