Договор за зацврстување на режимот на прекин на огнот во зоната на карабашкиот конфликт е постигнат на средбата од состанокот на претседателите на Ерменија и Азербејџан во австриската престолнина Виена со учество на шефовите на дипломатиите на Минската група на ОБСЕ, САД, Русија и Франција, објави ноќта кон вторникот кабинетот на ерменскиот претседател. 

Дека претседателите на Ерменија, Серж Саргсјан, и на Азербејџан, Илхам Алиев, на виенскиот самит кој започна доцна вечерта во понеделникот се согласиле за неопходноста од целосен прекин на непријателствата во Наргорно-Карабах, чие ерменско мнозинство се бори за отцепување од азербејџанската територија, потврдил за агенцијата РИА и рускиот министер за надворешни работи Сергеј Лавров, кој присуствуваше на средбата, заедно со американскиот државен секретар Џон Кери и шефот на француската дипломатија Жан-Марк Ејро.

Саргсјан и Алиев, исто така, се согласиле дека ќе го договорат терминот и местото на следниот нивен состанок во јуни и ќе ѝ овозможат на Организацијата за безбедност и соработка во Европа (ОБСЕ) да состави план за примирјето и набљудувачка мисија во Нагорно-Карабах, додал Лавров.

Според него, „се чувствува желбата од двете страни да биде постигнат договор“, а Русија е подготвена да стори сé што е во нејзина моќ за да биде постигнат задоволувачки договор.

На средбата се разговарало за начините на излез од напнатата ситуација во зоната на карабашкиот конфликт. „Претставниците на земјите копретедатели на Минската група на ОБСЕ ја потврдија неопходноста од зајакнување на примирјето од 1994 и 1995 година“, соопшти кабинетот на Саргсјан.

„Договорено е да се преземат чекори за постојан мониторинг за нивното спроведување, како и наоѓање механизми за истражување на инцидентите, проширување на ингеренциите на канцеларијата на личниот претставник на актуелниот претседател на ОБСЕ, можното продолжување на преговарачкиот процес за решавање на конфликтот“, се наведува во соопштението на ерменското претседателство.

Во преговорите учествувале и претставниците на Минската група за регулирање на нагорно-карабашкиот конфликт, Американецот Џејмс Ворлик, Русинот Игор Попов и Французинот Пјер Андрие.

Од почетокот на судирите на 2-ри април и прогласувањето прекин на огнот на 5-ти април во кои загинаа 110 војници и цивили на двете страни, ова беше прва средба меѓу челниците на Ерменија и на Азербејџан. Досегашниот прекин на огнот овозможи запирање на борбите, но повремените престрелки и гранатирања уште се слушаат, а локалното население тврди дека има и жртви./крај/мф/сн

Извор: Макфакс