Министрите за надворешни и за надворешни работи на Европската унија го поддржаа во понеделникот на заедничкиот состанок во Луксембург планот од 10 точки за итно дејствување како одговор на драматичната ситуација во Средоземјето, каде илјадници имигранти годишно ги губат животите обидувајќи се да дојдат до европските брегови, а во Женева комесарот на Обединетите нации за човекови права обвини дека доселеничката политика на ЕУ е ксенофобична.

Планот на ЕУ го предложија високата претставничка за надворешна и безбедносна политика, Федерика Могерини, и комесарот за миграции и внатрешни работи, Димитрис Аврамопулос. И двајцата доаѓаат од земјите коишто се најизложени на директниот наплив на имигрантите од Северна Африка, Блискиот исток и Азија, односно Италија и Грција, во чиишто територијални води се случуваат и најголемите трагедии кога бегалците со дотраени и импровизирани пловила се обидуваат да стасаат до европското копно.

Могерини и Аврамопулос истакнуваат дека планот во десет точки „бара заеднички напори на европските институции и од сите 28 земји членки“. „Ќе ги испратиме овие предлози до Европскиот совет кој ќе се сретне во четврток на вонредниот состанок поради решавање на ситуацијата во Средоземјето“, се истакнува во заедничкото соопштение на двајцата европски функционери.

Една од можните мерки е можноста за релокација на имигрантите, за да се растоварат земјите коишто се први на ударот на масовниот прилив, како Италија, Грција и Малта. Дел од тие имигранти доброволно би биле прифатени од другите земји во ЕУ.

Како една од среднорочните мерки ќе се разгледува и можноста со потенцијалните баратели на азил да се разговара пред да се качат на бродовите, коишто често ги водат во смрт. Се бара во секој случај солидарност меѓу земјите членки и системски начин да им се помогне на имигрантите.

Од друга страна, комесарот на Обединетите нации за човекови права Зеид Раид ал-Хусеин истакна дека ЕУ би требало кон имигрантите да заземе „пософистициран и смел, помалку бесчувствителен пристап“.

„Европа им го врти грбот на најранливите имигранти во светот и се заканува да го претвори Медитеранот во гробница“, рече ал-Хусеин ден по превртување на бродот во водите близу Либија на кој според претпоставките имало околу 950 лица, од кои околу 250 жени и деца.

„Европската политика кон имигрантите е кусогледа, краткорочна политичка реакција попустлива кон ксенофобичните популистички движења кои го затруа јавното мнение за имиграциското прашање“, обвини ал-Хусеин.

Оцени дека ЕУ треба да создаде легални канали за доселување и да признае дека всушност има потреба од нискоквалификувана работна сила, како и дека бегалците имаат право на азил, а семејствата право на заеднички живот. Токму недостигот од регуларни канали за доселување го создал проблемот со криумчарење на луѓе, што според ал-Хусеин е симптом а не причина на проблемот, и оцени дека ЕУ покажува „голем недостиг од сочувство“.

Комесарот на ОН за човекови права натаму го критикува укинувањето на „смелата“ програма за спасување на море „Маре Нострум“, која е заменета со ограничената програма за контрола на границите „Тритон“. „Престанувањето на спасувањето на имигрантите во неволја не ги намали ниту миграциите ниту криумчарењето на луѓето, туку само предизвика повеќе давења што го покажува неодамнешната трагедија“, смета ал-Хусеин.

Поради спомената трагедија, една од најголемите последните месеци во водите меѓу Либија и Италија, во четврток е свикан итен самит во Брисел, иако на него, како што истакна претседателот на Европскиот совет, Доналд Туск, „не се очекуваат брзи решенија за длабоките причини за имиграциите“, бидејќи доколку имало такви решение „одамна ќе ги применивме“. Се очекува во четврток да се разговара првенствен за зголемување на напорите за спасување на луѓето, како да им се помогне на најпогодените земји и како да се зголеми соработката со земјите на потеклото и транзит на имигрантите./крај/мф/сн

Извор: Макфакс