Европа
Euractiv: Започнува клучната седмица за Комисијата на Јункер
Следните десет дена ќе бидат клучни за тоа каков ќе биде планот на новиот менаџмент со Европската унија (ЕУ), во обид да се ревитализира економијата и да се врати довербата на 500-те милиони жители на Унијата, пишува Euractiv, осврнувајќи се на интервјуата кои следат за кандидатите за еврокомесари, предложени од новиот претседател на Европската комисија (ЕК), Жан-Клод Јункер.
Поранешниот премиер на Луксембург, при презентацијата на својот нов тим, истиот го нарече „политички, а не технократски“, а во овој состав влегуваат неколку поранешни премиери и неколку кариерни бирократи.
Се очекува дека интервјуата во Европскиот парламент (ЕП) ќе бидат особено жестоки за кандидатите од Британија, Франција, Шпанија и Унгарија. Преку контроверзниот избор за клучните улоги, Јункер се надева дека ќе ги надмине спротивставувањата на земјите членки околу европските политики, давајќи им на кандидатите поголема моќ во оние области каде нивните влади не се согласуваат со Брисел.
Преку изборот на Британецот Џонатан Хил за позицијата еврокомесар за финансиски услуги, и на Французинот Пјер Московици за еврокомесар за економски прашања, Јункер сака да го придобие Лондон во поглед на заедничките европски финансики правила, а Париз во поглед на реформите во државното трошење.
Предлозите на Јункер добија поддршка од националните лидери, вклучувајќи ја и германската канцеларка Ангела Меркел , а според бриселските дипломати, номинацијата на Хил била „генијален потег“. Но мнозинството во Европскиот парламент се уште треба да биде убедено од кандидатите дека одлуките на Јункер се оние вистинските.
Euractiv потсетува дека структурата на новата Комисијата на Јункер е направена за да ја сопре лавината од новите европски закони, кои налутија мнозинство европски граѓани, и да се фокусира на неколку приоритети, односно пред се ревитализација на економијата и намалување на невработеноста, а треба да одговори и на растечката поддршка за антиевропските националисти./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.