Членовите на комисијата за граѓански слободи на Европскиот парламент ја повикаа во средата Европската комисија да ги почитува правилата и да донесе привремени мерки за суспендирање на безвизниот режим за државјаните на САД и на Канада, кои не го почитуваат принципот на визен реципроцитет, а некои пратеници дури рекоа дека парламентот и можел ЕК да ја даде на суд поради непочитување на законите.

Во средата Членовите на комисијата за граѓански слободи на Европскиот парламент за ова прашање разговараа со комесарот за внатрешни работи и миграции Димитрис Аврамопулост, кој е надлежен и за прашањата на визите. Пратениците не сакаат да разговараат за можните последици од воведувањето на визите за граѓаните на САД и на Канада и истакнуваат дека постапката е јасна во случаите кога некоја третата земја не ги почитува визните реципроцитети.

Либералната пратеничка од Холандија, Софи Ин’т Велд и нејзината шведска колешка Сесилиа Вистроем, изјавија дека Европскиот парламент би можел да ја даде „Европската комисија на суд“, доколку таа не ги почитува правилата.

Од друга страна, пак, еврокомесарот Аврапомулос смета дека тоа би било „исклучително контрапродуктивно“, и се залага ова прашање да се решава со „стрплива дипломатија“.

Канада бара визи за граѓаните на Бугарија и Романија, а САД за државјаните на Бугарија, Кипар, Полска, Романија и Хрватска. САД неодамна усвоија закон кој би можел да ги погоди и граѓаните од земјите во Шенгенскиот простор кои имаат двојни државјанства.

Според механизмот за визен реципроцитет кој го утврдија европските Парламент и Советот, доколку трета земја не го укине визниот режим во рок од 24 месеци по известувањето за изостанувањето на реципроцитетот, ЕК мора да ја провери состојбата и да предложи привремено укинување на ослободувањето од визите за граѓаните на односните трети земји за период од 12 месеци.

Условите за привременото воведување на визите беа исполнети во април годинава, но Комисијата, на којашто Советот и Парламентот ѝ ги делегираа овластувањата во оваа сфера, одбива да ги примени овие правила.

Аврамопулос тврди дека „стрпливата дипломатија“ наскоро би можела да даде резултати, кога станува збор за Канада, но дека во разговорите со САД нема напредок и дека Вашингтон на суспендирањето на европската страна би можел да одговори со суспензија на безвизниот режим за сите граѓани од ЕУ. Таквиот став, пак, покажува одредено декласирање и дистанцирање од земјите членки за кои САД не ги отстрануваат визите, наспроти солидарноста и единството што Брисел го бара од членките кога станува збор за мигрантските квоти или односите и воведувањето санкции кон трети земји.

„Ќе се обидеме да ги исцрпеме сите преговарачки средства“,рече Аврапомулос, додавајќи дека не би било во интерес на ниедна европска институција ова прашање да се појави пред Судот на ЕУ.

Според американскиот закон, визите се бараат за државјани на оние земји кои маат преку три отсто одбиени барање за издавање визи. Ниедна од петте посочени земји на ЕУ сé уште не ги исполнува тие услови. Процентот за одбивање визи за Бугарија е 17,3 отсто, за Кипар – 3,5, за Полска – 6,4, за Романија – 11,3 и за Хрватска изнесува 5,3 отсто.

„За тие земји да добијат безвизен режим, американскиот Конгрес би морал да го промени законот и значително да го подигне прагот од 3 процента. А сега во Конгресот навистина нема волја за тоа и вие тоа добро го знаете“, им порача Аврпомулос на европските пратеници.

ЕК во април годинава во својата процена за можните последици од воведувањето визи за државјаните на САД и на Канада, истакна дека тоа би имало значителен ефект на надворешно политичките односи на ЕУ со овие две земји и дека најверојатно би имало негативен економски ефект за ЕУ./крај/мф/сн

Извор: Макфакс