Шефовите на државите и владите на земјите членки на Европската унија (ЕУ) во средата во Брисел не постигнаа договор околу именувањето на кандидатите за најважните функции во Европската комисија (ЕК), и оваа одлука ја одложија до наредниот состанок, кој ќе биде одржан кон крајот на август.

Европските лидери не успеале да се договорат за наследникот на високата претставничка на ЕУ за надворешна политика и безбедност, Кетрин Ештон, чиј мандат истекнува во октомври. Преговорите западнале во ќорсокак кога лидерите започнале да разговараат за најсериозниот кандидат за оваа функција, италијанската министерка за надворешни работи Федерика Могерина, навеле анонимни дипломати, пренесува Reuters.

Според белгиските медиуми, главната причина за блокадата биле земјите од источна Европа, бидејќи тие најпрво сакале да видат какви портфолија ќе им бидат назначени на нивните национални еврокомесари, а дури потоа да се гласа за двете најважни функции – високиот претставник за надворешна и безбедносна политика и претседателот на Европскиот совет.

Германската канцеларка Ангела Меркел изјави дека европските лидери на состанокот увиделе дека постои „меѓузависност“ на распределбата на портфолијата на еврокомесарите и двете најважни функции.

Жан-Клод Јункер, новиот претседател на Европската комисија, ја има должноста да ги назначи 27-те еврокомесари, со исклучок на претставникот за надворешна политика и безбедност, за чие назначување мора да има согласност и од ЕК и од Европскиот совет.

Меркел сепак нагласи дека во однос на ова, секоја земја членка има право на сопствено мислење. Европските лидери ќе се состанат кон крајот на август за да се договорат за пакетот на назначувања, а во меѓувреме, секоја земја членка ќе треба да предложи сопствени кандидати.

Меркел исто така потенцираше дека родовата распределба исто така има голема улога, но ги негирала тврдењата дека Германија ќе предложи друг кандидат, потврдувајќи дека конечниот избор на Берлин е сегашниот еврокомесар за енергетика, Гунтер Јотингер.

Откако Јункер ќе предложи распределба на портфолијата, тогаш европските лидери ќе ги изберат кандидатите кои ќе ги наследат Ештон и ван Ромпуј, потенцирала Меркел.

Според германската канцеларка, на состанокот во Брисел една работа била јасна, а тоа дека наследникот на Ештон ќе мора да дојде од редовите на Социјалистите и Демократите (SD). Францускиот претседател Франсоа Оланд исто така го потврдил ова.

„Сепак, во однос на изборот на претседател на Европскиот совет, работите сега се помалку јасни, а тоа мора да биде „личност која ќе може да собере консензус“, изјави Оланд.

Францускиот претседател потврди дека тој го поддржал назначувањето на италијанската министерка за надворешни работи, Федерика Могерини за наследник на Ештон, но призна дека немало консензус околу нејзиното назначување.

„Италијанскиот кандидат ја има мојата поддршка, но бараме заедничко решение“, рече Оланд.

Според Оланд, освен двете најважни функции, на 30 август најверојатно ќе биде назначен и новиот претседател на Еврогрупата./крај/мф/бс