Европа
Француските медиуми поделени околу тоа дали треба да се објавуваат имињата и фотографии на терористите
Во Франција, каде што политичарите и интелектуалците поведоа расправа дали треба да се објавуваат имињата и фотографиите од извршителите на терористичките напади, некои медиуми во средата одлучија дека тоа нема да го прават во иднина.
Дневниот весник Le Monde објави дека повеќе нема да објавува фотографии од извршителите на масакри „за да ги спречи евентуалните последици од нивното величење по смртта“, изјави директорот Жером Феноглио во воведникот.
Иста таква одлука донесе и телевизиската мрежа за целодневно информирање BFM TV, чиј уредник на вестите Ерве Беруд изјави за AFP дека „фотографијата може на исто ниво да ги стави жртвата и терористот“.
И радиото Europe 1 донесе одлука дека повеќе нема да ги објавува имињата на напаѓачите, а католичкиот весник La Croix повеќе нема да ги објавува нивните фотографии и презимињата. Радиото RFI и телевизиската мрежа France 24 одлучија дека во иднина нема да се објавуваат фотографиите, а со „користењето на имињата ќе бидат извонредно претпазливи“.
„Многу сторители се психички нестабилни и медиумската слава на нив делува поттикнувачки. Затоа треба да биде ограничена нивната присутност во медиумите“, оценува психоаналитичарот Фети Бенслама кој го поддржува криењето на идентитетот на напаѓачите.
„Војната против тероризмот се води на медиумски и на психолошки план. Еден од најголемите мотиви за сторителите на нападите е дека ќе станат познати во јавноста и признати од еден нејзин дел. Пред смртта тие оставаат траги и мечтаат за светска слава“, вели Бенслама за AFP.
Ваквото мислење го прифати и дел од француската јавност, петиција со којашто се бара „медиумска анонимност за терористите“ собра до средата 75.000 потписи, една седмица откако беше покрената.
Телото за надзор на медиумите во Франција – CSA, забрзано работи на кодекс на однесување „во аудиовизуелното известување за терористичките напади“.
Во таа расправа „треба, исто така, да се води сметка да не се оди на штета на информирањето“, предупредува Беруд. Така BFM TV и натаму ќе ги објавува имињата на напаѓачите.
Дневниот весник Liberation објави дека сметаат оти „објавувањето на фотографиите на терористите не е исто што и нивно величење. Dabiq (онлајн списанието на Исламската држава) ги глорифицира“.
Агенцијата France-Presse (AFP), пак, смета дека нејзин принцип „и натаму мора да биде информативна вредност на текстот или фотографијата: во овој случај, името и фотографијата на извршителите на нападите се информација којашто не сакаме да им ја ускратиме на 5.000 наши корисници во светот, кои потоа може да одлучат дали ќе ги користат нив“, изјави директорката за информирање Мишел Леридон./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.
Европа
Во Англија извикал „Алах Акбар“ и убил случаен минувач: „Го направив тоа за луѓето од Газа“
45-годишниот Ахмед Алид вчера беше прогласен за виновен за убиство и обид за убиство. На 15 октомври минатата година, барател на азил од Мароко со нож го уби 70-годишниот Теренс Карни во центарот на англискиот град Хартлпул. Тој претходно го избодел со нож својот заспан цимер Џавед Нури додека викал „Алах Акбар“.
Алид и рекол на полицијата дека сето тоа го направил „за луѓето од Газа“. Само осум дена пред да убие случаен минувач и да го рани својот цимер, милитантите на Хамас го нападнаа Израел. Алид се заколнал дека ќе убиел повеќе луѓе доколку имал митралез и друго оружје, изјави обвинителот Џонатан Сендифорд во Судот во Тесајд.
Алид делел куќа со други баратели на азил во североисточна Англија. Тој бил вознемирен што Нури го прифатил христијанството. Цимерите рекле дека Алид почнал да носи нож откако на телевизија видел прилог за настаните во Газа.
Европа
Крим главна цел: Пентагон откри за што Украина ќе ги користи моќните ракети АТАКМС
Министерството за одбрана на САД ја појасни целта за испорака на ракети со долг дострел во Украина, кои неодамна беа испорачани во тајност. Како што објави „Њујорк тајмс“, целта на испораката на американските ракети АТАКМС е да се зголеми притисокот врз Крим, кој беше анектиран од Русија по референдумот во 2014 година.
Крим го претставува центарот во кој се лоцирани голем број руски воздушни и копнени сили и кој досега, како што пишува американскиот дневен весник, „за нив бил релативно безбедно засолниште“. Ова го тврди анонимен американски функционер. Сепак, Пентагон одби да каже колку точно од овие проектили со дострел од 300 километри се испорачани на украинската страна.
Советникот за национална безбедност на Белата куќа, Џејк Саливан, претходно ја потврди испораката на овие ракети без да прецизира дали тие се модифицирани и имаат зголемен дострел.
Украинските сили веќе употребија АТАКМС, што претседателот Володимир Зеленски го потврди на 17 април, објавувајќи дека бил извршен напад врз воздухопловната база Џанкој, која се наоѓа на 165 километри од линијата на фронтот. Министерството за одбрана на Руската Федерација не ги коментираше овие наводи.
Pentagon reveals Ukraine’s targets for ATACMS missiles – NYT — (the usual baffling lack of retaliation threats from #Putin– instead just the usual bleating that ‘it’s impossible to justify’..Bring Stalin back to life please, Russia) https://t.co/8pi0Lx8tbt #CapeTown #SouthAfrica pic.twitter.com/ZtI5cG3r2m
— Peter Mayson (@theforeverman) April 26, 2024
Американскиот дневен весник потсетува дека Украина првпат добила ракети АТАКМС во септември минатата година, но дека станува збор за верзија со половина дострел. Се шпекулираше дека Украина можеби користела американски ракети за да го урне кримскиот мост, што на почетокот на месецов го потврди и самиот претседател Зеленски, велејќи дека неговата влада „навистина сака да го уништи мостот на Крим“.
Тој е симбол на руската окупација и преку овој мост Русија испорачува воена опрема и ги снабдува војниците во Украина. Во неколку наврати досега мостот беше цел на украински напади.
– Мислам дека е вистинското време, а шефот (Бајден) донесе одлука дека е вистинско време да и го обезбеди на Украина оружјето неопходно за тековната борба. Тоа е добро осмислена и многу конструктивна одлука – изјави адмирал Кристофер Грејди, заменик командант на Здружениот генералштаб на американската армија.
Руската страна го осуди потегот на САД, а рускиот амбасадор во Вашингтон Анатолиј Антонов рече дека тоа „ја зголемува заканата за безбедноста на Крим, вклучително и Севастопол и другите руски градови“.