Во својот прв потег откако во понеделникот стана најмладиот премиер во историјата на Грција, Алексис Ципрас го посети спомен обележјето во Кесариани каде што германските нацисти во 1944 година убиле двесте припадници на грчкото движење на отпорот.

Ваквиот потег не мина незабележано во Берлин, како ниту одлуката на Алексис Ципрас, челникот на сега владејачката радикална грчка левица Сириза, неколку часови по посетата на споменикот вo Кесариани да го прими рускиот амбасадор во Атина, како прв странски функционер, два дена откако ја презема премиерската должност.

Малку подоцна во средата агенциите го пренесоа соопштението дека на функцијата министер за финансии е именуван радикалниот академик Јанис Варуфакис, кој мерките за штедење што од Грција ги бара „тројката“ меѓународни кредитори, Европската централна банка, Европската унија и Меѓународниот монетарен фонд во замена за финансиската помош од стотици милијарди евра, своевремено ги нарече „фискален вотербординг“, алудирајќи на злогласниот нехуман метод на испитување кој американската CIA го применувала врз осомничените за тероризам.

Набргу Ципрас повлече уште еден изненадувачки потег, кога го критикуваше соопштението на Европската унија за тоа дека шефовите на дипломатиите на нејзините членки ја предупредуваат Русија на можност од нови поостри санкции поради нејзината наводна улога во разгорувањето на борбите во југоисточна Украина.

Претпоставка на кругови блиски на германската канцеларка Ангела Меркел пред неделните избори беше дека Ципрас ќе оствари тесна победа, оти тешко ќе формира коалиција, и доколку тоа му успее, конфронтацијата набрзо ќе ја замени со компромис. Меѓутоа, наместо тоа, по убедливата победа и брзото формирање на коалицијата до десничарската партија Независни Грци, во првите денови од власта Ципрас сигнализираше дека нема намера да отстапи, што ги вознемирува високите функционери во Берлин од кои некои признаваат дека се шокирани од начинот на кој го започна своето владеење 40-годишниот премиер.

„Нема сомневање, нé изненади леснотијата на победата на Сириза и брзината со којашто Ципрас ја оформи коалицијата“, изјавил за Reuters висок германски функционер кој барал да остане анонимен. Друг политички претставник на Берлин рекол дека изборите на коалициониот партнер што го направил Ципрас и на министерот за финансии „не се добри знаци“, а трет признал дека е „шокиран“ од првите денови од премиерскиот мандат на Ципрас.

Функционери блиски на Меркел велар дека сепак сé уште веруваат оти Ципрас на крајот ќе го промени курсот, ќе ги отфрли радикалната предизборни ветувања и ќе се согласи со економските реформи на коишто се истрајни Берлин и неговите европски партнери и кои досега беа услов Атина да ги добива неопходните транши од пакетот финансиска помош за враќање на долгот во следните месеци./крај/мф/сн

Извор: Макфакс