Баварската Христијанско-социјална унија (CSU) подготвила список со неопходни промени поврзани со доселеничките политики на владејачката Унија CDU/CSU во којашто на Христијанско-демократската унија (CDU) на германската канцеларка Ангела Меркел ќе ѝ ги постават како услов за заедничката предизборна кампања за изборите во 2017 година, како и за поддршка на Меркел за уште еден канцеларски мандат, пишуваат германските медиуми во четвртокот.

Во нацрт изјавата за планираната затворена за јавноста седница на претседателството на CSU во петок и во сабота, од сестринската CDU се бара оддалечување од сегашниот курс во врска со бегалската криза и заострување во многу сегменти од имигрантските политики. На листата со барања, се наоѓаат многу спорни прашања, како забраната за носење облеки кои го прекриваат целото тело и лице кај муслиманските жени, со законот да се дефинира горната граница на бројот бегалци и укинување на двојното државјанство. Сето тоа се мерки коишто CDU досега ги отфрлаше.

„Горната граница на бројот на бегалците коишто доаѓаат во Германија мора да биде ограничена на 200.000 лица. Само така е можно да се зборува за можностите за нивна успешна интеграција во германското општество“, се наведува во документот

Во него CSU, исто така, бара и промени на законот кој би оневозможувал трајна дозвола за престој во Германија. „По престанувањето на причините поради коишто е одобрен азилот, мора доследно да се спроведува враќањето во земјата на потеклото“, се наведува.

CSU, која ја застапува демохристијанската опција во сојузната земја Баварија, додека во остатокот од Германија на изборите излегува CDU, исто така, планира и измени на баварскиот устав и воведување на поимот „водечка култура“ кој би содржел „христијанско дефинирани ставови, обичаи и традиции, како и темелните права на соживот“. „Германија мора да остане Германија“, се заклучува во документот.

Се очекува дека до крајот на годинава, а пред почетокот на изборната 2017 година, ќе се води жестока битка околу насоките на Унијата CDU/CSU во текот на предизборната кампања. Од CSU од самиот почеток на бегалската криза жестоко ја критикуваа политиката на отворени граници за барателите на азил на канцеларката Ангела Меркел, а критиките се интензивираа по серијата напади од новата година во кои беа инволвирани доселеници, а во најмалку два случаи одговорноста ја презема џихадистичката организација Исламска држава.

Сепак, кулминација за политиките на Меркел доживеаја минатата седмица кога евроскептичната и антидоселеничка партија Алтернатива за Германија (AfD) успеа да ја победи CDU токму во изборната единица на и од којашто потекнува канцеларката. Во медиумите одредената како десно-популистичката AfD, противејќи се токму на политиките на сојузната влада во однос на бегалската и мигрантската криза, значително ја зголеми својата популарност меѓу германските избирачи. Но Меркел и на последните локални избори во сојузната покраина Мекленбург – Западно Поморје остана доследна на својата политика кон бегалците олицетворена во слоганот „Ние тоа го можеме“.

Поради тоа се очекува дека CDU ќе се обиде уште повеќе да ги ублажи последиците од политиката на отворени врати за имигрантите на Ангела Меркел, којашто и во рамките на коалицијата со сестринската баварска CSU има многу и жестоки критичари.

Поради падот на популарноста, Ангела Меркел засега одбива да се изјасни дали на следните избори ќе се кандидира како канцелара. Се очекува дека тоа ќе го стори по партискиот конгрес на CDU кон крајот на годинава, кога би требало повторно да се кандидира за двегодишен мандат за претседателка на партијата./крај/мф/сн

Извор: DPA