Откако во средата навечер чешкиот премиер Бохумил Слоботка потврди дека неговата земја поднела приговори на новите заострени санкции на Европската унија против Русија за нејзината наводна улога во кризата во Украина, во четвртокот навечер и словачкиот премиер Роберт Фицо побара ублажување на санкциите коишто Европската комисија ги одредила за Москва.
 

Откако во средата навечер чешкиот премиер Бохумил Слоботка потврди дека неговата земја поднела приговори на новите заострени санкции на Европската унија против Русија за нејзината наводна улога во кризата во Украина, во четвртокот навечер и словачкиот премиер Роберт Фицо побара ублажување на санкциите коишто Европската комисија ги одредила за Москва.

„Бараме да се укинат некои точки од списокот, за да можеме да извезуваме во Русија“, изјави словачкиот премиер Роберт Фицо по состанокот на владата.

Братислава се изјасни против санкциите кои го зафаќаат извозот на артикли за цивилна и потенцијално воена употреба и активностите на словачката филијала на најголемата руска банка „Сбербанк“, рече Фицо и додаде дека неговата земја не сака да го поткопува единството во Европската унија.

Со тоа Фицо му се придружи на својот чешки колега Бохумил Соботка кој во средата се заложи за „промена на условите за санкции“, за тие што помалку да го попречуваат извозот на чешката механичка опрема во Русија.

Словачкиот премиер Роберт Фицо уште во неделата ги критикуваше санкциите на Европската унија против Русија, нарекувајќи ги „бесмислени и контрапродуктивни“ и се закани дека ќе вложи вето на дополнителните мерки, што укажува на внатрешните поделби во ЕУ во врска со ставот кон Москва во врска со украинската криза. „Сметам дека санкциите се бесмислени и контрапродуктивни. Нема смисла да се наметнуваат нови санкции додека не го видиме ефектот од веќе наметнатите санкции“, изјави Фицо еден ден по самитот на ЕУ во Брисел.

Меѓутоа, Фицо, чијашто земја и претходно отворено се спротиставуваше на санкциите против Русија од која зависи поради снабдувањето со природен гас, изјави дека ќе се бори против санкциите кои би нанеле штети на економијата на Словачка. „Го задржувам правото на вето на санкциите кои би нанеле штети на националните интереси на Словачка“, порача во неделата Фицо.

Словачкиот премиер кон средината на август изјави оти смета дека е во најмала рака „чудно однесувањето“ на Украина, којашто како одговор на желбите на Европската унија да и’ помогне, носи одлуки кои би можеле да и’ наштетат на Унијата.

Европските санкции против Русија во врска со украинската криза и руското ембарго на увоз на прехранбени продукти од ЕУ како одговор на Москва, според словачкиот премиер се „заемно бесмислени“, а според него и антируските санкции што ги донесе Украина претставува „бесмисленост од сите три страни“. Според Роберт Фицо, санкциите сите ќе ги ослабат и никому не помагаат, и затоа е неопходно да се бараат поинакви решенија за појавените проблеми. Тој тогаш реагираше со загриженост од украинскиот закон „кој претпоставува да ја запре испораката преку територијата на земјата на руските енергетски ресурси“.

На почетокот од јуни, пак, словачкиот премиер се изјасни и против распоредувањето на територијата на неговата земја единици на НАТО, реагирајќи на предлогот од американскиот претседател Барак Обама кој тогаш престојуваше во посета на полската престолнина Варшава за засиленото воено присуство на САД во источна Европа.

Европската комисија во средата им ги претстави на земјите членки на ЕУ своите предлози за поострите санкции против Русија. досега Брисел одлучи на руските компании да им го ограничи пристапот до пазарите на европскиот капитал, воведе ембарго за продажба на оружје, производи кои можат да имаат двојна намена – цивилна и воена, и ја ограничи продажбата на чувствителна технологија и опрема за нафтениот сектор./крај/мф/сн

Извор: Макфакс