Европа
Италијанците на Амри налетале случајно, Германија здивна
Германскиот државен обвинител Петер Франк потврди во петокот дека лицето убиено во престрелката во северниот италијански град Милано е осомничениот за нападот со камион од 19-ти декември на божикниот базар во германската престолнина Берлина при што смртно настрадаа 12 а уште 48 луѓе беа повредени, 24-годишниот Тунижанец, Анис Амри, на кого италијанската полиција налетала сосема случајно.
И ултрарадикалната сунитска организација Исламска држава, која ја презема одговорноста за нападот во Берлин, потврди во петокот дека Анис Амри бил извршител на нападот и оти е убиен во Италија.
Сепак, истрагата за активностите на Амри ќе продолжи, истакна германскиот државен обвинител Петер Франк. Според него, сега истрагата ќе се насочи на тоа дали Тунижанецот имал соучесници или мрежа од помошници, дали пиштолот од кој е пукано врз италијанскиот полицаец е истиот оној со кој го убил полскиот возач на камионот и на тоа како успеал да побегне од Германија во Италија. „Многу ни е важно да го утврдиме тоа“, рече Франк.
Анис Амри, Тунижанецот осомничен за нападот во Берлин, е убиен во престрелка со полицијата во Милано, објави претходно во петок италијанскиот министер за внатрешни работи Марко Минити. Идентитетот на Амри е потврден без никакви сомневања, рече Минити на прес-конференцијата во министерството.
Осомничениот бил запрен при рутинска контрола на сообраќајот околу три часот утрото во северното миланско предградие Сесто Сан Џовани. Кога полицаецот му ги побарал документите, тој без размислување пукал. Полицијата возвратила и го усмрти. Во престрелката е ранет еден полицаец, но тој е надвор од животна опасност, потврди Минити.
Италијанската полиција немала никакви информации или сознанија дека Амри е во Милано и бил запрен во рутинска контрола покрај железничката станица, рече шефот на миланската полиција Антонио Де Иесу. „Немавме информации дека би можел да биде во Милано. Доколку го претпоставуваме тоа, полицајците ќе беа попретпазливи“, додаде.
Италијанските власти кај мртвиот Амри пронашле билет за воз од францускиот град Шамбери до Милано, каде што пристигнал два часа пред да биде сопрен во близина на железничката станица Сесто Сан Џовани.
Германската полиција го обвини Тунижанецот за нападот откако во кабината од грабнатиот камион најде документи на негово име и отпечатоци од прстите, непосредно до телото на полскиот возач кој бил застрелан во главата. Според претходните сознанија на германските медиуми од полициски извори, Полјакот најверојатно се обидел да го сврти воланот на камионот, на што посочува острото свртување на возилото за да излезе од патеката на којашто ги косел луѓето, а наводно на неговото тело имало и рана од нож.
Германија распиша европска потерница по Амри и вети награда до 100.000 евра за информација којашто ќе доведе до откривање на неговото престојувалиште и апсење. Германскиот министер за внатрешни работи Томас де Мезиер изјави дека чувствува „големо олеснување“ затоа што Амри повеќе не претставува закана за никого. За неговото убивање канцеларката Ангела Меркел, којашто подоцна попладнето во петокот ќе се обрати во јавноста, лично ја известил новиот италијански премиер Паоло Џентилони.
Амри бил поврзан со Италија, каде што допатувал од Тунис и минал четири години во затвор. Во земјата пристигнал во 2011 година како бегалец. На Сицилија бил сместен во прифатен центар за малолетници. Во текот на престојот таму извршил „различни злосторства“, вклучително и предизвикување пожар во центарот, пишуваат италијанските медиуми.
Обвинет бил кога станал полнолетен, па е испратен во затвор, каде што наводно од ситен криминал станал исламистички радикал. Откако ја издражл затворската казна, италијанските власти се обиделе да го вратат во Тунис, но поради проблемите со тамошните власи околу неговото идентификување, а каде бил обвинет за кражби на камиони, на Амри му било овозможено да ја напушти Италија да отпатува на север во Германија.
Во Германија берлинската полиција веќе го истражувала Амри поради сомневања во планирање терористички напад. Имале информации за планови за изведување грабежи за да осигури пари за купување оружје, веројатно за терористички напад. Поради тоа бил следен во Берлин во периодот меѓу март и септември годинава. Меѓутоа, било откриено само дека е сите препродавач на наркотици. Државните обвинители тврдат дека тие информации им биле предадени на надлежните служби, како и дека со тоа завршило нивното следење.
Семејството на Амри, кое целото живее во Тунис, беше повикано на распит во тамошната полиција. Го повикаа да се предаде и му порача дека со нападот ги обесчестил./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Украинците со дронови нападнаа фабрики за алкохол во Русија, објавени снимки
Украински беспилотни летала синоќа нападнаа четири фабрики во регионите Тула, Тамбов и Воронеж во Русија, соопштија руските локални власти.
Руското Министерство за одбрана тврди дека руската воздушна одбрана уништила 11 беспилотни летала над регионот Брјанск, три над регионот Белгород, два над регионот Курск, еден над регионот Тула и еден над регионот Орел.
Во Тамбовската област, украинско беспилотно летало наводно ја запалило дестилеријата Биохим во градот Расказов, според гувернерот Максим Егоров.
Според веб-страницата на Биохим, дестилеријата произведува „производи од стратешко значење за земјата“, особено етанол, растворувач кој често се користи во производството, вклучително и за експлозиви.
Во населбите Ефремов и Лужковски во областа Тула во текот на ноќта биле нападнати уште две дестилерии, изјави гувернерот Дмитриј Миљаев.
💥 Russia: Two alcohol distilleries struck by Ukrainian drones in Tula region – Efremov and Luzhkovsky. pic.twitter.com/y7sPMPfL94
— Igor Sushko (@igorsushko) October 22, 2024
Александар Гушев, гувернерот на регионот Воронеж, тврди дека нападот со дрон предизвикал мал пожар на еден од катовите на индустриското претпријатие. Нема извештаи за жртви.
Украинската војска допрва треба да ги коментира извештаите, кои не можат да бидат независно проверени. Украина започна серија напади врз воздушни бази и други воени објекти во обид да ги ослаби помоќните руски воздушни сили и да ја ограничи способноста на Москва да изврши разорни воздушни напади врз украинските градови.
Европа
Пицерија во Германија доставувала дрога: „Пицата брoj 40 беше една од најпродаваните“
Пицерија со седиште во германскиот град Дизелдорф се најде во центарот на полициската истрага за продажба на дрога.
Според германската полиција, пицеријата испорачувала пици, но и кокаин, кој на менито бил наведен како „пица број 40“. „Тоа беше една од најпродаваните пици“, соопшти германската полиција, пренесува Дојче веле.
36-годишниот сопственик на пицерија фрлил торба полна со дрога низ прозорецот штом полицијата му заѕвонила на врата. Сопственикот немал криминално досие. Два дена по апсењето, тој беше ослободен од затвор и повторно почна да ја нуди „Пицата број 40“, што им помогна на полицајците да идентификуваат други алки во синџирот.
Покрената е акција во која се уапсени 15 лица, од кои тројца се осомничени за набавка на дрога. Запленети се 1,6 килограми кокаин, 400 грама канабис и 268.000 евра во кеш. Во истрагата учествувале 150 полицајци.
Европа
Руските сили ги враќаат изгубените територии: мапите покажуваат дека Украинците ги губат клучните позиции
Руските трупи продолжуваат да ги напаѓаат украинските сили во Курск, а мапите го покажуваат развојот на операцијата на Русија за враќање на изгубената територија два и пол месеци откако Киев ја започна својата офанзива.
Американскиот институт за проучување на војната во неделата соопшти дека географските снимки го покажуваат напредокот на Украина северно од Суџа, град кој Киев го зазеде набргу по пробивањето на слабо одбранетиот руски дел од границата на 6 август.
Минатиот месец, украинскиот претседател Володимир Зеленски рече дека операцијата Курск била „успешна“, иако руските сили истовремено напредувале во украинскиот регион Доњецк.
Киев тврдеше дека зазел околу 1.300 квадратни километри територија. Иако одговорот на Русија се сметаше за бавен, командантот на украинските вооружени сили Олександр Сирски рече дека Москва испратила 50.000 војници во регионот, што ги ослабна нејзините операции во источна Украина.
Мапите објавени од институтот со седиште во Вашингтон покажуваат промени во регионот Курск во текот на изминатата недела, при што една графика од 20 октомври покажува зголемен руски напредок во споредба со ситуацијата на 13 октомври.
Ukrainian forces recently advanced in the western part of the Kursk Oblast salient.
Russian forces advanced west of Kreminna, southeast of Pokrovsk, and southeast of Kurakhove (west of Donetsk City).⬇️ https://t.co/iGwTVBpa8G pic.twitter.com/6hPKGYXN4o
— Institute for the Study of War (@TheStudyofWar) October 22, 2024
Нападите беа насочени кон Суџа и околните области, како и Коренево на северозапад, каде Москва напредуваше и ја врати територијата која претходно беше контролирана од Украина.
Претходната карта ги покажа тврдењата на руски извори дека нивните војници ја зазеле Љубимовка.
Украинскиот телеграмски канал DeepState ја објави својата најнова мапа, на која е прикажан и рускиот напредок во Курск. Тие објавија и снимки од беспилотни летала на кои, како што велат, се гледа како девет членови на 36-та поморска бригада на Украина се борат против руските снајперисти додека се обидуваат да ги евакуираат своите другари кои беа опколени.
Финскиот воен аналитичар, Емил Кастехелми, изјави за Newsweek дека руските трупи најверојатно се побројни од украинските војници, што значи дека Киев „не може да продолжи со ефективни офанзивни операции кои брзо ќе ја прошират областа под контрола“.
– Во својот врв, Украина контролираше површина од приближно 1.200 квадратни километри. Во моментов контролира околу 700 квадратни километри, што значи дека Русите доста успешно ги изведоа своите контранапади – изјави Кастехелми.
Иако Русија мораше да премести војници во Курск, Кастехелми додаде дека „На Украина веројатно и се потребни силите поврзани со операцијата Курск повеќе отколку на Русија“.
Во меѓувреме, Сирски објави на Телеграм дека ги посетил украинските војници во Курск, како и единиците кои дејствуваат во соседниот регион Суми и посочи дека разговарал со командантите на бригадите и помогнал да се реши проблемот.