Конзервативниот претседателски кандидат Анджеј Дуда победил со 53 отсто од гласовите во вториот круг од претседателските избори во Полска, кои се одржаа во неделата, победувајќи го досегашниот претседател и кандидат на десниот центар Бронислав Коморовски, кој се сметаше за фаворит но освоил 47 отсто од гласовите, покажуваат излезните анкети.

Овие резултати ги покажува излезната анкета на истражувачкиот центар IPSOS, според кои одѕивот на гласачите изнесува 56,1 отсто. Анкетата била спроведена на 500 избирачки места. Како што се очекува, официјалните резултати Државната изборна комисија на Полска ќе ги соопшти во понеделник навечер.

Анджеј Дуда, 43-годишниот кандидат на опозициската десна партија Право и правда (PiS), којашто ја води Јарослав Качински, братот близнак на поранешниот претседател Лех Качински кој загина во авионска несреќа кај руски Смоленск.

Веднаш по објавувањето на резултатите од излезните анкети, 62-годишниот Бронислав Коморовски, кој беше поддржан од владејачката партија Граѓанска платформа, кој загуби и во првиот круг на 10-ти мај, го призна поразот и му честиташе на противникот.

Во првиот круг Дуда освои 34,7 а Коморовски 33,7 отсто од гласовите, што претставуваше големо изненадување, бидејќи во сите предизборни анкети актуелниот полски претседател кој дојде на функцијата во 2010 година по трагедијата на Качински, имаше изразена предност. Анкетите пред вториот круг, пак, му даваат предност на Дуда од 2 до 4 отсто од гласовите.

Иако претседателските овластувања се ограничени, сите аналитичари се согласни дека полските претседателски избори ќе влијаат врз предизборната трка за парламентарните избори коишто ќе се одржат есеноска.

Дуда својата кампања на насочи кон социјалните прашања, меѓу другото, ветувајќи дека ќе ја намали старосната граница за пензионирање и дека ќе се бори против нееднаквоста во полското општество. Тие теми привлекоа многу полски гласачи, на коишто им се допаѓаат неговата младост, полетот и енергичноста, а пред неколку ден ја доби и поддршката од синдикатот солидарност.

Оттаму победата на Дуда на претседателските избори значително ќе ги подобри изгледите на челникот на PiS Јарослав Качински повторно да биде именуван за премиер, по осумгодишното владеење на либералната Граѓанска платформа. Качински, поучен со искуството од поразот од Коморовски пред пет години, во предизборната кампања беше многу воздржан и сите карти ги фрли на младиот и динамичен Дуда.

И двајцата кандидати пред вториот круг ја крстосуваа земјата и одржуваа собири до последниот момент од кампањата. Досегашниот претседател повторуваше дека на Полска местото ѝ е во Европската унија и во НАТО, што е гаранција за нејзината безбедност и напредок, додека неговиот ривал зборуваше дека националните интереси му се во прв план и уште еднаш вети дека ќе ја намали возраста за пензионирање од 67 на 65 години и ќе ги намали даноците./крај/мф/сн

Извор: Макфакс