Украинскиот премиер Арсениј Јаценјук побара во четвртокот свикување конференција на меѓународните кредитори за да се отстрани опасноста Украина да не може повеќе да ги враќа своите долгови.
 

Украинскиот премиер Арсениј Јаценјук побара во четвртокот свикување конференција на меѓународните кредитори за да се отстрани опасноста Украина да не може повеќе да ги враќа своите долгови.

Премиерот Арсениј Јаценјук во говорот во Радата, украинскиот парламент, ја истакна решителноста на неговата влада да ги спроведе тешките реформи за да обезбеди милијарди американски долари финансиска помош од западните сојузници. Меѓутоа, на Киев му се потребни странски кредитори кои ќе обезбедат пари, истакна Јаценјук.

„За да преживееме, за да го спречиме банкротот, неопходна ни е меѓународна донаторска конференција, прифаќање на планот за заздравување на Украина на таа конференција и помош од нашите западни партнери“, им порача Јаценјук на украинските парламентарци.

Кризата во Украина избувна по започнувањето на безредијата во ноември 2013 година откако поранешните власти го суспендираа потпишувањето на спогодбата за придружување со ЕУ, која Украина ја потпиша во март 2012 година, а договорија и сеопфатна спогодба за слободна трговија. Брисел сакаше да ги потпише овие договори на самитот Источно партнерство што се одржа на 28-ми и 29-ти на ноември 2013 во Вилнус, меѓутоа претседателот Виктор Јанукович и премиерот Микола Азаров решија привремено да го суспендираат потпишувањето на Спогодбата, правдајќи ја својата одлука со лошата економска состојба на земјата.

Според нив, на Украина тогаш и’ беше потребна помош до 20 милијарди евра, а Јанукович оцени дека тогаш ветените 610 милиони евра од ЕУ условени со потпишување договор со Меѓународниот монетарен фонд (ММФ) беа недоволни за да ги покријат загубите што ќе бидат предизвикани од намалувањето на трговијата со Русија, и недоволни да ја спасат Украина од банкрот. Веќе во декември тогашната украинска влада во Москва потпиша договор со кој од Русија доби заем од 15 милијарди долари од кои првата транша од милијарди долари беше уплатена веднаш, а цената на рускиот гас за украинските потрошувачи беше намалена за третина, на тогашни 260 долари за илјада кубни метри.

Меѓутоа, тоа предизвика револт кај опозицијата која го обвини Виктор Јанукович дека ја свртува Украина кон Русија и ја оддалечува од Европската унија, којашто организираше масовни протести кои завршија со насилна пресметка со власта во којашто загинаа околу стотина лица и опозицијата ја презема власта.

Во четвртокот прозападниот премиер Јаценјук особено се осврна на извештајот на влијателниот финансиски весник Financial Times кој објави дека Меѓународниот монетарен фонд (ММФ) чии претставници оваа седмица го посетија Киев за да преговараат за постојниот план за помош од 17 милијарди долари, открил недостиг во програмата од 15 милијарди долари.

„Следната година, ни се потребни 15 милијарди долари дополнително од програмата на ММФ, тоа не го велиме ние, тоа го кажува Financial Times“, истакна Јаценјук.

Премиерот го опиша пред парламентарците планот на неговата влада за економските реформи, кој вклучува и реформи на даночниот систем, зголемување на цените на енергијата и приватизација на државните компании со цел да се искорени корупцијата којашто, според Јаценјук, ја довело Украина на работ од банкрот.

Украина досега прими две транши од програмата од ММФ во вредност од вкупно 4,6 милијарди долари. Меѓутоа, украинските девизни резерви се на најниското ниво во последните десет години поради враќањето на долгот за гас кон Русија и обидите да се опорави националната валута хривната.

Украинската економија дополнително е оптоварена со воените трошоци за операцијата против одметнатото рускојазично население во југоисточните региони, што предизвика затворање на железарниците и рудниците како и уништувањето на инфраструктурата во Луганск и Донецк, области во коишто порано е остварувана шестина од бруто домашниот производ (БДП) и четвртина од индустриското производство./крај/мф/сн

Извор: Макфакс