Европа
Јункер и Туск му честитаа на Трамп, повикаа на уште позасилена соработка меѓу ЕУ и САД
Стратешкото партнерство помеѓу ЕУ и САД е втемелено во заедничките вредности на слободата, човековите права, демократијата и вербата во пазарната економија, а во изминатите години ЕУ и САД заеднички работеа на тоа да обезбедат мир и напредок за нашите граѓани ширум светот, се вели во заедничката изјава на претседателите на Европската комисија и Европскиот совет, Жан-Клод Јункер и Доналд Туск по повод изборот на републиканскиот кандидат Доналд Трамп за претседател на САД.
„Денес е поважно од било кога да ги засилиме трансатланските односи. Само преку поблиска соработка ЕУ и САД ќе може да продолжат да прават разлика кога се работи за справувањето со предизвиците како што се Даеш (Исламска држава), заканите кон суверенитетот и територијалниот интегритет на Украина, климатските промени и миграцијата“, се вели во изјавата во Јункер и Туск.
„За среќа, стратешкото партнерство меѓу ЕУ и САД е големо и сеопфатно, од нашите заеднички напори да обезбедиме енергетска безбедност и да се справиме со климатските промени, преку соработката меѓу ЕУ и САД во справувањето со заканите по безбедност на источното и јужното соседство на Европа, и до преговорите за ТТИП – не треба да ги намалиме напорите за да нашите врски да останат силни и постојани“, порачуваат европските челници.
„Треба да ги консолидираме мостовите кои ги градевме преку Атлантикот. Европејците веруваат дека Америка, чии демократски идеали секогаш беа зраци на надеж низ светот, ќе продолжиме да инвестираме во нашите партнерства со пријателите и сојузниците, да помогнеме во тоа нашите граѓани и народи ширум светот да се чувствуваат безбедно и просперитетно. Би сакале да ја искористиме оваа прилика да ве поканиме да ја посетите Европа за одржување на ЕУ-САД самит што поскоро“, му порачаа Јункер и Туск на новоизбраниот американски претседател./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.