Британскиот премиер Дејвид Камерон се обиде да ја смири вознемиреноста и отвореното противење во редовите на својата Конзервативна партија поради ветувањата дека доколку биде одбиена на референдумот од 18-ти септември независноста на Шкотска, ќе ѝ даде поголеми овластувања на оваа членка на Обединетото Кралство, што само нагласува колку проблеми ќе имаат Шкотите да го добијат она што го посакуваат и што им беше ветено од челниците на трите водечки британски унионистички партии доколку ја отфрлат идејата за отцепување.

Британскиот премиер Дејвид Камерон во понеделникот ја повика рупата незадоволни парламентарци во својата вила во близина на Лондон за да ги сослуша нивните забелешки и да види како може да ги одоброволи. Еден од присутните, Џејмс Вартон, пред состанокот изјави дека Камерон мора да ја ублажи загриженоста поради тоа што новите овластувања за Шкотска би можеле да му наштетат на остатокот од Велика Британија. „Мора да се стори нешто и за Англија, мора да се најде решение за Англија. Иако Англија е најголемата британска држава, единствено неа не ѝ се сѐ уште дадени никакви самостојни овластувања“, рече Вартон.Овој итен состанок според британските аналитичари укажува на предизвиците со кои се соочува британската политичка традиционална елита кога се обврза на Шкотска да ѝ даде поголеми овластувања. Два дена пред референдумот кога анкетите покажаа дека унионистите ја загубиле предноста од јули од 26 отсто а кампањата на поддржувачите на отцепувањето на Шкотска дури благо мина во водство, челниците на трите водечки традиционални унионистички партии се согласија да се дадат проширени нови овластувања на Шкотска доколку нејзините граѓани изгласаат да останат во рамките на унијата долга 307 години, и тоа по прашањата на даноците, социјалната грижа и буџетската потрошувачка, како и да се продолжи со спроведувањето на одредбата според којашто Шкотска ќе добие многу повеќе средства од британскиот буџет по глава на жител отколку другите земји во Велика Британија.Сето тоа на мнозинството Англичани им пречи, а незадоволниците, меѓу другото, бараат „англиски гласови за англиски права“, односно прекинување на досегашната практика според којашто неанглиските парламентарни пратеници можат да гласат за прашањата поврзани со Англија, но не и обратно. Таквите дијалози предизвикаа гнев меѓу шкотските приврзаници на самостојноста, па Шкотската национална партија (SNP) во понеделникот го постави прашањето дали шкотскиот буџет е заштитен или британските политичари планираат „грабеж на парите“.Алекс Салмонд, шкотскиот премиер и лидер на шкотските поборници на независноста кои доживеаја неуспех на референдумот од четвртокот, во неделата го обвини британскиот премиер Дејвид Камерон и другите британски политичари унионисти дека со измама ги придобиле мнозинството Шкоти да ја отфрлат независноста со лажни ветувања за гарантирани дополнителни овластувања. „Мислам дека ветувањето всушност е измислица изродена од очајот последните денови од кампањата и мислам дека во Шкотска сега тоа сите го сфаќаат“, изјави Алекс Салмонд коментирајќи го ветувањата за проширување на автономијата на Шкотска доколку ја отфрли независноста, што британскиот премиер Дејвид Камерон и другите функционери од сите три традиционални унионистички партии во Велика Британија ги искажуваа последните два дена пред одржувањето на референдумот на 18-ти септември.„Токму оние коишто беа уверени да гласаат против (на референдум), кои се изманипулирани, сега навистина се гневни“, изјави за BBC Салмонд, кој по поразот на неговата кампања за излегување на Шкотска од рамките на Велика Британија најави заминување од челната позиција во Шкотската национална партија (SNP), главниот заговорник на шкотската независност.Затоа на Камерон, кој не сака да остане запаметен како политичар кој на Шкотите им дал ветување а потоа не го исполнил, и на другите унионистички челници им преостанува уште многу малку време, бидејќи до ноември мораат да си обезбедат внатрешнопартиска поддршка за договорите околу шкотска и пота да ги состават во пишана форма до крајот на јануари, доколку сакаат да го исполнат ветеното. Имајќи предвид дека парламентарните избори ќе се одржат во мај 2015 година, тоа значи дека на сегашниот состав на парламентот не му останува многу време да го постигне договорот кој ќе го спроведе изборниот победник, кој и да биде./крај/мф/сн

Извор: Reuters