Рускиот министер за надворешни работи Сергеј Лавров во понеделникот на 28-то заседание на Советот за човекови права на Обединетите нации во Женева убиството на поранешниот руски висок функционер а подоцна опозициски настроен критичар на политиките на Кремљ, Борис Немцов, го нарече „гнасно злосторство“ и изјави дека истрагата за неговата ликвидација којашто треба да ги изведе пред лицето на правдата нејзините организатори и извршители ја води лично претседателот Владимир Путин.
 

Рускиот министер за надворешни работи Сергеј Лавров во понеделникот на 28-то заседание на Советот за човекови права на Обединетите нации во Женева убиството на поранешниот руски висок функционер а подоцна опозициски настроен критичар на политиките на Кремљ, Борис Немцов, го нарече „гнасно злосторство“ и изјави дека истрагата за неговата ликвидација којашто треба да ги изведе пред лицето на правдата нејзините организатори и извршители ја води лично претседателот Владимир Путин.

Шефот на руската дипломатија Сергеј Лавров, меѓутоа, порача дека убиството на опозиционерот Борис Немцов извршено ноќта кон саботата недалеку од Кремљ, не смее да се користи за собирање политички поени.

„Обидот ова гнасно убиство на Борис Немцов да се искористи за политички цели претставува сквернавење. Мораме да го спречиме секое политизирање на прашањето на човековите права и не смееме да дозволиме да се искористи како оружје за подгревање на судири“, порача Лавров.

Претходно Лавров имаше средба зад затворени врати, од која сé уште двете страни не издадоа соопштение, со американскиот државен секретар Џон Кери кој пред да допатува во Женева изјави дека Белата куќа „се надева дека (руските) власти ќе спроведат веродостојна и транспарентна истрага којашто ќе открие кој стои зад убиството и кој го извршил“.

Односите меѓу САД и Русија се влошуваат откако претседателот Владимир Путин во 2012 година се врати во Кремљ, а сега се на најниското ниво од крајот на идеолошката Студена војна, во прв ред поради војната во Украина за што меѓусебни се обвинуваат Вашингтон и Москва.

Лавров на споменатиот форум на ОН, како што беше најавено, се осврна на состојбата во Украина и го повика Киев да се одгради од екстремистите во источниот дел од земјата, како и да продолжи да го следи патот на мировните договори. Постигнат е „опиплив напредок“ во примената на мерките договорени во Минск и прекинот на огнот е „консолидиран“, оцени рускиот дипломат.

Лавров в Женева од Киев побара да ја укине „де факто блокадата“ на одметнатиот регион Донбас, да ги обнови економските врски меѓу остатокот од Украина и рускојазичните источни региони, да започне да ги исплаќа социјалните давање и да ги врати банкарските услуги како и слободата на движењето од Донбас во другите делови од Украина.

Претходно во понеделникот истражната комисија на ОН за човекови права во Украина објави дека според нејзините процени од почетокот на насилствата во април 2014 година загинале повеќе од 6.000 луѓе. Во извештајот се истакнуваат „немилосрдните разорување на цивилите и инфраструктурата, а жените, децата и старците и чувствителните групи особено се погодени“.

„Императив дека сите страни ги почитуваат одлуките од договорот од Минкс и да се прекинат бомбардирањата и другите непријателства кои создадоа катастрофална ситуација за цивилите, флагрантно кршејќи ги хуманитарните закони и човековите права“ изјави високиот комесар на ОН за човекови прав, Зеид Раад а-Хусеин./крај/мф/сн

Извор: Макфакс