Европа
Медиуми: Ердоган ѝ се заканил на Европа дека ќе ја преплави со имигранти

Турскиот претседател Реџеп Тајип Ердоган ланскиот ноември се заканил дека Европа ќе ја преплави со имигранти, доколку челниците на Европската унија не му понудат подобар договор за да помогнат во управувањето на блискоисточната бегалска криза, пренесува Reuters повикувајќи се на пишувањето од понеделникот на грчкиот информативниот портал euro2day.gr.
Објавувајќи го записникот од многу напнатиот разговор од ланскиот ноември, грчкиот портал открива длабока меѓусебна недоверба и нетрпеливост на разговорите меѓу турскиот претседател Реџеп Тајип Ердоган и двајца високи европски функционери, претседателот на Европската комисија Жан-Клод Јункер и претседателот на Европскиот совет, Доналд Туск.
„Можеме да ги отвориме вратите кон Грција и Бугарија кога и да е, и да ги натовариме бегалците во автобуси (…) И како ќе излезете на крај со бегалците без договор? Ќе ги убиете?“, ги цитира порталот реторичките зборови на Ердоган кои се наоѓаат во преписката од записникот на споменатиот состанок. Според истиот извор, Ердоган од ЕУ побарал 6 милијарди евра во текот на двегодишен период, а кога Јункер рекол дека во понудата е само половина од износот, му одговорил дека и онака на Турција парите не ѝ се потребни. Едроган, исто така, често прекинувајќи ги европските функционери укажувал дека неговата земја веќе потрошила 8 милијарди евра за бегалските кампови. Порталот пишува дека Ердоган побарал вкупно 30 милијарди евра од Европската унија за решение на проблемот со бегалците, заканувајќи се дека на друг начин ќе ги испрати во Европа. Турскиот челник рекол наводно дека со автобуси ќе ги испраќа бегалците во Грција и во Сирија, и оти ќе ги остави бегалците со деца да тонат во крајбрежјето.
ЕУ на крајот договори фонд од помош од три милијарди евра за подобрување на прифаќањата на бегалците во Турција. Во вжештената расправа, според наводите во документот, Ердоган често го прекинувал Јункер, поранешниот премиер на Луксембург, и Туск, поранешен полски премиер, обвинувајќи ги дека ЕУ ја измамила Турција, и обвинувајќи го Јункер за неубаво однесува кон него лично. Ердоган, според наводите на euro2day.gr, рекол дека би требало да покаже повеќе почитување кон земја од 80 милиони жители, како и дека „Луксембург е само обично гратче во Турција“.
Порталот забележува дека станува збор за шокантен дијалог, во кој според неименувани соговорници Ердоган се однесувал арогантно, без отстапки, така што средбата завршила без договор. Барајќи повеќе средства, Ердоган забележал и дека Грција добила помош од 400 милијарди евра од Европа.
„Треба да се истакне дека овој инцидент, кој јасно ги покажува позициите на Турција, бил сокриен од ЕУ. Земјите членки не биле точно информирани, вклучително и грчкиот премиер, кој престојуваше во официјална посета на Турција следниот ден“, наведува грчкиот портал.
Брисел во меѓувреме повторува дека приливот на имигрантите од Турција значително не се намалил од самитот на двете страни во Анкара во ноември, кога беше и договорена помошта за Турција за згрижување на имигрантите.
Се истакнува во материјалот и дека Советот на министри на ЕУ за намерно одложување на објавување на извештајот за напредокот во процесот на интеграцијата на Турција во ЕУ, по барање на самиот Ердоган, да му помогне да победи на изборите.
Споменатата средба на којашто не се избирале зборови најверојатно е одржан на 16-ти ноември во турска Анталија, веднаш по самитот на Г20, тврди грчкиот портал./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски: Подготвени сме да купиме 10 системи „Патриот“, само треба да најдеме средства

Украина работи на обезбедување испорака на десет системи за воздушна одбрана „Патриот“, а исто така е важно системите веднаш да пристигнат со ракетите, изјави украинскиот претседател Володимир Зеленски, како што објави УНН.
„Имаме барање за десет системи. Ова го кажав јавно. Моментно работиме со партнери за да ги обезбедиме овие десет. Исто така, работиме на прашањето за ракетите, ги имаме“, рече Зеленски.
Украинскиот претседател додаде и дека САД ќе ѝ продадат системи „Патриот“ на Украина. Украина мора да најде средства за сите десет системи.
„Трамп, претседателот на САД, ќе ни ги пренесе системите, ќе ни ги продаде. Наша задача е да најдеме пари за сите десет системи. Би сакале веднаш да имаме пакет ракети за секој систем“, истакна претседателот.
Тој исто така истакна дека Германија моментно ја потврдила испораката на два система „Патриот“, а Норвешка – еден.
„Официјално добив потврда од Германија за два система, од Норвешка – еден. Сега работиме со холандски партнери“, додаде Зеленски.
Фото: принтскрин
Европа
(Видео) Макрон тужи американска конзервативка, која тврди дека Брижит е маж

Францускиот претседател Емануел Макрон и неговата сопруга Брижит поднесоа тужба против Американката Кандис Овенс поради тврдење дека првата дама на Франција е, всушност, маж.
Тужбата е поднесена во американската држава Делавер и содржи 22 точки од обвинението, а двојката бара парична отштета за клевета и отштета.
Кандис е конзервативна авторка, водителка, политички коментатор и активистка. Таа е позната по својата активна поддршка на Трамп за време на неговиот последен мандат. Сепак, неодамна јавно се дистанцира од него. Таа постојано изјавуваше дека тој ја разочарал и дека сега „се срами што некогаш го поддржувала“. Таа ги критикува неговите политички потези и го обвини дека ги предаде принципите што тој вети дека ќе ги брани.
Според адвокатот на Макрон, Том Клер, францускиот претседател и неговата сопруга повеќе од една година безуспешно се обидуваат да ја спречат Овенс, која шири теории на заговор за Брижит на социјалните медиуми и на „Јутјуб“.
Во март оваа година Овенс објави видео со наслов „Дали првата дама на Франција е маж?“, кое беше масовно споделувано на платформата „Икс“. Во него таа тврдеше дека тоа е „најголемиот политички скандал во историјата“.
Потоа таа продолжила да објавува содржини за Брижит вклучувајќи серија видеа наречени „Станувајќи Брижит“. Таа исто така продавала маички со слогани што ја промовираат теоријата, според тужбата. Емануел и Брижит тврдат дека Овенс била повеќе пати замолувана да престане да ги изнесува овие тврдења и ѝ дале докази дека Брижит е родена како жена по име Брижит Троње, дека не е во роднинска врска со Емануел Макрон и дека тие не се под никакво влијание, како што инсинуира Овенс.
„Ова не е само политички удар. Ова е лично. И двајцата се човечки суштества, имаат брак, семејства и чувства. И ова ги засега“, изјави адвокатот Клер за Си-ен-ен.
Во тужбата се тврди дека Макрон и неговата сопруга претрпеле сериозни штети – нивната приватност, углед и деловните можности биле нарушени. „Секојпат кога ќе ја напуштат куќата, тие знаат дека многу луѓе веруваат во овие лаги. Тоа е понижувачки, инвазивно и, едноставно, неправедно“, се вели во документот.
Овенс сè уште продолжува
Кога дознала за тужбата, Овенс се појавила на „Јутјуб“. Таа објавила видео, во кое, меѓу другото, рекла дека е подготвена да ја добие оваа војна. „Мажот Брижит очигледно има многу храброст“, рекла таа.
Таа исто така објави фотографија од двојката Макрон на „Инстаграм“ со порака: „Денес ќе ја земам оваа перика. Останете со мене“. Подоцна, на „Јутјуб“ изјави дека тужбата е „очаен обид да се спаси нејзиниот имиџ“.
Брижит Макрон се соочила со слични обвинувања и претходно – во 2022 година таа тужеше две жени во Франција, кои ширеа слични дезинформации. Првично ја доби пресудата, но случајот сега е вратен на повисок суд.
Фото: принтскрин
Европа
(Видео) Се урна патнички авион во Русија

Авион „ан-24“ на „Ангара ерлајнс“, со најмалку 40 патници, се урна во руската област Амур, на далечниот исток од земјата.
Остатоците од патничкиот авион се пронајдени на 15 километри од Тинда, планираната дестинација. SHOT објаснува дека хеликоптерот за пребарување не можел да слета во близина на местото на несреќата, па затоа спасувачите ќе мора да стигнат таму пеш.
✈️🚨 Passenger plane crashes in Russia’s Amur region — over 40 people on board
A Soviet-made Antonov An-24 aircraft operated by Angara Airlines disappeared from radar near the town of Tynda while attempting a second landing approach. Emergency crews later found the burning… pic.twitter.com/MOO08NTbEP
— NEXTA (@nexta_tv) July 24, 2025
„РИА новости“, повикувајќи се на извори, пишува дека, според прелиминарните податоци, нема преживеани.
Гувернерот на регионот, Василиј Орлов, изјави дека, според прелиминарните податоци, во авионот имало 43 патници, меѓу кои пет деца и шест члена на екипажот.
Министерството за вонредни ситуации го процени бројот на луѓе во авионот малку помал, на 40-ина.
Фото: принтскрин