Европа
Меркел: Москва не ги исполни очекувањата за Украина
Германската канцеларка Ангела Меркел оценува дека Русија не ги задоволила доволно очекувањата за намалувањето на тензиите во Украина, изјави во средата во Берлин, нејзиниот портпарол Штефан Зајберт.
„Очекувањата досега не се исполнети“, и за тоа ќе се расправа на европскиот самит во Брисел подоцна во средата, изјавил на прес-конференција Зајберт. Според различни дипломатски извори, нови економски европски санкции против Русија се многу можни под притисок на САД, но исто така некои дипломати сметаат дека во средата навечер европските челници нема да постигнат единство за заострување на насочените санкции на ЕУ против рускиот економски и финансиски сектор. Германската канцеларка Ангела Меркел во вторникот разговараше со украинскиот претседател Петро Порошенко кој ја известил дека тешкото вооружување од Русија дошло во рацете на проруските бунтовници во источна Украина, како и дека наводно имало сé повеќе дека нападите врз украинските сили се изведуваат од руска територија. „Меркел е разочара од тоа што и покрај сите напори на контактната група (во којашто се претставници на Украина, Русија и Организацијата за безбедност и соработка во Европа – ОБСЕ) се уште не ги започнале преговорите со сепаратисти“, додаде Зајберт. Германската канцеларка, исто така, сметала дека проруските бунтовници немале волја за сериозни разговори за билатерален прекин на огнот. Порошенко ја повикува Русија да влијае врз бунтовниците во југоисточните украински региони и така да придонесе за смирување на ситуацијата. Москва, којашто негира дека нејзината граница е порозна и пред две седмици понуди контроли од руска територија на граничните премини во кои ќе учествуваат набљудувачи на ОБСЕ и украински погранични службеници, признава дека има делумно влијание врз нив но смета дека станува збор за внатрешен украински конфликт кој треба да се реши низ дијалог меѓу сите политички субјекти и јазично-етнички заедници во земјата. Можно е самитот на ЕУ во средата навечер да заврши со нови санкции против Русија и проруските бунтовници, изјавил за AFP дипломатски извори во Брисел. Тие санкции предвидуваат замрзнување на програмите што во Русија ги спроведуваат Европската инвестициска банка и Европската банка за обнова и развој. Но постојат и размислувања дека најмалку една третина од 28-те земји во ЕУ се противат на економските санкции против Москва, стравувајќи од последици по нивните економии./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на Телеграм соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети најверојатно биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, била и инфраструктурата и станбените области. На фотографиите што ги објави Синехубов на Телеграм, се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата Телеграм.
Ројтерс сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.