Европа
Меркел поради бегалците ги подели конзервативците, страв од крајната десница
Одлуката на германската канцеларка Ангела Меркел да им дозволи на илјадниците бегалци блокирани во Унгарија да влезат во Германија, предизвика во неделата поделби во нејзината конзервативна коалиција, а баварските сојузници ја обвинија дека на остатокот од Европа ѝ испратила „сосема погрешна порака“, додека безбедносните служби стравуваат од појава на „тероризам од крајната десница“.
Незадоволството меѓу германските конзервативци избувна откако Австрија и Германија се согласија привремено да ги отворат своите граници за десетиците илјади бегалци, огромен дел од нив од Сирија, кои влегуваат од Унгарија, чија конзервативна влада не може и не сака да се соочи со тој притисок.
Германија очекува оваа година 800.000 мигранти и бегалци, далеку најмногу во Европската унија, додека некои функционери сметаат дека таа бројка ќе надмине милион. Само во август во Германија се регистрирани повеќе од 100.000 баратели на азил.
Баварскиот министер за внатрешни работи, Јоаким Херман, член на Христијанско-социјалната унија (CSU), сестринска партија на Христијанско-демократската унија (CDU) на Ангела Меркел, ја обвини канцеларката дека се „залетала без да ги консултира германските сојузни држави, кои мораат да се соочуваат со тие одлуки“.
Баварскиот премиер Хорст Зехофер, како и другите челници на CSU, која владее со децении во Баварија, се согласија во телеконференција дека одлуката на Меркел е погрешна. Зехофер предупреди дека Германија не може да ги земе речиси сите бегалци кои доаѓаат во Европа.
„Не постои општество коешто би можело да се носи со нешто такво. На сојузната влада ѝ е потребен план“, рече Зехофер. Тоа прашање тој има намера да го постави на состанокот на коалицијата CDU/CSU на високо ниво, кој започна во неделата вечерта.
Германските социјалдемократи од SPD, помалиот партнер во ткн големата коалиција на Меркел, застанаа, пак, во нејзина одбрана. Генералниот секретар на партијата, Јасмин Фахими, ја оцени нејзината одлука како „единствена исправна работа којашто можела да се стори“.
Во меѓувреме, челникот на германската разузнавачка служба изјави дека стравува од појавата на „тероризам на десницата“ во Германија, каде радикалните групи постојано протестираат против масовниот прилив на бегалци.
Кампањата против бегалците која ја водат малите крајно десни партии како NDP или Der Dritte Weg, би можеле „да ја доведат германската крајна десница до уште поголема радикализација“, изрази загриженост во разговорот за весникот Der Tagesspieleg, Ханс-Георг Маасен, директор на Бирото за заштита на уставот (BND).
„Во оваа атмосфера не можеме да го исклучиме формирањето на групи од крајната десница подготвени да извршат терористички акти. Глобално, крајната десница губи во налетот, но делот на насилните припадници расте а во последно време изнесува околу 50 отсто“, вели Маасен.
„Во првата половина од 2015 година актите на насилства поврзани со крајната десница пораснале истовремено со бројот на азилантите. Не се забележува промена на тенденцијата во втората половина од 2015-та“, вели челникот на германското разузнавање./крај/мф/сн
Извор: Reuters/AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.