Европа
Најмалку 40 имигранти ги загубија животите на Средоземјето
Најмалку 40 имигранти ги загубија животите во водите на Средоземното Море кога во бродот со кој се превезувале продрела вода заробувајќи ги во товарниот дел, објави во саботата италијанската воена морнарица.
Се верува дека жртвите се задушиле вдишувајќи ја пареата од горивото кога водата навлегла во потпалубата, изјави Масимо Тоци, капетан на спасувачкиот брод. Додаде дека неговите луѓе кога се качиле на бродот со бегалците, пронашле безживотни тела „во водата, горивото и фекалии“.
На бродот за спасување „Cigala Fulgosi“, во водите јужно од островот Лампедуза, биле префрлени повеќе од 300 преживеани, меѓу кои и многу жени и деца. Според сознанијата, на бродот имало вкупно околу 400 имигранти, а бил откриен на 21 наутичка милја од брегот на Либија.
„Новата денешна трагедија нема да биде последна, доколку не се реши проблемот во Либија“, изјави италијанскиот министер за внатрешни работи Анџелино Алфано, коментирајќи ја последната трагедија на бегалците.
Повикувајќи ја уште еднаш меѓународната заедница да се фати во костец со овој проблем, Алфано предочи дека во текот на првите седум месеци од годинава во Италија дошле 103.000 имигранти и бегалци, наспроти само илјада помалку за целата мината година.
Средоземјето стана најопасната маршрута за имигранти кои бегаат пред војната и сиромаштијата во Северна Африка и на Блискиот исток. Повеќе од две илјади луѓе починаа само досега во 2015 година во обидот да дојдат до Европа, наспроти 3.279 жртви во текот на целата 2014 година, според податоците на Меѓународната организација за миграции./крај/мф/сн
Извор: Ansa
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.