Двајцата осомничени за убиството на рускиот опозициски политичар Борис Немцов биле припадници на злосторничка организација и извршители на повеќе криминални дела, објави во саботата Истражниот комитет на Руската Федерација.

Претходно во саботата наутро директорот на руската Федерална служба за безбедност (ФСБ), Александар Бортников, за новинарите изјави дека се приведени две лица осомничени за убиството на 55-годишниот политичар Борис Немцов, извршено малку пред полноќ на 27-ми февруари, додека со својата партнерка, 23-годишниот украински модел Ана Дурицка се шетал по Големиот мост преку реката Москва, недалеку од Црвениот плоштад и Кремљ. Еден од најпознатите опоненти на рускиот претседател Владимир Путин, беше застрелан со четири куршуми во грбот, што предизвика жесток осуди и во светот и во самата Русија, вклучително и од самиот Путин, кој ликвидацијата на Немцов ја нарече „политичко“ и „срамно“ убиство.

Според Бортников, во врска со убиството на Немцов се уапсени Анзор Губашев и Заур Дадаев, кои потекнуваат од подрачјето на немирниот Кавказ, каде што се активни радикални исламистички групи. Една од варијантите кои ги разгледуваа руските истражни органи беа радикални мотиви во врска со изјавите на Немцов, кој инаку по потекло е Евреин, околу терористичките исламистички напади во Париз од јануари и конфликтот во источна Украина, како и за нарачана ликвидација.

Од своја страна адвокатот на убиениот Немцов, Вадим Прохоров изјави дека се’ уште не бил известен за имињата на уапсените лица во врска со убиството на неговиот клиент, пренесува РИА Новости.

„Во рамките на истрагата за убиството на Борис Немцов, иследниците од Истражниот комитет, заедно со оперативците на ФСБ и Министерството за внатрешни работи ги уапсија осомничените Анзор Губашев и Заур Дадаев“, потврдил за агенцијата ТАСС портпаролот на Истражниот комитет, Владимир Маркин без да соопшти за возраста на приведените и други детали од нивното апсење.

„Според сознанијата на истрагата, двајцата биле припадници на организирана група и учествувале во извршувања убиства“, додал Маркин.

Од партијата РПР-Паранас, чиј соосновач беше убиениот Немцов, во саботата изјавија дека главна задача на истрагата е да ги пронајде нарачателите на убиството на опозицискиот политичар.

Еден од челниците на оваа партија, Илја Јашин, во врска со информациите за апсењето на двајцата осомничени во писмената изјава за медиумите како императив за истрагата истакна дека мора да бидат откриени нарачателите на убиството на неговиот соработник,

„Крајно важно е делото да не биде ограничено само на притворените како жртвени јарци, дали се тоа вистинските убијци или не. Клучниот предизвик, пак, е да се утврдат и уапсат нарачателите“, порача Јашин./крај/мф/сн

Извор: Макфакс