Приврзаниците на украинската националистичка партија Свобода, којашто обвинува за фалсификување на резултатите од неделните предвремени парламентарни избори, протестираа во четвртокот пред зградата на Централна изборна комисија во Киев.
 

Приврзаниците на украинската националистичка партија Свобода, којашто обвинува за фалсификување на резултатите од неделните предвремени парламентарни избори, протестираа во четвртокот пред зградата на Централна изборна комисија во Киев.

Во неделата во Украина беа одржани вонредните парламентарни избори, со кои треба да се заокружи смената на власта откако во февруари со масовните протести и безредија во Киев беше сменет претседателот Виктор Јанукович а неговата дотогаш владејачка Партија на регионите се поделени на неколку субјекти. Беа избирани 198 пратеници според мнозинскиот систем од ткн едномандатни окрузи и 225 пратеници од партиските листи на кои партиите требаше да го минат изборниот праг од 5 отсто од гласовите.

Според прелиминарните податоци на изборната комисија, кандидатите на Свобода водат во шест окрузи кои даваат еден пратеник, меѓутоа според гласањето за партиските листи националистите не влегуваат во Врховната Рада (парламентот). Излезните анкети, пак, покажуваа дека Свобода освоила малку повеќе од 5 отсто од гласовите, според што го минала изборниот праг.

Украинската милиција (официјалниот назив за полицијата кој наскоро треба да биде сменет) соопшти дека во заградата на Централната изборна комисија влегле околу 300 луѓе, партиски активисти кои носеле партиски обележја, а пред зградата поставиле разглас од кој биле испраќани пораките на партиските челници. Украинските медиуми јавија дека зградата е обезбедувана од силни единици коишто биле донесени со 30 автобуси.

Пратеникот од редовите на Свобода, Игор Мирошниченко, изјави дека приврзаниците на партијата дошле пред изборната комисија „за да го заштитат гласот на секој Украинец“. „Ќе се бориме за секој глас… Партијата не се грижи за тоа дека нема да биде во парламентот. Свобода е таа политичка сила која знае како се води уличната борба. И некои од нашите браќа кои влегоа во Радата, ќе ги бранат интересите на партија“, изјави Миронишченко пред почетокот на протестот и додаде дека не е трагедија тоа што партијата не влегува во парламентот според изборите по партиските листи.

„Во некои окружни и регионални избирачки комисии забележавме разлики во записниците. На истокот, во Луганската и Донецката област беше вештачки зголемен одѕивот на гласачите со полнење на кутиите на некои избирачки меса. Се согласивме со претседателот на Централната изборна комисија дека пред утврдувањето на резултатите од изборите до 10-ти ноември сите записници што ќе ги достави Свобода ќе бидат споредени со записниците на Окружните изборни комисии, а доколку нема совпаѓање со протоколите во ЦИК ќе пребројува“, изјави за медиумите претставникот на правната комисија на Свобода, Олег Бондарчук

Претходно во четвртокот челникот на Сеукраинското обединување „Свобода“, Олег Тјагнибок, изјави дека според паралелното пребројување на гласовите, партијата го надминала прагот за влез во парламентот. Истакна дека партијата ќе ги обжали резултатите пред судовите.

Партијата Свобода по шести пат учествува на парламентарните избори а досега само еднаш успеа да го надмине изборниот праг на изборите според пропорционалниот модел, во 2012 година. Во резолуцијата на Европскиот парламент од 13-ти декември 2012 година, откако партијата влезе во украинската Рада, беа осудени ставовиве на Свобода кои се во спротивност со основните вредности и принципи на ЕУ, а демократските партии беа повикани да не соработуваат со партијата. Меѓутоа, по предизвиканата промена на власта во февруари 2014 година партијата влезе во владејачката прозападна коалиција којшто подоцна се распадна./крај/мф/сн

Извор: Макфакс