Унгарскиот министер за надворешни работи Петер Сијарто изразил жалење бидејќи тој бил единствениот претставник на ЕУ кој се сретнал со рускиот министер за надворешни работи Сергеј Лавров на маргините на Генералното собрание на ОН оваа недела, пишуваат медиумите.

Според него, Европската Унија треба да ја искористи секоја можност за дијалог со Русија.

„Жал ми е што јас бев единствениот од ЕУ што разговарав со него, бидејќи ако повеќе наши колеги разговараа со Лавров, тоа може да помогне во решавањето на конфликтот или барем сигурно нема да ги намали шансите за конфликт. И сега мислам дека во овие околности треба да ја искористиме секоја можност“, изјавил Сијарто за РИА Новости.

Тој посочил дека е во постојан контакт со Лавров.

„Затоа што сметам дека разговорот и дијалогот мора да продолжат, особено во сегашните услови, кога тензиите растат, а опасноста од ескалација на војната, за жал, е реална. Ако не разговараме меѓу себе, ќе предизвикаме уште посериозна штета“, изјавил Сијарто.

Унгарскиот министер оценил дека „ако нема дијалог меѓу Западот и Русија, меѓу Европа и Русија, тогаш сè може да оди уште полошо отколку што беше порано, а тоа треба да се избегне“.

Германскиот канцелар Олаф Шолц денеска во својата неделна порака до граѓаните истакна дека Русија нема да победи во војната во Украина и дека има „други боишта“ на кои меѓународната заедница мора да се фокусира, пред се гладот, што е голема опасност.

Зборувајќи за ситуацијата во Германија, Шолц рече дека Берлин донел далекусежни одлуки во однос на снабдувањето со енергија и дека ќе помине добро во наредниот период, јавуваат медиумите во регионот.

„Гледаме ужасни слики од руската војна против Украина. Ги слушаме вестите за уништување и смрт. Знаеме дека Русија нема да победи во оваа војна“, нагласи Шолц.

Тој посочил дека има и многу други боишта.

Во таа насока, подвлекол дека гладот ​​е голема опасност, напоменувајќи ги Африка, Јужна Америка и Азија.

Додал дека е направено се за да се обезбеди извоз на жито од Украина.

„Исто така, се води битка околу прашањето како да се обезбеди снабдување со енергија во Европа. Донесовме далекусежни одлуки во Германија за да обезбедиме снабдување со електрична енергија, гас и топлинска енергија. Денеска можеме да кажеме дека ќе поминеме добро во наредниот период“, подвлече Шолц.

Тој рече дека нова задача за Владата е цената на струјата, гасот и другите енергенси.

„Тие цени се превисоки и мора да се намалат. Владата ќе се погрижи за тоа. Формиравме комисија и разговараме со сите што увезуваат гас во Европа и Германија“, рече Шолц.
Нагласи дека и во наредниот период ќе има натамошни предизвици и во оваа насока истакна дека е важно да се спроведат пакети мерки за растеретување на товарот на граѓаните.

Германскиот канцелар  патува на Блискиот Исток на дводневна турнеја со намера да склучи нови договори за снабдување со енергија и да воспостави нови сојузи во услови на глобални економски и геополитички превирања предизвикани од војната во Украина.

Претседателот на Русија, Владимир Путин, потпиша пакет измени на Кривичниот законик поврзани со воената служба, пишуваат руските агенции.

Со пакетот измени се воведува нов член „Разбојништво“. За ова дело ќе биде предвидена затворска казна од шест до 15 години, пренесува РИА.

Друг нов член е „Доброволно предавање“ – за ова ќе следат од три до десет години. Но, доколку војникот, кој првпат извршил вакво кривично дело, презел мерки за негово ослободување, се вратил на должноста и не извршил други кривични дела додека бил во заробеништво, тогаш може да биде ослободен од одговорност, јавува агенцијата.

Според написите, дезертерство или непојавување на воен рок ќе се казни со затвор од пет до десет години. Покрај тоа, воениот персонал кој е во резерва и е повикан на воена обука ќе ја има истата одговорност како и војниците со договор.

Дополнително, се заоструваат мерките за одговорност за неизвршување на воени наредби, одбивање на едно лице да учествува во непријателства, отпор кон шефот на воената служба, прекршување на правилата за служба, губење на воен имот, пренесува „Телеграф“.

Според агенциите, за повеќекратно прекршување на условите на договорот, казната е од четири до осум години затвор, а ако задачата не се изврши или штетата е најмалку пет милиони рубли казната е од пет до десет години.