Не постои никаков руски воен конвој кој наводно ја преминал украинската границата, изјави во петокот навечер портпаролот на руското министерство за одбрана, генерал-мајорот Игор Конашенков, по медиумските написи дека новинари виделе како ноќта кон петокот колона од 23 рускиот оклопни возила влегла на територијата на Украина, а Киев во петокот попладнето тврдеше дека украинската артилерија „уништила значаен дел“ од неа.

Претседателот на Украина Петро Порошенко во петокот изјави дека „значителен дел“ од воената техника, којашто според тврдењата на украинските власти ја минала руско-украинската граница во текот на претходната ноќ, била уништена. Претходно западните медиуми објавија дека конвој од 23 борбени оклопни возила, цистерни со гориво и автомобили со придружба со руски ознаки наводно ја минала границата со Украина во близина на граничниот премин „Изварино“. Пограничната служба на Федералната служба за безбедност на Руската Федерација соопшти дека информациите за премин на војници или воена опрема на територијата на Украина од руска територија не се вистинити, и дека моторизирани патроли по должината на границата постојат, но исклучиво на руската страна.„Министерството за одбрана на Русија ги демантира информациите за наводно ‘уништување’ од страна на украинската армија на ‘руска воена колона’, којашто наводно претходно ја преминала руско-украинската граница“, се наведува во соопштението на руското министерство за одбрана што го цитира РИА Новости.„Никаков руски воен конвој, кој наводно ја минал руско-украинската граница, ниту ноќе ниту дење – не постои. И ќе биде најдобро доколку украинската армија уништила дух, а не бегалци или свои војници“, изјави портпаролот на руската одрана, генерал-мајорот Игор Конашенков околу информациите коишто предизвикаа бура од остри реакции на Европската унија и на НАТО на адреса на Москва. Министрите за надворешни работи на земјите членки на Европската унија побараа во петокот навечер од Русија „веднаш да ги прекине сите форми на непријателство“ на границата со Украина, на вонредната седница посветена на ирачката и на украинската криза.Генералниот секретар на НАТО, Андерс фог Расмусен, претходно во петокот изјави дека „ноќта се случил руски упад“ во Украина, но одби да го карактеризира како инвазија. НАТО претходно во петокот соопшти дека ги испитува наводите на два британски весници дека колона од 23 руски оклопни возила ја минале границата со Украина ноќта кон петокот.„Ваквите изјави коишто се базирани на некаква фантазија, или поточно врз претпоставки на новинари, не треба да се предмет на сериозна дискусија од страна на високи претставниците на која и да е земја“, се истакнува во соопштението на руското министерство за одбрана.„Тажно е што причината за силните изјави од високи нивоа во низа европски и држави кои ‘го избрале европскиот пат’ не се основани на факти, туку на новинарски патки и тоа раширени преку социјалните мрежи’, додаде портпаролот Конашенков. Според него, воопшто нема да претставува изненадување доколку по повеќе часови од информацијата за наводното уништување на руската воена колона, украинската страна покаже снимки на изгорена сопствена воена техника./крај/мф/сн

Извор: Макфакс