САД сакаат да доминираат со светот, особено наметнувајќи им го својот став за украинската криза на Европејците, изјави во средата министерот за надворешни работи на Руската Федерација, Сергеј Лавров, повторно отфрлајќи ги обвинувањата на Киев дека Москва испратила свои војници и оружје во одметнатите рускојазични региони на југоистокот од Украина.

„САД се одлучија за конфронтација и сакаат да доминираат со светот. Говорот на американскиот претседател Барак Обама покажува дека во центарот на американската филозофија е само едно – ’ние сме број еден, и целиот свето тоа мора да го признае’“, изјави на прес-конференцијата во средата во Москва шефот на руската дипломатија Сергеј Лавров, коментирајќи го говорот за состојбата на нацијата на американскиот челник во вторникот навечер во Конгресот.

Аргументирајќи ја својата изјава, Лавров потсети дека Вашингтон во неколку наврати се фалел дека „им ги наметнал“ на своите европски партнери економските санкции против Русија којашто Западот, во прв ред САД, ја обвинуваат дека воено ги поддржува одметнатите рускојазични региони во југоисточна Украина.

Лавров повтори дека Западот не нуди никакви докази за руска вмешаност во судирите меѓу силите на прозападните власти во Киев и проруските бунтовници на истокот, за што Москва ги обвинува властите во Киев. „Секогаш велам: доколку нешто тврдите со таква увереност, покажете ги доказите. Меѓутоа, никој не може да покаже докази, или тоа не го сака“, рече Лавров.

„Оттаму, пред да барате од нас нешто од престанеме да го правиме, ве молам да ги презентирате доказите дека тоа го правиме“, порача Лавров.

Но истовремено шефот на руската дипломатија го обвини Западот дека ја снабдува Украина со оружје преку земји членки на НАТО и ЕУ спротивно на прописите на Европската унија и Организацијата за безбедност и соработка во Европа (ОБСЕ).

„Претседателот Путин во неколку наврати дека таму покрај советското, руско оружје во Украина, повеќе нема, додека сé уште некои украински соседи од земјите на НАТО и ЕУ не почнаа да доставуваат оружје“, рече Лавров.

„Сметаме дека доставувањето на оружје во зоните на конфликтот е во спротивност со прописите и кодексите и на Европската унија и на ОБСЕ“, истакна Лавров.

Шефот на руската дипломатија призна дека рускојазичните бунтовници под своја контрола имаат поголема територија отколку што било предвидено со мировниот договор од почетокот на ланскиот септември постигнат во белоруската престолнина Минск, но истакна дека добил убедувања од челниците на бунтовници дека се подготвени да се повлечат на демаркационата линија договорена во Минск.

Бунтовниците своите акции ги оправдаа со обвинувањата дека украинската армија довела нови сили на боиштето и дека не се придржувала до договорот од Минск во кој според една од 12-те точки тешкото вооружување требаше да биде повлечено од двете страни во широчина од 30 километри од линијата на раздвојувањето. Киев, пак ги обвинува дека заземале 500 квадратни километри територија од договореното.

Лавров, исто така, повтори дека судирите во источна Украина треба да се решат во согласност со територијалниот интегритет на Украина, но со поголема автономија за двата региони каде што огромно мнозинство се припадниците на руската и рускојазичната заедница. Овие региони откако ланскиот февруари власта во Киев ја преземаа прозападните сили со безредијата со кој го соборија дотогашниот претседател Виктор Јанукович, и поништувањето на законот за јазиците со кој рускиот го загуби статусот на службен а новите киевски власти именуваа нови регионални челници, организираа референдуми на кои самопрогласија ткн Народни републики во двата главни центра Донецк и Луганск.

Лавров на прес-конференцијата се осврна и на претстојното одбележување на 70-годишнината на ослободувањето на нацистичкиот германски логор Аушвиц на 27-ми јануари, порачувајќи дека рускиот претседател Владимир Путин нема да присуствува на тоа одбележување бидејќи „не добил официјална покана“.

„Немаше официјална покана упатена за рускиот претседател. Дојде писмо од директорот на музејот Аушвиц упатено до рускиот амбасадор во Полска со најавата на свеченоста и прашањето дали сакаме да учествуваме и кој да учествува. Покана од тој тип не предвидува задолжителен одговор“, изјави Лавров./крај/мф/сн

Извор: РИА Новости