Европа
Русија против дополнителни услови за Иран

Русија инсистирала на Иран да не му бидат поставувани дополнителни услови на последната рунда од преговорите со групата П5 + 1 во Виена, со цел да се постигне договор за спорната нуклеарна програма на Техеран.
Исто така Русија смета дека конечниот документ не треба да претставува преседан за воведување силни контроли од страна на другите земји, истакнал за Итар – Тасс дипломатски извор, припадник на една од западните делегации.
Ова е одговор на изјавата на шефот на француската дипломатија, Лорен Фабиус, кој претходно истакнал дека постојат разлики во пристапот помеѓу Русија и западните земји вклучени во одлучувачката финална рунда преговори со Иран.
„Иако до сега групата П5 + 1 (САД, Британија, Франција, Германија, Кина и Русија) имаше хомоген став, последните денови претставниците во преговорите изнесоа повеќе различни пристапи“, рекол Фабиус.
Дипломатскиот извор за руската агенција тврди дека руската делегација не сака конечниот договор да содржи барања кои ги пречекоруваат верификационите процедури на Меѓународната агенција за атомска енергија.
Исто така, Русија смета дека доколку Иран го исполни дополнителниот протокол од Договорот за нуклеарно разоружување нема потреба од дополнителни мерки и обврски. По однос на ова прашање, Западот има поостар став.
Москва, исто така, порачала дека решението за сите спорни прашања кои се однесуваат на Иран, не треба да претставува преседан во системот кој би довел до построги мерки и барања во однос на другите земји и сето тоа мотивирано од некои политички цели./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Шефот на руската војска: Напредуваме на сите фронтови

Руските сили напредуваат во речиси сите правци во конфликтните зони во Украина, изјави вчера началникот на рускиот Генералштаб Валериј Герасимов.
Најинтензивните борби се водат кон Красноармејск, изјави Герасимов на состанокот со воените команданти во борбената зона.
Според него, руската западна армија развива офанзива во близина на Купјанск, а напредувањето успешно се одвива во насока на Краснолиман, каде, како што тврди, „градот Кировск ќе падне под руска контрола“.
Руските војници влегоа во селото Јампол, каде што продолжуваат со борбените операции, а непријателот, според него, е целосно протеран од шумските области на Серебрјанск.
„Напаѓачките единици на јужната група напредуваат во селото Северни. На правецот Александро-Калиновски се водат борби во близина на Константиновка, нашите единици влегоа во Плешчеевка. Уништувањето на непријателот блокиран јужно од резервоарот Клебан-Бик продолжува“, рече Герасимов.
Тој додаде и дека групата Восток ја развива својата офанзива во регионите Дњепропетровск и Запорожје.
Конечно, тој им додели награди на војниците кои, според руските тврдења, се истакнале за време на борбените операции.
фото: принтскрин
Европа
Гранатирање кај најголемата нуклеарна централа во Европа, се крева црн чад; МААЕ издаде предупредување

Меѓународната агенција за атомска енергија (МААЕ) извести за ново гранатирање во близина на нуклеарната централа „Запорожје“, најголемиот таков објект во Европа под руска окупација, објавува „Киев индипендент“.
„Она што некогаш беше практично незамисливо – гранатирање или друга воена активност што се одвива во близина на големите нуклеарни објекти – стана редовна појава за време на оваа ужасна војна“, рече генералниот директор на МААЕ, Рафаел Гроси.
Набљудувачите на МААЕ на теренот видоа „црн чад што се издигаше од три блиски локации“ по гранатирањето. Раководството на централата, кое беше формирано од Русија, ѝ соопшти на агенцијата дека артилериските гранати паднале на речиси 400 метри од складиштето за дизел-гориво, што се наоѓа надвор од самата централа.
Агенцијата не ја припиша одговорноста на ниедна страна, иако Москва ја обвини Украина за нападот.
Нуклеарната централа Запорожје, која се наоѓа во окупираниот град Енергодар, произведуваше околу 20 % од електричната енергија на Украина пред руската инвазија. Руските сили ја окупираа во март 2022 година.
МААЕ со месеци предупредува за сериозните ризици од нуклеарна несреќа велејќи дека Русија ја користи централата за да изврши притисок врз Украина и нејзините меѓународни партнери. Според извештаите, московските сили стационирале војници и опрема во објектот и редовно го гранатираат околното подрачје.
Русија тврди дека електраната е нејзина сопственост како дел од нелегалната анексија на Запорошката област и наводно гради нови далноводи за да ја поврзе со сопствената енергетска мрежа.
фото: принтскрин
Европа
Главниот осомничен за исчезнувањето на Медлин Мекен излезе од затвор

Главниот осомничен за исчезнувањето на Медлин Мекен е ослободен од германски затвор, каде што издржувал казна за неповрзано кривично дело.
Кристијан Брикнер бил изнесен од затворот од својот адвокат. Не бил виден во автомобилот, но полицијата потврдила дека го напуштил затворот „Зенде“.
Брикнер бил осуден за силување постара жена во португалскиот град Праја да Луз во 2005 година и ќе носи електронска белезица за следење по неговото ослободување од затворот „Зенде“ во близина на Хановер.
48-годишниот германски државјанин никогаш не бил обвинет за никакво кривично дело поврзано со случајот на Мекен. Тој негира каква било вмешаност.
Медлин исчезнала во португалското одморалиште Праја да Луз во 2007 година. Таа и нејзините браќа и сестри биле оставени да спијат во апартманот додека родителите Кејт и Гери отишле во близок ресторан.
Исчезнувањето на Медлин стана еден од најпознатите нерешени случаи на исчезнати лица во светот.
Германските обвинители посочија докази, вклучително и податоци од мобилен телефон, што укажуваат дека Брикнер можеби бил во близина кога таа исчезнала и постојано тврдат дека тој е одговорен.
Сепак, тие не пронајдоа доволно докази за да поведат обвинение.
фото: принтскрин