Европа
Русија смета дека изјавата на Советот за безбедност за изборите во Донбас била несоодветна
Проектот на изјавата на Советот за безбедност на Обединетите нации за изборите во самопрогласените рускојазични региони во источна Украина не беше прифатена, бидејќи беше несоодветна, соопшти ноќта кон вторникот постојаната мисија на Руската Федерација во ОН, откако претходно украинскиот амбасадор во светската организација ја обвини Москва дека ја блокирала нацрт резолуцијата со која се осудуваат споменатите избори за која руската страна најави дека ќе ги признае и покрај противењето на Киев и неговите западни поддржувачи.
„Постоеше предлог изјава за јавноста, која се покажа несоодветна и поради таа причина не беше прифатена“, ја цитира РИА Новости изјавата на портпаролот на постојаната руска мисија во ОН, Алексеј Зајцев, без да даде поединости во што руската страна ја гледа несоодветноста на текстот.Москва претходно најави дека ќе ги признае изборите за претседатели и народни совети во самопрогласените рускојазичните источни украински републики и оти смета дека тоа се основен предуслов за продолжување на мировните преговори со централните власти во Киев, што не го споделуваат украинските власти, Европската унија и Генералниот секретар на ОН.Претходно постојаниот претставник на Украина во ОН, Јуриј Сергеев соопшти дека петнаесетте членки на Советот за безбедност на ОН работеле на усвојување на декларацијата во петокот и подоцна во текот на викендот, но Русија се спротиставила. Во текстот кој го предложила Литванија било истакнато дека гласањето организирано во неделата во регионите Луганск и Донецк, е спротивно на договорот од Минск, склучен на 5-ти септември за прекин на огнот меѓу прозападните власти во Киев и проруските бунтовници во источна Украина, со поддршка на Москва и Организацијата за безбедност и соработка во Европа (ОБСЕ), појасни Сергеев./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.