– Алексис Ципрас (л,) и Пабло Иглесиас

Шпанската конзервативна влада, којашто кон крајот на годинава ја очекуваат парламентарни избори, нема да му дозволи на новоизбраниот левичарски грчки премиер Алексис Ципрас да не го врати долгот, порача во четвртокот шпанскиот министер за економија, Лиус де Гуиндос.

Шпанската конзервативна влада, којашто кон крајот на годинава ја очекуваат парламентарни избори, нема да му дозволи на новоизбраниот левичарски грчки премиер Алексис Ципрас да не го врати долгот, порача во четвртокот шпанскиот министер за економија, Лиус де Гуиндос.

Шпанија и’ позајми на Грција 26 милијарди евра од вкупно 240 милијарди евра, колку што изнесуваше заедничката програма за странска финансиска помош од тројцата грчки доверители, Европската комисија, Европска централна банка (ECB) и Меѓународниот монетарен фонд.

„Луѓето мора да бидат свесни дека бевме многу великодушни кон Грција и ќе продолжиме да бидеме, но будно ќе внимаваме над парите кои и’ ги позајмија граѓаните на Шпанија“, истакна шпанскиот министер за економија, Луис де Гуиндос

Новата влада на Грција, составена од коалицијата на радикалната левицата Сириза и десничарската Независни Грци, која победи на неделните предвремени парламентарни избори благодарејќи во прв ред на ветувањата дека ќе ги укине жестоките мерки за штедење наметнати од „тројката“ меѓународни доверители во замена за финансиската помош, најави и преговори со кредиторите од кои ќе бара отпишување на поголем дел од грчкиот долг.

За разлика од Грција којашто позајмуваше пари поради неможноста да го сервисира својот долг, Шпанија се задолжуваше со цел да ги спаси своите ослабени приватни банки. Мерките за штедење и кастрењата на јавните трошоци, како услов за добивање помош, ги вивнаа двете земји во самиот врв на Европската унија според стапката на невработеноста. Во Грција без работа се 25,7 отсто од населението, додека во Шпанија 24 отсто, според европската статистичка агенција Eurostat.

„Сумата од 26 милијарди евра којашто ни ја должи Грција, е еднаква на годишниот износ кој преку надоместоци им ги плаќаме на невработените“, спореди шпанскиот министер.

Популарноста на владејачката конзервативна Народна партија на шпанскиот премиер Маријано Рахој драстично падна поради непопуларните мерки за штедење, и и’ се заканува губење на власта на изборите што треба да се одржат во декември. Во мај, пак, во Шпанија се одржуваат локалните избори.

Левичарската партија Подемос (Можеме), која е сродна на Сириза и чии челници активно учествуваа во предизборната кампања на Ципрас во Грција, во моментов има поддршка од 28 отсто од шпанските гласачи, според анкетата на агенцијата Metroscopia, спроведена во јануари. На второто место се опозициските социјалисти PSEO сo 23,5 отсто, додека на трето место е Народната партија со поддршка од 19,2 отсто од избирачите.

Челникот на Подемос, Пабло Иглесиас, кој со Алексис Ципрас ја прослави промената на власта во Грција, за враќањето на парите на Шпанија вели дека „Потребно е да се реструктуира долгот, но не на индивидуално ниво, туку во рамките на блокот земји во јужна Европа. Долгот на јужните земји е неодржлив и затоа е потребно да се преговара со партнерите“, додаде Иглесиас.

Меѓутоа, шпанскиот министер за економија де Гуиндос нагласува оти „Секој одговорен политичар сака тие пари да ни бидат вратени. На масата не е реструктуирање на грчкиот долг, туку европската солидарност“, порача Гуиндос додавајќи дека веќе во четири наврати е модифицираното отплаќање на долгот при што на Грците им се намалени каматите и им е продолжен рокот за отплаќањето. „Доколку новата влада во Атина не ги почитува договорените услови, ма да ја прими новата транша од финансиската помош“, порача Шпанецот. Де Гуиндос проценува и дека на Грција до крајот на август би и’ биле потребни дополнителни 10 милијарди евра.

И другите европски доверители, во прв ред од северните земји, како Германија и Финска, порачуваат дека Грција целосно мора да ги врати парите.

И покрај тоа што победата на крајната грчка левица ги охрабри во Шпанија симпатизерите на Подемос, де Гуиндос смета дека тоа „нема да има никакви последици“ врз политичката сцена во Шпанија. Владата во Мадрид тврди дека ситуацијата не е како во Грција и дека може да се видат знаците на закрепнување./крај/мф/сн

Извор: Макфакс