Европа
Телефонски разговор Путин – Ципрас, Москва нема да ѝ нуди помош на Атина
По иницијатива на грчката страна, во понеделникот се одржал телефонски разговор меѓу рускиот претседател Владимир Путин и грчкиот премиер Алексис Ципрас, при што рускиот челник, по одржаниот референдум во неделата со кој Грците ги отфрлија предлозите на доверителите, изразил надеж дека грчкиот народ ќе ги надмине тешкотиите, соопшти Кремљ чиј портпарол Дмитриј Песков истакна дека Москва ги почитува резултатите од плебисцитот, внимателно ја следи ситуацијата, но дека Атина доколку има потреба треба самата да ја побара.
„Се разговараше за исходот од референдумот во Грција за условите на меѓународните кредитори за финансиската помош на Атина, како и за некои прашања од натамошниот развој на руско-грчката соработка“, се вели во соопштението на Кремљ во врска со телефонскиот разговор меѓу рускиот претседател Владимир Путин и грчкиот премиер Алексис Ципрас и се додава дека Путин ја изразил својата „поддршка за народот на Грција во надминувањето на тешкотиите со кои се соочува земјата“.
Во меѓувреме портпаролот на рускиот претседател, Дмитриј Песков, за медиумите изјави дека доколку на Грција ѝ е потребна помош, таа ќе мора самата да се обрати до Русија.
„Секако, многу внимателно ги следиме настаните, особено она што сега ќе се случува во Грција. Им посакуваме на нашите грчки партнери што поскоро да ги договорат неопходните компромиси со кредиторите и да преземат одлуки кои на најдобар начин ќе придонесат за економската и социјална стабилност на земјата“, го цитира агенцијата ТАСС Песков кој додал дека Грција е земја со којашто Русија има „долги историски и многу блиски врски, и најтесна повеќестрана соработка“.
Истовремено, според Песков, во Кремљ сметаат дека доколку на Грција ѝ е неопходна финансиска помош, таа треба самата да се обрати, но истакнува дека Русија досега не добила такво барање.
На прашањето дали Москва би можела да обезбеди финансиска поддршка за Атина, доколку не биде постигнат договор со доверителите, Песков препорачува „тоа прашање да ѝ се упати на Атина“. „Повеќепати рековме дека (….) досега немало такво барање за помош, и таа тема не фигурира во нашите билатерални контакти“, истакна портпаролот на рускиот претседател.
Според него, прашањето за помош за Грција не е ставено на агендата на самитот на земјите од БРИКС (Бразил, Русија, Индија, Кина и Јужноафриканската Република, петте најброзрастечки економии во светот), кој ќе се одржи во текот на седмицава во руска Уфа, но оти ова прашање може да биде дискутирано во текот на расправата за меѓународните прашања.
Грција може да изврши притисок врз Европската унија да го преиспита условите од договорот, откако со големо мнозинство Грците во неделата го отфрлија предлогот на доверителите, смета, пак, Алексеј Пушков, претседател на комисијата за надворешни работи на рускиот парламент.
„Според мое мислење, позицијата на Ципрас сега е посилна, бидејќи практички тој е поддржан од две третини од грчките избирачи (61 отсто гласаа за опцијата „не“ наспроти 39 отсто за опцијата „да“ за прифаќање на пакетот на доверителите – з.м.) за конкретното прашање. Односно за острите услови од договорот, кои се обидуваат да ѝ ги наметнат на Грција, Европската унија и доверителите, Ципрас ја спротистави позицијата на грчкото население“, изјави Пушков за агенцијата РИА.
Според него, Ципрас не го спровел референдумот за да добие одобрување на гласачите да ја напушти еврозоната. „Тоа прашање не беше поставено на референдумот. Тој го направи референдумот за да ја зацврсти својата позиција во преговорите со ЕУ, да покаже дека Унијата не води преговори со него, туку со мнозинството Грци. Се чини дека сакаше да добие дополнителна можност за притисок врз ЕУ, со што би му било гарантирано да ревидираат условите од пакетот“, истакнува рускиот пратеник.
Меѓутоа, уште пред одржувањето на референдумот во Грција, европските функционери и ЕЦБ истакнаа дека тие услови престанале да важат автоматски откако Атина на 30-ти јули не ги исплати 1,6 милијарди евра долг кон ММФ, со што технички влезе во банкрот. Притоа порачаа дека новите предлози за помош ќе содржат и нови услови, кои најверојатно ќе бидат поригорозни.
Сепак, Пушков смета дека Ципрас „успеал да ја зацврсти својата позиција“. „Сега тој ќе оди на преговори, не само со ставот на својата влада, туку и со позициите на мнозинството граѓани“, смета.
Пушков вели и дека резултатите од референдумот биле предвидливи, бидејќи граѓаните на Грција „во голема мера биле предизвикани од позицијата на ЕУ, меѓународните кредитори, кои фактички ја осудуваат Грција на мизерување, живуркање, и не саката да ја разберат грчката влада кога таа настојува да се спаси какво и да е потенцијал за раст на земјата, а не само да служи како извор за плаќање на кредити и камати на кредитите“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.
Европа
Во Англија извикал „Алах Акбар“ и убил случаен минувач: „Го направив тоа за луѓето од Газа“
45-годишниот Ахмед Алид вчера беше прогласен за виновен за убиство и обид за убиство. На 15 октомври минатата година, барател на азил од Мароко со нож го уби 70-годишниот Теренс Карни во центарот на англискиот град Хартлпул. Тој претходно го избодел со нож својот заспан цимер Џавед Нури додека викал „Алах Акбар“.
Алид и рекол на полицијата дека сето тоа го направил „за луѓето од Газа“. Само осум дена пред да убие случаен минувач и да го рани својот цимер, милитантите на Хамас го нападнаа Израел. Алид се заколнал дека ќе убиел повеќе луѓе доколку имал митралез и друго оружје, изјави обвинителот Џонатан Сендифорд во Судот во Тесајд.
Алид делел куќа со други баратели на азил во североисточна Англија. Тој бил вознемирен што Нури го прифатил христијанството. Цимерите рекле дека Алид почнал да носи нож откако на телевизија видел прилог за настаните во Газа.
Европа
Крим главна цел: Пентагон откри за што Украина ќе ги користи моќните ракети АТАКМС
Министерството за одбрана на САД ја појасни целта за испорака на ракети со долг дострел во Украина, кои неодамна беа испорачани во тајност. Како што објави „Њујорк тајмс“, целта на испораката на американските ракети АТАКМС е да се зголеми притисокот врз Крим, кој беше анектиран од Русија по референдумот во 2014 година.
Крим го претставува центарот во кој се лоцирани голем број руски воздушни и копнени сили и кој досега, како што пишува американскиот дневен весник, „за нив бил релативно безбедно засолниште“. Ова го тврди анонимен американски функционер. Сепак, Пентагон одби да каже колку точно од овие проектили со дострел од 300 километри се испорачани на украинската страна.
Советникот за национална безбедност на Белата куќа, Џејк Саливан, претходно ја потврди испораката на овие ракети без да прецизира дали тие се модифицирани и имаат зголемен дострел.
Украинските сили веќе употребија АТАКМС, што претседателот Володимир Зеленски го потврди на 17 април, објавувајќи дека бил извршен напад врз воздухопловната база Џанкој, која се наоѓа на 165 километри од линијата на фронтот. Министерството за одбрана на Руската Федерација не ги коментираше овие наводи.
Pentagon reveals Ukraine’s targets for ATACMS missiles – NYT — (the usual baffling lack of retaliation threats from #Putin– instead just the usual bleating that ‘it’s impossible to justify’..Bring Stalin back to life please, Russia) https://t.co/8pi0Lx8tbt #CapeTown #SouthAfrica pic.twitter.com/ZtI5cG3r2m
— Peter Mayson (@theforeverman) April 26, 2024
Американскиот дневен весник потсетува дека Украина првпат добила ракети АТАКМС во септември минатата година, но дека станува збор за верзија со половина дострел. Се шпекулираше дека Украина можеби користела американски ракети за да го урне кримскиот мост, што на почетокот на месецов го потврди и самиот претседател Зеленски, велејќи дека неговата влада „навистина сака да го уништи мостот на Крим“.
Тој е симбол на руската окупација и преку овој мост Русија испорачува воена опрема и ги снабдува војниците во Украина. Во неколку наврати досега мостот беше цел на украински напади.
– Мислам дека е вистинското време, а шефот (Бајден) донесе одлука дека е вистинско време да и го обезбеди на Украина оружјето неопходно за тековната борба. Тоа е добро осмислена и многу конструктивна одлука – изјави адмирал Кристофер Грејди, заменик командант на Здружениот генералштаб на американската армија.
Руската страна го осуди потегот на САД, а рускиот амбасадор во Вашингтон Анатолиј Антонов рече дека тоа „ја зголемува заканата за безбедноста на Крим, вклучително и Севастопол и другите руски градови“.