Украинците во неделата излегуваат на избирачките места за да го изберат новиот состав на парламентот, откако во февруари го соборија претседателот Виктор Јанукович и парламентот функционираше досега без повеќе од стотина пратеници, што е последниот чекор на револуцијата со која земјата треба да се дефинира како наклонета кон Западот.

Околу 36 милиони гласачи треба да го избере новиот парламент а прозападните власти во Киев сметаат дека предвремените избори ќе донесат повеќе стабилноста во земјата којашто по насилното менување на власта се соочува со бунтот на рускојазичното население во југоисточните региони во земјата во конфликтот во кој има над 3.700 загинати и околу 9.000 ранети, а најмалку милион лица се внатрешно раселени или пребегани во странство. Меѓутоа, аналитичарите сметаат дека малку е веројатно дека изборите ќе бидат одраз на вистинското расположение, кога се одржуваат во услови на граѓанска војна и милитаризираност на општеството која не стивнува речиси една година.Исто така, прашање е колку овие избори ќе ги задоволат барањата на народот кој излезе на улиците на Киев да го урива Јанукович, изразувајќи желба за поцврсти врски со Западот, искоренување на корупцијата и поотворено и поправедно општество. Во мај го избраа новиот претседател, милијардерот и претприемач Петро Порошенко, кој вети исполнување на барањата на поддржувачите на поранешната прозападна опозиција којашто има поддршка во западните делови од земјата, но во парламентот има и натаму пратеници кои потекнуваат од блокот кој го предводеше Јанукович и Киев сета дека со овие избори ќе го исчисти од нив. Политичкиот систем во земјата, исто така, не е променет. И за да се ослободи, како што рече, од остатоците на стариот систем, Порошенко ги распиша вонредните парламентарни избори.Според резултатите од анкетите на Институтот за социологија во Киев и Фондацијата на демократските иницијативи, објавена претходно седмицава, за блокот на Порошенко, сосема нова коалиција која беше формирана за да го поддржи на претседателските избори, во кои влегува УДАР на киевскиот градоначалник Виталиј Кличко кој во полза на Порошенко се откажа од претседателската кандидатура, би требало да добие 30 отсто од гласовите. Следуваат националистичката Радикална партија на Олег Лјашко со 13 отсто, и Народниот фронт на премиерот Арсениј Јаценјук со 11 отсто, кој ја напушти порано најголемата опозициска партија Баткивштина (Татковина) на поранешната премиерка Јулија Тимошенко.Партијата Самопомош, главно составена од активисти на цивилниот сектор која ја предводи поранешниот градоначалник на Л’вов, Андриј Садовиј, треба да добие 8м5 отсто од гласовите, а Баткивштина на Тимошенко – 7,5 отсто, а Силна Украина на олигархот и банкар Сергеј Типико и Опозициски блок, во кој влегуваат припадници на од неодамна забранетата комунистичка и проруски ориентирани граѓани, би можеле да го минат изборниот праг со 5 отсто од гласовите.Од 29 партии кои се натпреваруваат за 450 мандати во Врховната Рада (парламентот), ниедна официјално не ги претставува ставовите на соборениот претседател Јанукович, а повеќето го поддржуваат поврзувањето со Западот. Според Москва, тоа се должи на застрашувањата на населението и форсирањето на националистичките и неонацистички сили во моментов во Украина, кои имаат големо влијание врз властите во Киев бидејќи беа носители на безредијата со кои беше соборен Јанукович и се главните доброволци во воената операција на Киев за да ја врати контролата во југоисточните региони.Како и мајските претседателски избори и овие се одржуваат во услови кога големи пространства се вон контрола на властите во Киев во регионите на Луганск и Донецк. Иако вкупно 36 милиони Украинци би требало да го дадат својот глас, гласањето нема да се спроведува во овие региони, како и на Крим, во изборите нема да учествуваат неколку милиони избирачи, што значи дека нема да бидат пополнети сите 450 места во парламентот. Од самопрогласените ткн Народни републики во Донецк и во Луганск најавија дека ќе ги игнорираат парламентарните избори и најавија сопствени за 2-ри ноември, кои властите во Киев ги прогласија за нелегитимни. Шефот на украинската дипломатија Павел Климкин ја повика Русија да ги сопре изборите на истокот, бидејќи тие би можеле да предизвикаат трајна поделба на земјата. Во меѓувреме Киев донесе закон со кој во период од три години има дава „специјален статус“ на Луганск и Донецк, кои прво бараа федерализација а потоа соопштија дека својата иднина во Украина.Во секој случај се очекува победа на блокот на Порошенко која треба да биде убедливо изразена, доколку се сака влада во Киев којашто ќе може и да биде отпорна на националистичките притисоци на паравоените формации и да води дијалог со сепаратистичкиот исток. Порошенко бара јасен мандат и легитимитет за спроведување на реформите и интеграција на Украина во ЕУ и блиски врски со САД. Најави подобро спроведување на законите, децентрализација на власта, реформа на политичкиот систем и на полицијата и отстранување на целиот стар кадар во државната администрација и во министерствата од периодот на Јанукович и пред него./крај/мф/сн

Извор: Макфакс